Jabat ngak bruk di Po Ine Negar birau peih bruk ginum biai haong gah mbao chi  brei thau ka sarak brei tabiak guk dahlau tukvak thun 2025 di Po Ine Negar. Tui nan, bruk brei tabiak guk dahlau tukvak ka urang daok guk hu tukvak ba tabiak, guk luac rai hu peih ngak tuk pahadar 50 thun harei Peih paha gah Meraong negar, yasa taneh ia ( 30/4/2025). Meng dom Sarak  brei tabiak guk dahlau tukvak di Po Ine Negar, meng thun 2009 mbiah tal ini yaok pluh ribau urang uan tabuan tuk taduan hu bruk ma-ah, piah hu gilac veik haong baoh sang di drei, piah gilac veik raidiuk siam mekre. Nan lac bruk ngak hu makna biak praong anit ka urang karei di sarak peih brei tabiak guk, mboh di meta ka bruk brei patagok adat di anek manuac.

So Jalan mbak kong chanh birau pok tagok UB bhap bini Ban raya HCM likau brei ngak tui Sarak ka 188 di Quoc hoi ka bruk ngak iek dom jalan, sarak đặc thù karei piah cakrok patagok jalan pasei  do thi  di Ban raya HCM. Tui nan Danak dak Metro  ka 2 Bến Thành - Tham Lương jaik hu padang ngak di puac thun ini salih ka thun 2026 yau bruk ba tabiak dahlau diah. Metro ka 2 nao tapa 6 quận: 1, 3, 10, 12, Tân Bình, Tân Phú. Jalan pasei do thi ka 2 atah labaih 11 km, hu 9 labik padeih ala taneh, 1 labik padeih  di angaok, sa depot.

Tui jalan sahaneng “ Ba tangin daong ka urang kathaot – oh thei daok veik gah likuh”, tukvak tapa, huyen Thuận Bắc, tỉnh Ninh Thuận tuk hlei jeng sangka peih ngak hu siam dom danak dak jak ba prein rahra daong padang ngak sang daok, daong dom baoh sang kathaot tani tanat raidiuk. Urak ini, dalam huyen daok 356 baoh sang daok kurang sang daok. Piah kham merat ngak salah abih baoh sang oh daok taik tahak, huyen pataom tame pathau khan, jak ba dom gah chinh tri - xa hoi saong bhap bini kham merat daong gauk padang sang ka urang kathaot, jaik kathaot tui rilo jalan ngak.  

Tapa pasang iek, dalam tinh An Giang hu labaih 4.900 po sang khin daong hu sang daok, kuhria abih tih jien buh tame ngak danak dak abaih 301 ti dong. Mbiah tal ini, tinh jak ba hu 139 ti dong saong ba tabiak 8 sang ngak iek  piah daong ka rahra.  An Giang  hu padang ngak 773 baoh sang, dalam nan hu 360 baoh sang  hu ngak salah saong ba tame daok. Danak dak pataom tame daong urang ngak bruk cach mang, baoh sang kathaot, jaik kathaot saong dom urang dalam sarak ngak abih sang taik tahak. 

Tinh Tiền Giang brei pala njam patam di taneh praong abih di Bhum taneran kraong Cuu Long. Urak ini, yaom njam patam trun biar abih, urang khat lahik. Di bhum taneh Gò Công dom janih njam cải sabei, akaok cải patih yaom meng 2.000 tal 3.000 dong sa kilo, yaom nan po bein khat lahik trak. Dom urang ngak nong pablei oh abih njam patam njauk brei buac klak piah pala njam birau caong khin pablei hu yaom glong jang. Yaok thun, urang nong tinh Tien Giang daok pala njam di taneh praong labaih 50 ribau ha, pablei ka darak pasar  Ban raya HCM saong dom tinh bhum Dong Nam bo.  

Tong thong My Donald Trump mbaoh harak hukum patagok dua mbang jien je pabak ka pandap Trung Quốc, meng 10% tagok 20%. Sarak nan ndem lac Trung Quoc  oh ngak tui dom bruk piah pacang caga pajeng ba dom janih jru ngak nyil ghien tame My suan hukum. Yau nan ye,  tagok jien je ngan haong pandap Trung Quoc  meda tagok meng 10% tagok 20%.

Campuchia taong tayak pasak pachot pagat, chap mek labaih 200 urang negar langiu. Ralo abih lac urang negar Thai Lan, tui nan tal Pakistan, Ấn Độ, Đài Loan (Trung Quốc) saong Indonesia daok kandauk saong pachot pagat online kayua sa urang Trung Quốc padang tabiak. Ini lac bruk ngak birau abih dalam bruk duah mek dom pasak pachot pagat  online di Campuchia. Yaom lac Rajaei Campuchia ngak bruk catang min bruk pachot pagat online  daok ngak sraw kadau, haduh hatai di taneh ia ini.

Mạng Rayo papar binguk ABC brei thau tapa yaok kuhria mboh flim Anora mek hu jak jeng siam mekre di 5 kadha dang akaok di var jao brei yai Oscar 2025, labaih 18 trieu  mbang urang di Mỹ tui iek bruk nan di Hollywood. Kapol urang ngak flim  Anora hadah mbaok meta di Oscar 2025 tuk taduan hu 5 angan yai thuong  hu makna praong abih di mbang alin yai, nan lac: Flim gheih abih, urang cih vak kadha flim naih joi abih, Urang kumei dalam flim naih joi abih, Kadha cih vak gheih abih saong Padang ngak tabiak flim gheih abih. Ini lac sa bruk mek hu jak jeng praong abih kayua flim hu sa labik ngak tabiak eng drei saong tok abih jien 6 trieu USD./.