Rajaei njauk hatai haong bruk brei ka Tổng công ty padang ngak patagok jalan cao tốc Việt Nam (VEC) eng drei sahneng duah, kuhri kuhria phun jien đối ứng daok veik piah patui bruk peih ngak, samar ngak salah bruk padang ngak jalan cao tốc Bến Lức - Long Thành. Hu thau, jalan cao tốc Bến Lức - Long Thành atah jaik 58 km, hu peih tabiak ngak meng thun 2014. Abih tih yaom jien buh tame ngak di danak dak lac 31.320 tỉ đồng. Dalam tuk ngak, kayua gaok dom tavak tavaiy gah phun jien, nan ye meng thun 2019 tal ini, oh ka hu jao brei phun jien đối ứng. Kayua bruk padang ngak jalan brei padeih ngak dalam tukvak suai lavik, dom nhà thầu hu panuac likau padeih harak pambuak bruk.

UBND tỉnh Đồng Nai bahrau pok angan 6 xã mek hu tanut chuan palei pala bahrau kiểu mẫu saong 3 xã mek hu tanut chuan palei pala bahrau paglaong di huyện Xuân Lộc. Ini lac 9 xã ba akaok nao dahlau dalam bruk peih ngak sarak ka 7 ka bruk par akaok danak dak padang ngak huyện Xuân Lộc mek hu tanut chuan palei pala bahrau kiểu mẫu tui jalan cak rok patagok bruk ngak pandap kaya nong khang kajap tukvak 2018-2025. Huyện Xuân Lộc hu quy hoạch 4 bhum sit ngak mbang pataom gauk piah cak rok patagok dom janih phun pala, athur raong, padang tabiak 14 danak dak pambuak gauk raong, pala praong; hu 12 pandap panda mek hu angan OCOP pakat tỉnh. Abih di nyu nan lac, jien mek tame kuhria tui akaok manuac di thun 2022  hu 80,5 triệu đồng sa urang.

Tỉnh Bình Phước caga peih Nyaom biai pok meyaom bruk rik daong di dom urang naih gheih dalam bhum urang bangsa takik. Nyaom biai lac tuk piah pataom iek veik, piah taong yaom bruk ngak hu saong bruk rik daong di dom urang hu angan je, dom taha palei, akaok puk, urang jakar, nhân sĩ trí thức, doanh nhân, urang ngak mbang pablei salih naih joi, anek saih, sinh vien dam dara hadah krah di urang bangsa takik di dalam dom gah. Abih di nyu nan lac dom urang yau kreih camin ka hatai sahneng, kham merat yam tagok dalam ngak mbang, pala drak saong dalam raidiuk, hu mbaok tame dom bruk ilamu, thể thao, bruk puk palei, bruk ngak pahla…ngak jeng prein khang pambak tabiak dalam bhap bini dom bangsa daok di dalam tỉnh.

Mban Khik ramik dom danak dak ngak nong (di Mintri ngak nong saong patagok palei pala) bahrau buh tame 100 tỷ đồng peih ngak Danak dak pasiam veik, paglaong dom labik hạ tầng sara di huyện Đông Hải, tỉnh Bạc Liêu. Bruk peih praong dom jalan, dom danak dak kraong ribaong di bhum ngak sara meda ba kein lagaih biak praong ka urang ngak sara hu ngak bruk, trun manieng phun jien buh tame saong lagaih jang dalam bruk pajeng ba pandap panda. Danak dak hu caong lac meda tani tanat dom radaih pajeng pandap pamda di urang ngak sara saong khik kajap bruk tame - tabiak ia duh ka bruk ngak sara, lagaih ka khik tamik, tacei jalan ngak di bhum.

Tukvak ini, rilo bein pa-ok blait di tỉnh Bà Rịa-Vũng Tàu daok yam tame bilan paik baoh. Min kayua langik oh lagaih, baoh hu takik bo yaom oh tagok duk haong thun blaoh, ngak ka rilo urang nong oh hu jien mek tame. Dom thun jaik di ini, rilo sang pala pa-ok blait daok kaoh klaak meneing phun pa-ok blait piah pala dom janih phun karei. Min gah ngak nong tỉnh hu panuac brei thau, oh lac bhum taneh pala pa-ok blait halei jeng meda salih tapa pala phun karei hu, kayua bhum taneh nan tok lagaih haong phun pa-ok blait. Dalam tỉnh Bà Rịa-Vũng Tàu urak ini hu 7.859 ha pa-ok blait, trun jaik 150 ha duk haong vaktu ini thun 2022.

Rajaei Anh brei thau ka oh ba tabiak harak ka bruk hu atau oh tagok umo padeih hưu tal umo 68 thun, mbiah tal tuk hadei di mbang pilih ruah quốc hội taneh ia ini, tui kuhria hu peih tabiak di thun hadei. Tui adat urak ini, umo padeih huu di Anh urak ini lac 66 thun. Pathau khan anak Quốc hội, Akaok Mintri Lao động saong Hưu trí taneh ia ini brei thau, yaom lac rajaei meda peih tui tukvak hu brei adat ka bruk tagok umo padeih huu tal 67 thun, min tanut ini hu kuhria tal umo thun taha, tal darak pasa urang ngak saong jien padai di kanja, jeng hu makna lac bruk brei tagok umo thun padeih hưu tagok 68 thun meda ka oh hu ba tabiak.  

Rajaei Prang hu ba tabiak adat bahrau, tui nan urang umo meng 14 thun tagok meng hu adat brei pandar radaih mac điện (e-scooter) di taneh ia ini. Gam haong nan, Prang brei tagok yaom jien taong phạt bruk pajeng thêm menuac di mangaok janih radaih ini meng 35 Euro tagok 135 Euro (lac jaik 150 USD). Akaok Mintri Jalan mbak Pajeng ba Prang brei thau: "Bruk pandar biak rilo radaih mac điện ngak brei patagok parilo dom bala. Ini lac bruk njauk duh hatai".

 Tachrauk alam mun thur klik PM 2.5 dalam dom harei tapa  ngak kan kandah biak trak damak tal raidiuk saong prein yava di rahra Lào, rilo sang bac njauk brei ka anek saih padeih bac. Rilo tuai  klaak atau cakak meneing tukvak daok veik. Rajaei Lào hu ieu kakei dom tinh samar drah pacang caga saong padam dom mbang khuah glai, gam tui di nan jeng ieu kakei dom mintri, dom gah pambuak tal, peih ngak samar drah piah pacang cakak bruk njom tachrauk nerak alam, jhak tal prein yava di rahra, gah kinh te saong gah du lich jirah./.