Tui nan, jien bac đại học thun bac 2023-2024 ngan haong dom sang bac di karja oh ka padang eng oh tagok, meng 12-24,5 trieu đồng sa thun, kuhria tui gah bac. Daok dom labik pato mam non, pato megru pho thong di karja oh ka eng drei khik hu bruk cai pandar gam gam, jien bac thun bac 2022 -2023: meng 540.000 - 650.000 đồng sa bilan  ngan haong labik thành thị ; meng 220.000 - 330.000 đồng sa bilan, ngan haong bhum palei, meng 110.000 tal 220.000 đồng sa bilan ngan haong bhum urang bangsa takik saong bhum ceik. Daok labik pato megru tự chủ, jien bac glong abih sumu 2 mbang  meteh.

Di tỉnh Đồng Nai, bruk Urang nong pakacah gauk ngak mbang, pablei salih joi, jum pataom daong gauk ngak kaya mada saong patrun kan kathaot khang kajap oh padeih cak rok patagok, hu prein pambak tabiak dalam rilo gah. Tui kuhria yaok thun hu labaih 95 ribau baoh sang urang nong tut angan tame, dalam nan hu labaih 54 ribau baoh sang mek hu angan baoh sang ngak mbang, pablei salih joi dom pakat. Bruk pachreih ba urang nong patagok dom yaom glaong Ilamo meng kan jumpataom gauk, anit ranam gauk, daong ka dom baoh sang kan kathaot yam tagok ngak mbang tabiak truh kan kathaot meng rilo jalan daong ka phun jien, pajaih, daong harei ngak bruk.

Meng akok thun mbiah tal ini, Trà Vinh hu labaih 32.000 baoh sang raong palao  hadang, ariang tasik  haong gauk di danao praong 23.000 ha. Meng yaom ariang pablei glong, urang nong raong ariang tasik mek hu jien laba tame meng 100 -150 trieu dong/ha/ thun. Arieng tasik nan lac janih kaya dalam ia mbuan raong, lagaih haong alam langik tasik, takik ruak, raong iek oh cang hu ilamu glong, pajiah hu  ralo, takik abih jien, hu darak pasar tani tanat.

Tukvak ini, dom mblang padai Thu Đông 2023 di urang nong pak Cần Thơ bahrau hu 30 - 40 harei min hu urang blei mai caik jien takai ngan haong yaom glaong. Tui kuhria mboh di urang nong, mayah langik lagaih, ye năng suất padai meda mek hu meng 700 - 800 kg/công. Mayah padai pablei hu yaom 7.000 đồng/kg, kaoh abih phun jien labaih 17 - 18 triệu đồng/ha ye urang nong meda laba hu labaih 30 - 40 triệu đồng/ha. Tui amuk Phạm Thị Minh Hiếu, Akaok Chi cục Pala drak saong khik caga phun pala Cần Thơ, yaom padai glaong nan ye hu urang blei mai caik jien takai blei padai, min mikva biak caik hatai, bahrau hu labaih 10 - 15% urang nong taduan mek jien takai blei padai meng urang blei.

Hajan hangin dom harei tapa ngak ka labaih 1.000 ha padai He thu jaik yuak di mikva ngak padai di Bạc Liêu jaleih, dauk dalam ia, ngak khat lahik jeng yau kan yuak. Hajan daok ngak ka labaih 31.000 ha padai Hè Thu drak hadei daok chroh nerang  dauk dalam ia.  Hamu padai  khat lahik trak  ralo meng lac padai tathak; padai daok chroh nerang oh ka ralo. Gah ngvak nong tỉnh daok kham merat pambuak haong dom bhum palei  jeng yau  mikva  urang ngak nong pasiam veik bruk khut khat, jhuk pasamar  bruk yauk kuak, patrun patakik khat lahik di bhap bini.

Nyaom biai pakat glaong abih di dom urang pan akaok negar Mỹ, Nhật Bản saong Hàn Quốc hu peih tabiak di puac bilan ini meda taong yaom “bruk salih jalan ngak”. Javap jaloi panuac tangi sua di báo chí, urang lambaok negar Mỹ di Nhật Bản Rahm Emanuel, brei thau lac, bruk patagok talei pambuak gauk di klau gah tapa nyaom biai pakat glaong mbang ini “meda lac sa dalam dom bruk chính trị, pambuak gauk hu makna praong abih saong brei mboh bruk salih jalan ngak dalam bhum”. Gam tui di nan meda taong yaom “bruk peih mbaok ka mbang nyaom biai yaok thun di klau urang pan akaok”.

Meng bilan 8 ini, janih bóng gom sợi đốt, tabiak pandiak kayua urang khoa học Thomas Edison ngak tabiak di thun 1879, meda brei pakauk pablei di Mỹ. Ini lac bruk mai meng sa tukvak padang hukum dui tah 16 thun. Mentri Năng lượng Mỹ ndem cambaic laic, dom ilamu druac hadah birau, dalam nan hu gom LED, pabak hadah  ka yaok sang, yau nan ye oh pandar gom sợi đốt tra. Mentri nan kuhria mboh, hukum pakauk gom tabiak pandiak brei patak pataom ka urang pandar di negar Mỹ yaok thun labaih 3 tỷ USD.

Tổng thống Palestin hu panuac chỉ trích Israen daok peih ngak dom bruk kateik greik urang Palestin saong ieu menuac sia dunya ngak khang piah Israen padeih dom bruk ngak ini. Tổng thống Palestin brei thau lac, Israen daok padang ngak dom labik định cư, taong tame urang Palestin saong ngak tayah bruk chính trị hu padang ngak di dua gah. Ong caong khin menuac sia dunya pachreih tui bruk Palestin jeng taneh ia ginup abih di Liên Hợp quốc saong pok brei angan kanja Palestin độc lập./.