Mintri Lao động Thương binh saong Xã hội bahrau ngak salah Dự thảo likau panuac di dom mintri, dom gah ka bruk padang ngak Sarak ramik veik jien bilan, daong bảo hiểm xã hội saong daong yaok bilan. Tui nan, mintri hu ba tabiak panuac likau tagok 12,5%  jien bilan padeih hưu, jien daong bảo hiểm xã hội saong jien daong yaok bilan; tagok 20,8% ka dom urang ka oh ka hu ramik veik dalam thun 2022. Taphia di nan, Mintri jeng hu panuac ieu ramik veik ngan haong urang hu mbang tui meng dahlau di thun 1995 hu  jien bilan padeih hưu, jien daong yaok bilan mala 3.000.000 đồng sa urang sa bilan. Tui kuhria, bruk ramik veik ini meda hu peih ngak meng harei 1/7/2023.

Ban Tuyên giáo Tỉnh ủy Bình Thuận brei thau, hadei di labaih 1 bilan ngak tui tacei pato ka 06 di mBan Thường vụ Tỉnh ủy ka mbang sinh hoạt chính trị ngan saong kadha “Khik panuac sanya di urang đảng” dalam Đảng bộ, tal urak ini, dalam tỉnh hu 69 chi bộ cơ sở saong chi bộ dalam Đảng ủy cơ sở hu peih bruk ngak njauk tui tukvak tut angan. Min rilo chi bộ hu dom kan kandah, tavak tavaiy. Yau ye jalan peih bruk sinh hoạt, dom chi bộ cơ sở daok having akaok haong jalan peih ngak bruk pathau khan eng drei pasang iek, eng drei pasiam veik di urang đảng dalam sinh hoạt chi bộ. mBan Tuyên giáo Tỉnh uỷ Bình Thuận samar tacei pato piah ka dom tổ chức đảng peih ngak hu siam jang.

Daok dalam danak dak pahadar 113 thun harei dunya urang kumei (3/8/1910 - 3/8/2023) saong 1983 thun bruk dang tagok di Hai Bà Trưng kayua Kapul Liên hiệp urang kumei TP.HCM peih tabiak, harei 5/3 jaik 3.000 rahra di TP.HCM hu cuh aw tah rilo sambo mau, hu mbaok tame bruk diễu hành vil val jalan Nguyễn Huệ. Bruk ngak ini piah pok mayaom dom siam gheih di aw tah dalam raidiuk tapa dom janih aw tah di manuac hu mbaok tame, dalam nan hu aw tah meng kan saong aw tah bahrau, aw atah ka urang likei saong atah ka urang kumei.

Urang ngak nong di tỉnh Trà Vinh daok tame bilan kaoh tabau bilan pala thun 2022-2023. Yaom tabau thun ini tgaok 150 đồng/kg duk haong bilan pala thun dahlau, yaok ha hu 95 tấn, tui nan, urang pala tabau hu laba meng 30-40 triệu đồng/ha. Dom thun dahlau, bhum pala tabau di Trà Cú hu pala tani tanat labaih 4.000 ha, samu 80% taneh pala tabau dalam tỉnh. Ini lac bru ngak meng kan, bhian ba jien tame tani tanat ka labaih 5.000 sang, rilo meng lac urang bangsa Khmer di tỉnh. Min rilo thun khat lahik trak ngak ka taneh bhum pala tabau gam gam trun.

Tui Jabat kuhria mboh dahlau bruk langik tasik bhum Nam bộ, bilan pandiak di gah meraong thun 2023 mai tal aval jang saong tamat suai, pandiak bhang dui atah jang dut saong yaok thun. Dom harei pandiak dalam dom bilan pandiak jeng glaong jang rilo thun. Pandiak rahtabiak rilo mbang di Đông Nam bộ saong bhum tapen negar Tây Nam dalam bilan 3 ngan haong tanut glaong di abih tui kuhria di rilo thun, glaong abih meng 35 - 38oC. Tui kuhria dalam bilan 4, pandiak bhang saong nhiet do tagok glaong jeng daok rahtabiak di rilo labik, di Bình Phước, Đồng Nai, Bình Dương nhiệt độ glaong abih tagok tal 39oC.

Mintri Y tế Thái Lan brei thau, taneh ia ini hu buh tabiak abih tih 444 tỷ baht (12,8 tỷ USD) brei ka y tế karja dalam 3 thun rah tabiak jit praong COVID-19, brei ka dom jalan ngak piah pacang jit ruak saong klauk jru ka  bhap bini. Thái Lan lac taneh ia camereip abih langiu Trung Quốc brei thau lac hu menuac njauk COVID-19. Taneh ia ini ngak hu bruk pacang cakak virus njom mbak dalam tukvak camereip haong bruk pacang veik dalam negar saong kreik pabah mbang negar, dahlau di tuk bruk njaom mbak dalam taneh ia tamuh tabiak khang dalam mbang tamuh dom biến thể Delta haong Omicron.

Akaok Mintri Nội vụ di 5 taneh ia di Liên minh châu Âu (EU) Địa Trung Hải hu Malta, Hy Lạp, Italia, Tây Ban Nha saong Cộng hòa Síp bahrau ieu EU jumpataom gaukjang ka bruk di cư saong hu dom kham marat jang piah pacang caga bruk di cu suan hukum. Mbang nyaom hu peih tabiak dom harei hadei di bala karam gilai di tasik Italia ngak ka takik di nyu 64 urang di cu metai. Akaok mintri 5 taneh ia njauk gauk lac brei peih dom bruk ngak haong gauk di pakat châu Âu piah langyah dom makna ba tal bruk di cu saong pacang caga bruk di cu suan hukum.

Tổng thống Nam Phi meda brei thau dom salih bahrau gah jabat hành pháp taneh ia tuk mon 7 melam ini, tui mon Việt Nam. Urak ini bruk ramik veik jabat hành pháp negar daok hu taneh ia ini samar ngak pasiam, dom urang dalam quốc hội meda tuyên thệ nhậm chức dahlau di tuk brei thau bruk salih bharau.  Dahlau di nan, Tổng thống Nam Phi tabiak panuac lac meda pilih ruah pok ngak Akaok Mintri điện lực bahrau dalam tuk bruk srau kadau điện di taneh ia dak harei dak trak damak, haong dom mbnag cakak cắt điện gam gam rah tabiak./.