Tui BHXH tỉnh Bình Dương, kuhria tal harei 31-12-2022, dalam tỉnh hu 610 labik padeih ngak bruk, yai the, klak drap ar, po doanh nghiep klak, tavak sre bảo hiểm labaih 600 tỉ đồng. Kayua gaok kan kandah meng bruk di dunya saong bruk lạm phát, rilo doanh nghiep kurang pandap tamo, don hang njauk kacak trun takik, atau brei padeih ngak. Tukvak anak tal, BHXH tỉnh Bình Dương brei patui ngak dom jalan brei samar mek jien, mek jien daok tavak. Doanh nghiep halei suai bayar jien, BHXH tỉnh payua ho sơ ka jabat kong an brei ba tabiak langyah tui Hukum hình sự 2015.

Meng hatai kham merat patrun kathaot bhum urang bangsa takik, tỉnh Bình Phước bahrau tabiak bruk peih ngak danak dak bruk ngak negar ka patagok mbang ngui daok dang bhum urang bangsa takik saong bhum ceik dalam tỉnh thun ini, dalam nan, kham merat patrun takik di abih 1.000 sang kan kathaot dalam thun ini; langyah taneh daok brei ka 48 baoh sang, langyah sang daok ka 629 sang, daong salih bruk ngak ka 1.300 sang, daong ia pandar ka 1.310 sang, daong ia pandar praong ka 4 danak dak.

 Urang ngak nong di Trà Vinh daok having akaok kayua yaok ribau ha padai tal tuk yuak mbuan lahik kayua  takuk mbang palai. Tui So Ngak nong saong Patagok palei pala Trà Vinh, bilan padai đông xuân ini urang ngak nong trun pajaih hu labaih 60.000 ha saong padai njauk takuk mbang 2 mbang. Tikuk mbang palai pajua takik atau rilo saong tui labik, hu labik njauk khut khat tagok tal 30 -40%. Gah chức năng pachreih urang nong brei pametai takuk meng tangin, brei peih ngak sumu gauk di taneh hamu praong, abih di nyu lac oh pandar điện piah pametai takuk.

Labaih 1 thun ini mai, yaom la-u thu di Bến Tre gam gam trun, hu tuk daok 12.000 đồng sa pluh (12 baoh), lac 1.000 đồng sa baoh ngak ka po bein khat rilo. Tui Sở Ngak nong saong patagok palei pala Bến Tre, la-u thu laik yaom khang lac bruk yau gauk di dunya. Tỉnh hu pok panuac tagok dom mintri, dom gah piah peih bruk pablei salih, duah dom darak pasar bahrau min bruk jeng daok kan kandah. Gam haong nan, daok pachreih dom sang pala la-u tui jalan hữu cơ saong pambuak haong dom Cty ngak tabiak dom pandap meng la-u, abih di nyu lac la-u thu.

 Tui Pasak Kuhria mboh dahlau Khí tượng - thủy văn pakat negar, meng harei 21 tal harei 24-2, njom iua mbak di bhum taneran kraong Cuu Long daok tagok, hadei di nan meng trun. Ia mbak njom tame dalam  di dom kraong Vàm Cỏ Đông, Vàm Cỏ Tây, Hàm Luông, Cổ Chiên…meda tame dalam meng 55-70km. Dalam tuk nan tui kuhria mboh di bhum tasik Nam bộ riyak glong 1,5-2,5m dalam 1 -2 harei anak tal, saong ia tasik tagok di labik trạm Vũng Tàu meda glong 4,15-4,25m. Kayua ia tasik ndik  gam riyak praong, bhum tapen tasik di dom tỉnh Nam bộ meda mbuan hu ia dauk dom labik biar dhong, tapen kraong saong langiu ar pacang, mbuan ba tal ia mbak dauk dom kaong di bhum taneran kraong Cuu Long.

Tổng thống Thổ Nhĩ Kỳ Recep Tayyip Erdogan hu mai taom gaok tapak saong hu panuac dhar phor dom kapul cứu hộ, cứu nạn Việt Nam saong dom taneh ia hu daong duah urang gaok bala hadei di mbang megei baoh taneh. Ong ndom lac, bala megei baoh taneh sa mbang tra brei mboh yaom glaong di bruk jum pataom dunya saong Thổ Nhĩ Kỳ oh tuk halei var bruk daong ini. Kuhria tal tukvak ini, kapul daong duah urang gaok bala di QĐND Việt Nam hu peih bruk duah di 31 labik dalam Antakya, daong taneh ia ayut mboh hu 15 labik hu urang gaok bala dalam mbang megei baoh taneh. Kapul hu jao veik ka taneh ia ayut duah, ba tabiak hu 28 urang metai.

 Campuchia peih ngak danak dak jalan cáp quang ala tasik. Jalan cáp quang atah jaik 3.000 km pambuak ban tasik  Preah Sihanouk di Campuchia saong Hong Kong (Trung Quốc). Urak ini, Campuchia pambuak saong he thong cáp quang tasik Malaysia - Thái Lan saong jalan cap quang tasik Á - Phi - Âu 1, min meyah dut hong dom taneh ia dalam bhum, Internet di Campuchia jeng daok takik. Hadei di tuk danak dak nan salah blaoh meda ngak brei Internet  khang, yaom lap jang ka bhap bini Campuchia.

Dom Ngoại trưởng EU bahrau hu mbang taom gaok di Bỉ piah ginum biai bruk taong phạt bahrau abih ngan saong Nga saong daok patui bruk daong ka Ukraine. Dahlau di nan, UB châu Âu hu ba tabiak pok taong phạt ka 10 ngan saong Nga piah pasang iek bruk pablei tabiak negar langiu saong pacang cakak bruk plaih njaik jalan taong phạt. Pok taong phạt bahrau tui kuhria hu brei tapa di harei 24-2. Pok taong phạt bahrau hu ba tabiak dalam tuk jhung bilan dahlau Mỹ jeng brei thau dom jalan taong phạt pamaong tame dom kapul nyaom saong menuac urang gah quân sự di Nga./.