Piah khik kajap quyen loi saong daong anek saih caga, Mentri Pato Megru pandar dom sang bac dai hoc, cao dang ba tabiak jalan pilih ruah thun 2026 di dalam bilan 10 anak tal piah pasiam dom asal kadha karei dalam mbang pilih ruah 2025. Mentri Pato Megru jeng daok padang sarak caik dahlau labik birau njauk haong bruk pagam dom tinh, ban, pandar meng thun 2026. Piah caga ka bilan pulih ruah anek saih thun 2026, Mentri Pato Megru jeng mek panuac ndom dom sang bac ka bruk njauk khik tani tanat bruk pilih ruah tapa hoc ba halei oh.

Bilan he meng blaoh, Thanh doan TPHCM hu peih ngak 6 danak dak, chien dich halan hatian hu jaik 7 ribau mbang urang halan hatian hu mbaok tame. Dalam nan, siam abih mboh di meta lac bruk halan hatian daong ka dom pasak ngak bruk karja di dom xa, phuong hadei pagam tame. Tukvak anak tal, adam dara TPHCM brei patui veik dom danak dak daong ka bhap bini bac pasram pandar taka so, peih ngak dom bruk hu makna di bhum atah bayah, bhum ceik car taphia negar, kaoh pulao.

Tinh Ca Mau hu ngak bruk haong Sang bac dai hoc Queensland (Autralia) saong Kadung jien Vingroup piah peih ngak danak dak langyah gen arieng Ca Mau hu jien jaik 10 trieu USD. Jalan ngak saong khik ramik halau gen arieng di labik ini, gam haong nan peih tabiak jalan nao birau ka gah raong arieng karo kajap, brei kein lagaih meraik gauk di Ca Mau. Langiu di nan, tinh Ca Mau daok peih praong bruk raong hadang the takai patih raong pablak payeng. Ini lac bruk raong takik salih ia, pasang iek danao ia tani tanat, gam parilo arieng, gam khik kajap salamat sinh hoc.

Dom danak dak jalan mbak nao mai hu makna paraong di tinh Dong Thap daok gaok rilo kan kandah kurang patau piah padang ngak, kayua dalam bhum caong khin hu rilo, ngak jhak tal bruk peih ngak saong bruk peih brei phun jien, tinh  Dong Thap caong khin tinh Dong Nai pasang iek, daong pabak patau padang ngak kuhria 137.800 met khoi. Dalam thun 2025, Dong Thap hu parabha labaih 17.550 ti dong meng kadung jien karja buh tame ngak danak dak jalan mbak  piah jhul pakhang bruk ngak mbang cakrok patagok kinh te - xa hoi.

Kapul Pacang khik Alam Langik Viet Nam birau brei angan ka 6 phun đa di Bein pakat Negar Kon Ka Kinh (xa Ayun, tinh Gia Lai) lac phun drap ar Viet Nam. Dom phun đa hu mbaoh tangin lac hu thun umo labaih 218-300 thun, hu yaom glaong ka gah sinh thai pagam haong sajarah patagok he sinh thai glai Kon Ka Kinh. Bruk mbaoh tangin lac phun drap ar brei mboh yaom kaom praong glaong ka ilamo, gam haong nan hu daong ngak rilo he sinh thai glai.

Thu tuong birau di Thai Lan Anutin Charnvirakul ngak bruk haong Jabat palei salih Thai Lan piah taduan dom bruk ba tabiak di dom urang ngak mbang pablei salih saong gah kinh te tu nhan, duh ka bruk padang ngak Harak khan danak dak ngak bruk 120 harei di rajaei. Jabat Pablei salih Thai Lan brei mboh bruk njauk hatai saong iew rajaei samar ngak birau veik danak dak Njauk brei parabha dua. Dalam nan, rajaei  meda daong yaom tal 505 ka dom paok jien di bhap bini piah jhul pakhang bruk blei pandar di bhap bini saong daong ka gah ngak mbang.

Kapul Y te Dunya ba tabiak sa pathau khan birau, pandar ngak dom jalan langyah siam lagaih ka jien buh tabiak piah pacang caga dom ruak hakik oh njom mbak saong pasiam prein yava hatai glo akaok, gam haong nan kakei lac tukvak ngak dalam dunya hu suai gilac biak rilo. Yaom lac hu 82% dom negar patrun hu dom urang metai drah kayua ruak haik oh njom mbak dalam tukvak nan, min tukvak pasiam hu suai gilac jaik abih di dom labik saong dom negar gaok mai daok mboh bruk parilo veik dom urang metai pambuak tal dom ruak hakik oh njom mbak.

My sa mbang tra atah klak asar kadha di Hoi dong bao an LHQ caong khin padeih patuh phao samar di Gaza saong palai dom urang chap khik, ndem meyai lac harak van kien oh ka ginup khang piah ndem puac ka bruk Hamas. Tapa bruk buh phieu sa mbang tra mboh bruk klak rabha di Hoi dong bao an LHQ ka bruk Gaza hadei jaik 2 thun mesruh metak di Ixraen saong gah Hamas./.