Sang iek ruak ban Can Tho hu pok brei angan ISO

UBND huyện Cần Giờ bahrau hu harak likau UBND TPHCM samar ngak bruk haong tỉnh Tiền Giang piah ba tabiak ngak jalan phà tasik Cần Giờ nao huyện Gò Công Đông (Tiền Giang). Dahlau deih huyện Cần Giờ tok hu sa labik lac phà Bình Khánh pambuak haong huyện Nhà Bè. Hadei di nan peih veik dom jalan nao tapa Long An saong Bà Rịa - Vũng Tàu. Nan ye, huyện hu likau UBND TPHCM ngak bruk haong tỉnh Tiền Giang piah peih jalan ka 4 lac jalan phà tasik meng Cần Giờ tapa Gò Công Đông. Jalan ia ini hu peih tabiak hu daong trun trak damak ka jalan radaih, dui katut panak jalan nao mai, rik daong cak rok patagok kinh tế, du lịch ka TPHCM saong tỉnh Tiền Giang.

Sang iek ruak Phụ sản Ban Cần Thơ birau peih bruk brei thau Taduan chứng chỉ ISO 15189:2012 brei ka Khoa Dut iek darah - Di truyền học. Ini lac sa dalam 3 Sang iek ruak di karja akok meti di Cần Thơ mek hu chứng chỉ ISO 15189:2012 dalam 2 bruk: Hóa sinh saong Huyết học hu Jabat taduan lac ilamu taong yaom lagaih ka tanut chuan asar siam brei chứng chỉ. Bruk ngak tui chứng chỉ ISO ini meda rik tame paglong angan je bruk taong ruak di Sang iek ruak ba mai kein laba glong abih  dalam bruk dut iek ruak saong jru dom janih ruak Sản phụ khoa ka bhap bini di bhum taneran kraong Cuu Long.

Huyện Long Thành, tỉnh Đồng Nai bahrau ba tame pandar danak dak bilik puac tapuk saong bilik bac sap Cam di Sang magik Islam di puk 6, xã Bình Sơn. Danak dak hu 1 bilik puac tapuk saong 2 bilik bac praong labaih 170 m2. Abih tih yaom jien padang ngak lac 736 triệu đồng. Bruk pabak veik danak dak bilik puac tapuk saong bilik bac sap Cam daok hu makna praong dalam bruk khik ramik saong patagok dom yaom glaong di ilamo lac sap ndem panuac puac saong akhar vak di bangsa Cam, jeng yau dom bangsa takik di dalam tỉnh Đồng Nai.

Dalam dom harei jaik ini, urang pala thanh long di Bình Thuận daok bui sambai kayua thanh long hu yaom. Urak ini, yaom thanh long hu urang blei di bein meng yaom 15.000 đồng sa kilo tagok 25.000 đồng sa kilo. Tui rilo urang blei ye thanh long tagok yaom lac kayua bruk pablei tapa negar langiu Trung Quốc hu tani tanat, dom darak pasar di Trung Đông jeng hu blei rilo jang.

Kayua biến đổi khí hậu, dalam 4 thun tapa, di labik cồn Nhàn, xã Bảo Thuận, huyện Ba Tri, Tiền Giang, ia mbang tame ngak brei takai tasik njauk glut jaleih lahik labaih 200m taneh, rilo mblang taneh gilai tok daok gok phun saoh. Glut jaleih ngak ka rilo baoh sang lahik sang danaok. Tui ong Khổng Minh Tặng, akaok UBND xã Bảo Thuận, labik cồn Nhàn njauk glut jaleih yaok piluh thun ini mai, min bruk daong ka bhap bini jeng daok biak takik kayua kadung jien oh hu nan ye karja palei rilo meng jak ba bhap bini eng drei ngak pasiam ar pacang piah khik caga drap ar.

Dalam adit ini, dom taneh ia brei kareih pabah mbang đại sứ quán di ban ine di Haiti kayua huac bruk srau kadau di taneh ia ini. Bruk ini rah tabiak dalam tuk patuh tabiak  rilo bruk trun jalan di  Haiti, ba tal gal jalan nao mai, rilo cửa hàng saong labik pablei salih brei kareih pabah mbang kayua huac urang blah. Dahlau di nan, Thủ tướng Haiti brei thau, taneh ia ini oh daok kadung jien piah patui bruk daong yaom nhiêu liệu, gam khan lac yaom xăng saong dom janih nhiên liệu karei meda tagok jaik dua mbang dut saong dahlau.

Tui Mintri pato magru Mỹ dalam 10 thun tapa, taneh ia ini hu mboh labaih 26.000 anek saih ba phao tal sang bac. Tui pathau khan meng bang Texas, dalam thun blaoh di bang ini hu 34 bruk khin taong paoh meng phao di sang bac, tagok dut saong 7 bruk di thun bac 2019-2020. Kuhria di dalam bang Texas, dalam labaih 3 thun tapa hu 557 mbang anek saih njauk taong phat kayua ba phao tal sang bac. 

Ong Mikizo Ueda, umo thun praong abih di Nhật Bản, metai di harei 9/9 meng blaoh di ban Nara, di umo thun 112. Nhật Bản lac sa dalam dom taneh ia hu umo thun taha abih di dunya saong hu rilo ong muk taha dalam nyaom dom urang taha abih di dunya. Bilan 4 meng blaoh, muk Kane Tanaka, urang taha umo abih di dunya daok di ban Fukuoka, plang lahik di umo 119 thun./.

 Urang lang: Thu Thảo -Ái Nghiêm  - 17/9