Piah khik ka uranaih di grauk labik dalam negar hu bui sambai raok main Tet Trung thu thun ini, Mentri LĐ -TB saong XH eiw dom tỉnh, ban brei buh jien meng kadung jien Karja; jak ba dom gah, kapol nyaom, manuac urang rik jien tame piah rivang, alin brei pandap Trung thu ka uranaih; dalam nan, sangka  tal uranaih raidiuk kan kandah, uranaih baoh sang kan kathaot, jiak kathaot, uranaih bhum urang bangsa takik, bhum atah bayah, bhum taphia negar, kaoh pulao, uranaih metui medhar saong uranaih gaok kan kandah kayua bala meng langik tasik, jit ruak.

Tỉnh Bà Rịa - Vũng Tàu oh mek jien bac di anek naih nhà trẻ, anek naih mẫu giáo, anek saih sang bac THPT di karja saong langiu karja, urang taha umo mangaok 65 thun hu daong taong abih jien blei bảo hiểm y tế. Asal kadha ini bahrau hu HĐND tỉnh Bà Rịa - Vũng Tàu mbang VII, vaktu 2021 - 2026 brei tapa. Akaok HĐND tỉnh Bà Rịa - Vũng Tàu Phạm Viết Thanh hu panuac ieu dom jabat patagok bruk ngak di drei, patui jalan ngak siam bruk di drei tui hukum piah khik kajap dom sarak saong jalan ngak kayua HĐND tỉnh patabiak hu peih ngak catang saong nao tame dalam raidiuk.

Tui Sở LĐ - TB saong XH tỉnh Sóc Trăng, meng thun 2023 mbiah tal ini, kuhria abih tih jien brei ba urang nao ngak bruk negar langiu tui harak pambuak bruk saong danak dak anek saih nao negar langiu gam bac gam ngak lac jaik 100 tỷ đồng saong labaih 500 urang hu lagaih nao ngak bruk di negar langiu hu tui tukvak ba tabiak. Tỉnh kham merat vaktu 2025 -2030, yaok thun hu labaih 1.000 - 1.500 urang ngak bruk di negar langiu. Ini lac bruk lagaih ka urang ngak hu ilamo, kham merat ngak bruk piah patagok kinh te baoh sang; tui nan, daong tỉnh Sóc Trăng hu rilo urang ngak hu bac megru ilamo glong.  

Yaom lac bruk pacang saong pasiam veik glut jaleih tapen kraong ribaong tukvak tapa hu dom pakat, dom gah saong rahra tỉnh Tiền Giang sangka, peih ngak min urak ini, bruk glut jaleih jeng daok rah tabiak. Meng puac thun 2023 tal harei ini, di dom huyện mboh hu 64 labik glut jaleih atah abih tih labaih 6,3km; yaom jien piah ngak tui kuhria lac labaih 200 tỷ đồng. Dom labik glut jaleih ini brei hu ramik ngak samar drah piah khik bein phun mbang baoh, drap ar saong plaih matai lahik ka bhap bini saong pambuak haong pacang ia sua, ia ndik dalam tukvak tal. Anak mata, Sở Ngak nong saong patagok palei pala tỉnh Tiền Giang hu panuac caong brei daong jaik 68 tỷ đồng ka dom puk palei langyah samar drah 25 labik glut jaleih praong, atah labaih 2,8km. 

Muyim tỉnh Bình Thuận birau tabiak bruk ngak Gilang peih Dom duah pataom drap ar ilamo Patao Cam huyện Bắc Bình pambuak haong bruk dulich drap ar ilamo Cam di palei”. Bruk padang ngak Gilang peih meda hu rik daong pasiam veik, khik ramik saong patagok dom ilamu siam gheih meng kan di urang bangsa Cam. Tui nan, duh ka radiuk bruk ngak mbang di bhap bini saong rik tame ngak brei cak rok bruk dulich di Bình Thuận. Bruk nan hu ngak salah blaoh meda jeng labik  rivang ma-in  siam mekre, pabak bruk duah thau ka ilamo lavik rai di urang bangsa Cam di Bình Thuận.

Mintri Y tế Hàn Quốc brei thau, dom sang iek ruak hu ngak salah blaoh bruk langyah harak likau padeih bruk di jaik 7.700 bác sĩ pasram bruk.  Mintri Y tế jeng meda ngak brei salah bruk pilih ruah saih pasram megru bahrau di bilan 8 piah trun takik di abih dom kan kandah meng bruk dom bác sĩ pasram bruk likau padeih bruk. Rajaei Hàn Quốc bahrau ini jeng hu tabiak harak brei mek veik yaok bruk taong phạt dom bác sĩ pasram bruk oh tui panuac ieu mai veik ngak bruk.

Dalam tuk daok having akaok haduh hatai duah jien pabak tame kadung jien quoc phong, Ukraine daok dang anak bruk lac tal harei puac abih lac harei 1 bilan 8 anak tal brei ginum biai haong dom po sre negar langiu meda brei klaak abih sre, meyah oh ngak yau nan Kiev meda tavak sre. Labaih 23 tỷ USD lac bruk praong dalam mbang ginum biai nan, meblah 15% kuhria abih jien sre bo rajaei Ukraine brei bayar.

Tổng thống Mỹ Joe Biden tabiak panuac lac brei klaak 1,2 tỷ USD sraiy di SV brei ka 35.000 urang, patagok dom menuac hu klaak sraiy tui danak dak di karja Mỹ tagok tal 4 triệu 760 rabau menuac. Bruk klaak sraiy ka SV hu Tổng thống Biden ba tabika di thun 2022 haong yaom jien tui kuhria lac 430 tỷ USD. Tui nan, rajaei brei klaak sraiy tal 20.000 USD ka dom menuac hu yaom jien mek tame mala 125.000 USD sa thun./.