Tapa bruk yaih khan paok thaot binguk tal manuac sia, Mbang parang iek daok ba kein lagaih piah ka rahra dalam taneh ia saong ayut saabat negar langiu hu maong iek dom kadha ilamo thaot binguk saong roh duah ka ilamo, bruk mbang ngui, daok dang, anek manuac di dom bangsa Việt Nam. Taphia di nan, paglaong chất lượng padang ngak jalan diukrai ilamo pambuak haong bruk khik ramik saong patagok dom yaom glaong di ilamo dalam Danak dak bruk ngak negar ka bruk cak rok patagok kinh tế - xã hội bhum mikva bangsa takik saong bhum ceik.

Kapul jum pataom sư sãi anit ranam taneh ia tỉnh Kiên Giang bahrau peih bruk taom mbaok labaih 100 urang lac dom halau janeng saong urang hu angan je dalam ban Rạch Giá, di tuk uan Sen Dolta di mikva urang Khmer. Tapa nan, akaok UBMT negar tỉnh Kiên Giang Lê Thị Vệ caong lac, dom halau janeng Phật giáo Nam tông Khmer daok tui jalan jak ba mikva phật tử ngak siam bruk jak ba “Bac megru saong ngak tui jalan hadah krah siam mekre di Hồ Chí Minh”, bruk jak ba “Taong abih bhap bini jum pataom gauk padang ngak palei pala bahrau, đô thị văn minh”... saong dom bruk pakacah gauk anit ranam taneh ia.

Festival hadang Cà Mau saong Mbang nyaom OCOP Bhum taneran kraong Cửu Long thun 2023 meda hu peih tabiak di ban Cà Mau meng harei 13 tal 16/12 anak tal. Ngan haong asal kadha “patagok yaom glaong di hadang Việt – Gam cak rok patagok pandap panda OCOP”, meda hu 14 bruk ngak hu peih tabiak di Festival hadang Cà Mau thun ini. Taphia di dom bruk ilamo, pandap mbang, tuai damuai atah jaik daok hu ba drei tame dom tour du lịch rahra ilamo bhum kraong ia Cà Mau pambuak haong bhum sinh thái angan je di tỉnh.

TP.HCM hu 25 jalan bhian dauk ia kayua hajan meng rilo thun tapa, rilo meng lac di quận Gò Vấp saong TP. Thủ Đức. Makna ba tal dauk ia lac kayua cống klak, sit, dom labik jalan nan biar jang dom labik karei daok vil val nan. Urak ini ban raya hu ba tabiak dom jalan ngak lac pasiam veik dom cống khut, kuac raok ka ia nyu nduac samar. Anak mata, TPHCM daok peih ngak danak dak padang ngak saong pasiam dom jalan tathuak ia piah langyah bruk dauk ia gam gam di dom jalan hu menuac sia saong radaih nao mai rilo.

Hadei di tuk ramik caik camera pasang iek jalan mbak nao mai tự động di Jalan roya 51, tỉnh Bà Rịa - Vũng Tàu daok patui veik peih bruk ramik caik camera di Jalan Roya 55, 56. Dahlau di nan, di thun 2021, tukvak 1 di dom jalan mbak thông minh, pasang iek tự động meng camera hu peih tabiak di Jalan Roya 51 saong 89 camera pasang iek dom duas suan yau ye lih tame jalan, nao suan jalan hu brei adat, padeih suan adat, oh ngak njauk tui gom tín hiệu di mangaok jalan mbak. Kayua dom jamraik pasang iek jalan mbak ini, bo dom bruk ngak suan ka bruk peih radaih biak samar saong bala di mangaok jalan mbak kayua nduac samar di mangaok jalan Roya 51 mboh trun biak rilo jang.

Phó Thủ tướng Thái Lan Somsak Thepsutin khan lac brei dui atah jang 3 bilan bruk samar drah hu ba tabiak ngak di bhum gah meraong negar ini. Tui panuac di ong Somsak, dom urang jakar ngak praong di Mintri Nội vụ hu peih bruk pasang iek piah pataom mek panuac saong hatai sahneng di bhap bini, Hội đồng An ninh taneh ia saong Pasak Hành chính dom tỉnh biên giới gah Meraong ka bruk dui atah ini. Meng thun 2007 tal ini, dom bruk taong, cuh, pametai menuac kayua kol brok tagok ngak di dom tỉnh biên giới gah meraong trun daok takik. Gah chức năng kuhria mboh lac, dalam thun ini, dom bruk nan oh tapa 100 mbang. Langiu di nan, Thái Lan brei ngak veik bruk samar drah di quận Sri Sakhon dalam tỉnh Narathiwat, labik srau kadau mboh yau daok khin tamuh veik dalam 5 thun tapa. 

Hu veik 50 triệu uranaih kumei di dunya hu kein lagaih piah nao tal sang bac meng di thun 2015. Bruk ini brei mboh bruk jhul khang bruk samu gauk di urang kumei saong urang likei dalam gah pato magru hu siam lagaih jang. Ini lac bruk brei thau di Gah pato magru, Khoa hoc saong Ilamo di Liên hợp quốc (UNESCO) ba tabiak. Taphia di nan, UNESCO patui veik jak ba dom taneh ia dalam kapul kham marat bruk samu gauk di uranaih kumei saong uranaih likei dalam gah pato magru, dalam tuk urak ini jeng daok 122 triệu uranaih kumei di dunya oh hu nao tal sang bac, abih di nyu nan lac bhum gah maraong sa mạc Sahara pak châu Phi.

Tui Mintri Y tế saong Dịch vụ Nhân sinh Mỹ, kuhria tal harei 11/10, labaih 7 triệu urang Mỹ hu klauk dom janih vaccine caga COVID-19. Dom janih vaccine di Moderna atau Pfizer-BioNTech lac pamaong tame biến thể phụ XBB.1.5 di Omicron. Ini lac biến thể praong di Mỹ dalam thun ini. Yaok triệu mbang vaccine COVID-19 karei di Novavax hu pabak ka menuac sia Mỹ dalam adit ini./.