Di Palei Ilamo – Yulit dom bangsa Viet Nam meda peih ngak ralo bruk “Uan raok thun birau 2025”. Bruk praong di danak dak lac darak bhum glong ngan haong 50 labik pablei pandap, kaya mbang meng kan duh ka tuai damuai; hu main mong iek adat “ uan padai birau” di bangsa Thái  saong paneing kadha Adat caong khin patuah jamo di dom bangsa  di tỉnh Thanh Hóa. Danak dak yaih khan dom ilamo  akaok thun birau hu dom adat, cambat tanarakun. Tapa nan, tuai damuai duah thau dom ilamo meng kan, abih di nyu lac dom bangsa, rik tame khik ramik ilamo meng kan dahlau di bangsa, pambuak jiak gauk jang di dom bangsa.

Peih ngak meng harei ni tal 01/01/2025, di Tapen Ninh Kiều saong dom labik jaik taphia, Harei Jirah rivang – Malam gom bangu Ninh Kiều, Can Tho mbang VII hu ralo danak dak barau, pachreih pachrai, dalam nan hu pakagah gaiy thuyen buom mbang akaok mati. Harei hu ralo bruk chreih bui yau: parang iek gom manyem nghe thuat ngak makre, phling ia ngaok kraong; khan pandap pandar yulit di Can Tho; tamia adaoh ngaok jalan ban; đờn ca tài tử, parang iek ahar bhap bini Nam Bo; Tamia Flashmob; Ma-in pling bangsa; Palao kalang nghe thuat… 

Urang bangsa Khmer di tinh Soc Trang urak ini daok khik saong patagok ilamo, sap ndem akhar vak  di bangsa drei. Kapol urang su sai jum pataom anit ranam taneh ia tinh Soc Trang  jak ba 92 baha peih tal bac sap Khmer saong daong sư sãi bac akhar Pali. Dom rija roya meng kan yau lakhah, adat ngak yang kakuh ia bulan, Adat ngak yang Oóc Om Boc paacah ghe Ngo…hu peih ngak siam mekre.  Dom pakat, dom gah daok padang danak dak khik ramik saong patagok ilamo di bhap bini Khmer, tapa nan duah bruk ngak saong patagok bruk yulit.

3 thun tapa, Gilang tapuk tinh Dak Lak hu padak padang saong jao brei 20 tu tapuk bhap bini ka dom xa bhum mikva bangsa takik, saong ralo janih tapuk tui adat cambat rai diuk mikva. Gilang tapuk tinh Dak Lak hu pato urang jakar xa di bruk khik iek, srap gap, pandar tapuk, daong ka mikva hu pandar gheih dom tapuk makna. Bruk padak padang gilang tapuk piah daong bhap bini hu ilimo puac tapuk, rik prein patagok ilimo, patagok kinh te - xa hoi bhum mikva bangsa takik

Mban tacei ba bruk pachreih urang halan hatian alin brei darah TPHCM khan lac, dalam thun 2024, Ban raya taduan hu jaik 337.300 đơn vi darah. Kalup kapol Darah takik manuac hu di TPHCM kayua Pasak Brei darah  ngak pahala  khik iek, urak ini hu 254 urang jak ba hu 572 mbang brei darah  dalam thun, pabak ka bruk daong iek ruak drah samar saong jru ruak. Ban raya  buh tabiak 2 ty 300 trieu dong  daong ka bruk brei ba darah tame rup ka urang hu alin brei darah tuk ndih iek ruak, gam 462 trieu dong alin pandap ka urang brei darah rilo mbang hu raidiuk kan kandah…

Ha Lan hu ralo manuac di grauk dunya thau tal lac dom thaong takhaok kayau. Jaik ini, Ha Lan barau duah mboh hu sa takhaok kayau praong taka so 36 di chau Au, kuhria lac hu ngak meng puac abap 15 atau akaok abap 16. Dahlau ni urang bhian lac tok dom manuac ngak nong hu pandar takhaok kayau tuk ngak bruk di palei pala, min bruk duah mboh ni jang khan lac mikva daok di ban jang hu pandar janih takhaok ni. Dom urang duah drap ar meng kan khan lac ni takhaok cammereip hu duah mboh pak Ha Lan ngak meng kayau bach duong.       

Bruk blei jru iek ruak di Nhat Ban lac ralo kan kandah kayua dom hukum khik iek biak tani tanat, abih di nyu lac dom janih jru hu tavak angan blei. Rahra njauk nao tal dom labik pablei jru atau labik y te piah blei dom janih jru ini. Yau nan min, Nhat Ban birau yaih khan sa “ dom asar kadha birau patabiak” piah brei adat ka bhap bini hu blei jru  di dom labik pablei pandar hu mbuan lagaih, min urang blei jru njauk brei hu harak gal tavak veik panuac tacei pato online di urang gru jru blaoh paje. 

Sa baoh gom manyek lan am lavik thun daok biak takik, hu cih ralo thaik thaot di Labik Paling hu gom 7 dahlah menyek, pandap cuh gahlau saong dhan cha-la, hu duah mboh jaik ceik Oliu dalam sa mbang cakac taneh piah roh duah di Jabat Drap ar meng kan Israel. Drap ar ni hu umo 1.700 thun meng jaman La Ma meng kan, brei mboh lac rai diuk ilimo saong agama di manuac Do Thai meng tukvak nan. Roh duah ni oh tok brei makna ka bruk duah drap ar meng kan bo daok khan lac ilimo hadah krah saong drap ar agama di manuac Do Thai dahlau daih yaok rabau thun./.