Sang iek ruak Truyền máu huyết học cơ sở 2

Di mbang nyaom taong abih mbang ka 3, Hội đồng Bangsa brei panuac ka Harak pathau khan pasang iek “Bruk pambak tal meng parabha bhum urang bangsa takik saong bhum ceik tui ilamu patagok”, tui Sarak 861 di Thủ tướng Rajaei saong  Sarak  612 di Uỷ ban Bangsa. Peih ngak 2 Sarak angaok nan, dom xã oh daok dalam bhum urang bangsa takik saong bhum ceik, xã bhum III, saong palei biak kan kandah trun biak ralo dut saong vaktu 2016 -2020. Tapa nan ba tal bruk urang bangsa takik saong bhum ceik dahlau diah di bhum kan kandah, biak kan kandah njauk cakak trun dom sarak yau daong blei thẻ BHYT, daong iek ruak, sarak daong pato megru…Langiu di nan, kadung jien karja pakat negar daong ka dom palei jeng trun atau oh hu. Meng bruk nan, rilo urang lambaok hu panuac caong Rajaei brei hu dom jalan lang talaik kan kandah ka dom palei.

Sang iek ruak Truyền máu huyết học cơ sở 2 (labik ka 1 jalan Trần Hữu Nghiệp, xã Tân Kiên, huyện Bình Chánh-TP.HCM) hu padang ngak haong yaom jien labaih 1.000 tỉ đồng bahrau hu peih pakak. Ini lac pasak y tế praong di ban raya saong lac sang iek ruak gah huyết học dang akaok bhum gah meraong negar. Sang iek ruak hu 33 khoa/phòng/bộ phận, hu labaih 300 papan ndih iek ruak. Abih tih yaom jien padang ngak lac labaih 1.000 tỉ đồng, dalam nan hu meteh phun jien urang buh tame saong meteh phun jien hu blaoh.

Birau pagam hu 4 harei, meteh dalm labaih 100 baoh phao daong urang mblung ia di dom baoh tatua tapa kraong Hồng kayua kapol urang halain hatian di sa-ai Nguyễn Ngọc Khánh peih ngak nyu lahik nao. Dom baoh phao hu pagam di labik ini haong hatai caong khin pabak pandap ka menuac mblung ia hu sraong tagok plaih di metai. Sa-ai Khánh  caong khin yaok rahra brei paglong jalan sahaneng, meyah oh njauk bruk  khin hu, ye oh mek dom baoh phao bo kapol di sa-ai pagam di dom baoh tatua, kayua “ dom baoh phao  hu pagam di tatua yaom lac sit, min nyu daong plaih di metai ka menuac urang”.    

Dom blah rup cih tranh gạo “Wa Hồ praong uranam” di urang likei daok ranaih angan Khưu Tấn Bửu hu 7 blah ka 7 asal kadha karei di gauk, brei mboh hatai anit di Wa meng rilo bruk ngak, jalan ngak karei di gauk. Khưu Tấn Bửu ndih tapui thun 1995, lac sa dalam dom angan bhian randap di palei tranh gạo di Cần Thơ.  Khưu Tấn Bửu brei thau, tuk ngak tranh gạo ka Wa, sa-ai hu duah thau cambaih dom harak gar, thaot binguk di Wa, pilih ruah dom blah hu urang caik hatai di abih piah meda brei mboh cambaih rup binguk saong hatung hatian di Wa brei ka taneh ia, ka bhap bini Việt Nam.

Mbang camereip kuhria meng dahlau mai, điền kinh Việt Nam hu boh HC meh  “ném lao” di  SEA Games 31. Urang hu vak angan mangaok bảng meh lac Lò Thị Hoàng - VĐV bangsa Thái mai meng Sơn La. Di janih pakacah ini di gah kamei, Lò Thị Hoàng yaom lac oh hu tong yaom glong di abih  min naih gheih  mek hu boh HC meh, ngak tayah kỷ lục SEA Games ngan song jak jeng 56 m 37.

Urak ini negar Prang daok dalam tuk pandiak bhang khang, langik pandiak jang tanut kuhria rah tapa dalam 37 harei gam. Harei 18/5, dom ban praong di gah meraong negar Prang langik pandiak meng 33,4 - 33,9 độ C, dalam tuk dom labik di takai tasik gah Pai saong gah Brak pandiak jeng tagok glaong tal tanut oh ka bhian hu. Pandiak bhang di Prang ngak kan kandah trak tal urang ngak nong tuk bilan lúa mỳ di negar ini daok yam tame tukvak tamuh praong..

Mbang jit ruak khang ka 5 di labik hành chính đặc biệt Hong Kong (Trung Quốc) meda lac daok pasang iek hu, nan ye,  karja Hong Kong brei pacadu dom jalan paatah di gauk di harei 19/5. Tui nan, meng harei 19/5, dom nhà hàng hu pablei ka tuai mbang  pak di labik  tal mon 12 melam, oh daok lac mon 10 melam  yau urak ni, dom  tuia rilo abih yaok bàn jeng hu tagok meng  4 tagok tal  8 urang , dom tiệc meng  20 urang hu tagok  120 urang. Karja đặc khu jeng brei adat peih pabah mbang gilac veik  dom danao song mblang tasik.

Pasak langyah dữ liệu YouGov di negar Anh bahrau brei thau bruk pasang iek brei mboh lac, 60% uranaih taneh ia ini pahat rup pabhap oh ginup tuk tame bac veik hadei di jit praong Covid-19. Tapa nan jeng kuhria mboh dahlau lac 21 triệu urang praong di negar Anh meda lamek labaih kilo di thun 2040, samu 36% menuac sia dalam taneh ia ini./.

Urang lang: M. Phuong & Bhumi – 20/05