Rilo sinh vien hu mbaok piah tut angan tame sang bac 

Meng bilan 7 ini yaom jien bilan tối thiểu bhum di urang ngak meda tagok 6% dut saong yaom klak. Dalam nan, bhum 1 meng 4.420.000 đồng sa bilan tagok 4.680.000 đồng sa bilan; bum 2 meng 3.920.000 đồng sa bilan tagok 4.160.000 đồng sa bilan; bhum 3 meng 3.430.000 đồng sa bilan tagok 3.640.000 đồng sa bilan saong bhum 4 meng 3.070.000 đồng sa bilan tagok 3.250.000 đồng sa bilan. Yau nan, yaok bilan jien bilan tối thiểu di urang ngak hu tagok jang meng 180 ribau tal 260 ribau đồng.

Rilo sang bac đại học daok brei thau điểm chuẩn pandar  kết quả pakacah  tong yaom pren bac (ĐGNL) kayua Đại học Quốc gia TPHCM peih ngak. Dalam nan, sang bac  ĐH Công nghệ Thông tin lac  sang bac camereip brei thau điểm chuẩn song tanut điểm chuẩn meng  800 điểm tal 940 điểm tui dom gah bac. Di sang bac ĐH Bách khoa, điểm tame sang bac tui jalan ưu tiên palih ruah tapak  song  ưu tiên palih ruah dom ngành meng  69,5 điểm tal 86,6 điểm… Bruk trúng tuyển hu khan brei thau hadei di tuk pilih ruah ảo pakat negar  tui tuk vak di mintri pato megru.

Meng akaok thun tal urak ini, bruk raong kaya tasik di dom tỉnh di ĐBSCL cak rok patagok khang, kayua bruk pablei tabiak dom pandap kaya tasik hu rilo siam lagaih. Kayua yau nan ye, rilo bruk raong hadang pandar công nghệ glaong hu peih praong, ba mai kein laba kinh tế glaong. Di Cà Mau sản lượng hadang di 6 bilan akaok thun mek hu jaik 120.000 tấn, tagok 10% dut saong tukvak ini thun blaoh. Kiên Giang sản lượng hadang dom janih mek hu labaih 56.000 tấn. Urak ini yaom hadang diuk di ĐBSCL ka oh mboh rilo salih bahrau, yaom hadang su, hadang thẻ praong daok tani tanat di yaom lac 235.000 đồng 1kg.

55 urang ngak camereip di  tỉnh Hậu Giang hu nao tal Hàn Quốc ngak bruk thời vụ, tui harak pambuak bruk song tỉnh Gangwon (Hàn Quốc). Dom urang ngak ni, hu ngak bruk dalam gah ngak nong song yaom jien duah hu 35 triệu đồng/sa urang sa bilan. Tuk vak ngak bruk thời vụ mbang ni labaih 5 bilan. Dalam bilan 7 ni, Hậu Giang hu ba urang ngak tapa Hàn Quốc ngak bruk thời vụ.

Hadei di bruk Đại úy Lê Ngọc Minh – Kapul Cảnh sát khik ramik hành chính gah trật tự xã hội, Công an quận Gò Vấp hu brei thau lac taduan jien piah ngak samar căn cước công dân (CCCD), Thượng tá Lê Mạnh Hà, Phó akaok Jabat Tham mưu - Công an TP.HCM brei thau, Công an ban hu brei padeih dalam sa tukvak ngan haong urang jakar ini piah kiểm điểm, pasang iek, ngak cambaih bruk, duah thau piah langyah tui njauk adat di hukum. Gam tui di nan jeng njauk kakei bhap bini caik hatai lac meda taom gaok cảnh sát khu vực atau ieu tame laik phone pandiak di Mintri Công an, Công an ban raya HCM atau Công an dom quận, huyện saong phường, xã piah thau bruk pabak CCCD atau khan brei thau dom bruk hu pambuak tal.

Hadei di Nga,Syria jeng taneh ia ka 2 di dunya công nhận nền độc lập di dom taneh ia cộng hòa Donbass tự xưng di  Ukraina. Cộng hòa Nhân dân Donetsk song  Lugansk tự xưng di bhum Donbass di Ukraina. Ni lac labik tabiak panuac lac tabiak truh Ukraina di thun 2014 song hu  Nga công nhận. Dom taneh ia karei, dalam nan hu Belarus, Nicaragua, Sudan song Venezuela, oh công nhận dom taneh ia cộng hòa Donbass, min, pachreih tui bruk công nhận di Nga.

Rajaei Campuchia brei peih tabiak paok tín dụng yaom 150 triệu USD (samu labaih 3 ribau tỉ VNĐ) piah daong pasiam veik gah du lịch taneh ia ini. Paok tín dụng ini hu Rajaei rik daong mateh saong dom gah jien padai, gilang paraik rik tame mateh. Gah du lịch Campuchia njauk kan kandah biak trak damak meng tuk jit ruak Covid-19 tamuh tabiak. Tal thun 2021, dom tuai damuai dunya mai tal Campuchia trun daok ala 200 000 mbang, ngak ka jien mek tame meng gah du lịch di Campuchia trun daok 184 triệu USD.

Dalam 2 adit mai ini, dom urang njom COVID-19 bahrau di Japon daok tagok veik. Dom urang njom bahrau rilo meng lac di dom   ban prong labik hu rilo menuac urang. Tui dom urang ilamu gah y tế, bruk klauk vaccine trun tui tuk vak, jeng lac makna ba tal dom urang njom COVID-19 bahrau patagok. Giáo sư Atsuro Hamada, Đại học Y khoa Tokyo brei thau biak kan piah kuhria mboh dahlau tuk vak tamuh khang mbang njom mbak ka  7 di Japon, min, dom bruk jiak di ni lac panuac kakei yaok urang njauk ngak dom jalan pacang caga jit song samar klauk  vaccine ka 4, abih di nyu nan lac urang taha song urang hu ruak karei dalam rup ./.

Urang lang: Thu Thảo- Mousaphuong -2/7