Tal ini, hu 18/34 bhum palei dalam negar ngak salah blaoh bruk brei abih baoh sang oh daok taik tahak ka 3 kapul urang dalam nan hu: urang hu ngak bruk katmang meng kal, baoh sang rahra daok dalam sarak njauk daong sang daok saong baoh sang kathaot, jaik kathaot mbang tui sarak meng danak dak hu peih ngak dalam negar. Yau nan min, baoh sang daok veik brei salah blaoh meng ini tal harei 31/8 jeng daok praong. Piah salah blaoh bruk ngak njauk tukvak, tui Mentri Bangsa saong Agama, dalam tukvak anak tal, yaok harei, kuhria rah tapa yaok bhum palei brei ngak labaih 26 baoh sang.

Tui So Noi vu TPHCM, dalam 6 bilan akaok thun, TPHCM birau hu labaih 96 ribau mbang urang hu mbang tui sarak daong jien lahik bruk ngak saong labaih 3.520 urang caong khin daong bac bruk ngak. Dalam 6 bilan akaok thun ini, bruk caong khin daong saong pabak urang ngak bruk di TPHCM birau hu rilo salih siam lagaih. Tui kuhria dalam quy 3 ini, dom doanh nghiep caong hu labaih 90.000 urang ngak. Njauk caik hatai, urang ngak meblah tal 58%, pataom tame dom bruk ngak ndap nda yau jhik menyim, kalik juah saong pagam mac moc.

Meng harei 1-7 bahrau blaoh, dom urang mai meyao meyit di Pasak Duh bruk karja di dac khu Phú Quốc, tinh An Giang tagok rilo. Piah palagaih jang ka rahra, Pasak Duh bruk karja dac khu Phú Quốc brei in 400 ma QR code samu haong 400 harak gar karja karei gauk. Rahra saong gah ngak mbang pablei salih brei pasang ma QR piah pabak khau tin blaoh ngak dom bruk patui veik. Tui Akaok UB Bhap bini tinh An Giang Hồ Văn Mừng, sa dalam dom jalan ngak di bruk karja palei 2 pakat lac piah jaik taphia rahra, duh rahra siam jang. Dac khu Phú Quốc brei ngak siam bruk ini.

Hadei ngak salah blaoh bruk pagam tinh, ban, rilo sang ngak bruk di karja pakat tinh di Bình Phuoc( klak) daok klak saoh, huac palai payua drap ar di karka sang abih jien piah khik iek, ngak pasiam. Anak bruk nan, bhap bini pak ini caong khin dom pakat karja samar hu jalan ngak brei pandar dom sang ngak bruk di karja klak hu lagaih. Rilo urang sahaneng brei panuac lac njauk salih bruk pandar dom sang nan piah duh ka bhap bini.

Di Palei Ilamo – Yulit dom bangsa Viet Nam bahrau rah tabiak dom danak dak parang iek veik Adat ba khan ao manei hajan, atau daok ieu lac Adat nhập hạ tui adat di Bhat yao Nam Tông. Ini lac adat hu meng jaman Po Bhat daok diuk, dahlau tuk acar nhập hạ di dalam sang dalam 3 bilan hajan hu brei tok mek “Khan ao manei hajan” piah pandar dalam tukvak daok hạ haong hatai caong likau sa bilan siam mekre. Paling khan ao manei hajan hu jeng sa ilamo gheh karei di Bhat yao meng kal, sa adat hu yaom glaong, praong prang saong ginreih. 

Jabat daong LHQ kakei dahlau labaih 17 trieu urang di Yemen kurang pandap mbang. Urang nan daok tagok veik tal 19 trieu urang di akaok thun anak, meyah oh ngak salih karei hu. Tui dom harak khan lac, bruk mesruh metak tal ini ngak metai 150.000 urang, ralo lac bhap bini. Urang khin daong ngak pahala di Yemen tagok gam gam, dalam tuk kurang urang ngak bruk gah ini.

Karja Tong thong My Donald Trump ba tabiak panuac haong urang dang akaok 5 negar chau Phi ka jalan tok taduan urang mai daok meng dom taneh bo My tiaok tabiak. Langiu di nan, tui jalan ngak hu ndom ba tabiak, dom negar hu pambuak brei oh payua dom urang ni gilac mai negar di khol nyu atau labik bo dom urang nan hu daok meng dahlau diah, ka tal tuk My ba tabiak bruk kuhria puac abih ka harak likau ti nan di dom urang ini.

Langik pandiak daok pambak praong ralo labik di rilo taneh ia karei. Han Quoc  birau kakei  brei padeih bruk ngak dom danak dak duh ka bhap bini kayua langik pandiak tagok tal 370C lac pandiak glong abih hu mboh kuhria meng bilan 7 thun 1908. Dalam tuk nan, Trung Quoc daok peih ngak rilo jalan piah pacang caga bruk pandar rilo ndien dalam bilan he. Puac adit blaoh, bruk pandar ndien tagok glong oh ka bhian mboh.