Akaok Quốc hội Vương Đình Huệ bahrau lambaok ka Uỷ ban Thường vụ Quốc hội mbaoh tangin tame ba tabiak Sarak ka bruk padang ngak ban Tân Uyên di tỉnh Bình Dương. Sarak hu brei padang ngak ban Tân Uyên di mangaok mblang taneh praong abih tih jaik 192 km2 saong rahra lac 466.053 urang di ban Tân Uyên. Kayua yau nan ye, tỉnh Bình Dương hu 9 đơn vị hành chính pakat huyện, lac 4 huyện, 1 ban sit saong 4 ban; 91 đơn vị hành chính pakat xã, hu 41 xã, 45 phường saong 5 ban sit.

Page ini 23/2, Mban khik iek Danak dak padang ngak hạ tầng đô thị TPHCM hu peih ngak Danak dak hạ tầng saong pasiam hacih ribong kraong Tham Lương - Bến Cát - rạch Nước Lên (pambuak tỉnh Long An tapa krong Chợ Đệm saong tỉnh Bình Dương, tỉnh Đồng Nai tapa kraong Sài Gòn).  Bruk pamong tal di danak dak  brei pathuak ia hajan, klak ia dauk ka taneh praong 14.900 ha di labik taneh padang danak dak saong dom labik  karei hu pambuak tal; pasiam đô thị saong ngak brei hacih labik danak dak, peih praong laneng lanoi jalan mbak gah Bắc Nam ban raya…        

Piah palagaih ka rahra cak rok patagok kinh tế, pablei salih, harei ini (23/2), UBND huyện An Minh, tỉnh Kiên Giang hu peih bruk padang ngak tatua ka 11 tapa ribaong Tân Bằng - Cán Gáo. Danak dak atah 1,76 km,  abih tih yaom jien buh tame di danak dak lac 200 tỷ đồng. Bruk padang ngak tatua tapa ribaong Tân Bằng - Cán Gáo lac danak dak hu makna praong, khik bruk pambuak bhum U Minh Thượng saong jalan tapen tasik nao tal tỉnh Cà Mau, ngak jeng jalan pambuak gah Timun haong dom huyện bhum U Minh Thượng, gah Pai pambuak haong  jalan tapen tasik nao trun tỉnh Cà Mau.

Kuhria tal tukvak ini, yaom kruac sành  di dom tỉnh Vĩnh Long, Hậu Giang daok tagok hasit yaom blei di bein meng 7.000 - 8.000 đồng/kg, hu janih tagok tal 10.000 đồng sa kilo. Yaom kruac sành hu tagok kayua urang di TPHCM, Cần Thơ…blei daong po bein. Yaom ini, urang ngak nong chreih chrai kayua hu laba. Urak ini, rilo urang ngak nong  brei pambuak bruk haong urang blei kruac. Mbiah tal puac thun 2022, dalam tỉnh Vĩnh Long hu labaih 17.000 ha pala kruac sành, tagok jaik 3.000 ha dut saong thun 2020.       

Jabat Cảnh sát pasang iek Công an ban Biên Hòa, tỉnh Đồng Nai bahrau ba tabiak piah kaoh tui hukum bruk ngak suan adat ka peih gilai di mangaok jalan ia dalam bruk gilai tableik di kraong Đồng Nai ngak ka sa urang metai. Dahlau di nan, di maong 8, 50 minit harei 5/2, gilai pajeng tuai kayua Nguyễn Trường Chinh daok di ban Biên Hòa peih gilai, pajeng tui 12 urang mai meng paha Phước Long, di Cù Lao Ba tapa TP. HCM. Tuk gilai bahrau tabiak truh pabah lamnge ye ginuh tame sà lan pajeng container nao meng gah ala tagok Cảng Đồng Nai jao pandap. Tapa nan ngak ka gilai tableik trun, 12 urang daok angaok gilai laik trun kraong. Dalam nan, urang njauk bala lac Nguyễn Thị Hương (umo 32 thun), daok matain 3 bilan metai kayua blung ia.

Gah Y te Dunya daok pambak tame tukvak padeih dom jalan taong phạt  tame Syria piah pajeng ba pandap panda y te njuak brei hu tal taneh ia ini. Tui kuhria mboh di WHO, 7 sang iek ruak saong 145 labik y tế  di Syria khut tayak, ralo dalam dom labik nan lac di bhum Tây Bắc Syria. Urak ini, WHO brei blei mac jamaraih saong jru tavao gam pambuak hong dom gah di LHQ piah taduan hu dalam tuk lagaih yau ini. Yau nan min, piah ba mbuan lagaih ka bruk daong kayua bala megei taneh, Mỹ brei atah klak dom jalan taong phạt.         

Bruk sarau kadhau di Ukraine ngak khat lahik ka kinh te dunya labaih 1.600 tỷ USD, gam tui di nan jeng ngak ka yaom năng lượng tagok samar ba tal lạm phát di dunya tagok khang saong ngak trun prein blei di urang blei. Roh duah di Viện Kinh tế Đức Cologne kuhria mboh dahlau lac abih tih khat lahik kayua bruk mesuh di Ukraine ngan haong gah kinh tế di dunya dalam thun 2023 meda bier jang hasit dut saong thun 2022, sa binah lac kayua darak pasa năng lượng saong kaya pandap di dunya takik catang jang. Min, dom taneh ia daok cak rok patagok dalam thun ini meda njauk kan kandah jang thun dahlau.

Harei ini 23/2, bhap bini Nhật Bản hu adat brei tame mblang bein di Văng patao daok di Tokio piah  tadhau yuh harei ndih tapui mbang ka 63  di Nhật Hoàng Naruhito . Tui kuhria, Patao Naruhito saong diuk di patao lac Hoàng hậu Ma-sa-kô gam haong dom urang karei di hoang toc meda dang angaok maligei di Văng patao piah salam uan labaih 4 ribau 800 bhap bini  hu palih ruah tame. Bruk nan lac biak takik hu peih ngak piah bhap bini mboh mbaok Patao tapak saong hoang toc./.