Di mbanhg nyaom ka 18 di UB Thường vụ Quốc hội peih tabiak biar harei 15/12, ong Chu Mạnh Sinh, Pho Tong yam ndoc BHXH brei thau dalam vaktu 2016 -2021 dalam negar hu labaih 4 trieu mbang urang hu brei mek jien BHXH sa mbang. Urang mek jien thun hadei glong jang thun dahlau, kuhria rah tapa tagok labaih 11,6%. Kayua dom sarak taduan mbang tui BHXH sa mbang hu ba mbuan lagaih ka urang ngak. Gam haong nan, kayua gaok kandah di jit ruak labaih 2 thun tapa ngak brei raidiuk di bhap bini, urang ngak gaok rilo kan kandah.

Dom bruk ngak piah pahadar 60 thun Harei jayah Ấp Bắc hu peih tabiak ngak di labik inem mek jayah Ấp Bắc (ban sit Cai Lậy, tỉnh Tiền Giang) di harei 31/12 tal. Dom bruk ngak ini hu mbaok di labaih 500 urang lambaok ka menuac daok dalam saong langiu tỉnh; dalam nan hu bruk padang ngak brei mboh veik sajarah, hadar veik mbang taong khang di 60 thun dahlau. Tui bruk ini, Tỉnh ủy Tiền Giang hu pambuk bruk haong mBan Tuyên giáo Trung ương, Bộ Quốc phòng brei peih Nyaom biai pakat Bộ Quốc phòng pahadar 60 thun Jayah Ấp Bắc (2/1/1963 – 2/1/2023) ngan saong kadha “Jayah Ấp Bắc - yaom glaong, makna saong kadha sajarah dalam bruk mesruh pacang Mỹ, daong taneh ia”.

Piah rik tame ngak brei pambak praong bruk bui sambai, chreih chrai, uan raok thun birau 2023, UB bhap bini Ban raya HCM hu payua sarak samar chip tal Mentri Ilamu, The thaoi saong Dulich likau brei peih bruk  cuh phao bingu tuk Tết Dương lịch 2023. Tui nan phao bingu cuh tagok glong di labik akaok lubang tapa kraong Sài Gòn, Ban Thủ Đức saong cuh tagok biar di Bein bingu ilamu Đầm Sen, Quận 11. Tuk vak cuh  phao bingu lac meng 12 tuk tal 12 tuk 15 minit kreih melam 1/1/2023. Jien brei cuh phao bingu nan meng manuac sia rik tame.

Kapul pasang iek di Ban Cần Thơ daok peih pasang iek bruk khik piah pandap panda, bruk hu mbaok tame khik tani tanat yaom kaom di dom doanh nghiệp daok dalamk ban di tuk Tết thun sak tapai 2023. Bruk ngak ini piah daong ka urang blei plaih njauk pandap ja, pandap oh siam, oh hacih sa-at saong bleik saleik dalam pablei salih, rik daong tani tanat darak pasar, khik caga kein laba di urang blei. Tal harei ini, hu 17 doanh nghiệp tut angan tame pablei pandap khik tani tanat yaom kaom di tuk Tết haong yaom pandap abih tih lac labaih 2.236 tỷ đồng.

 Nyaom pataom Kaya mbang menyum Bình Dương mbang ka 4 thun 2022 peih ngak di melam 15/12 di Bein bingu Thủ Dầu Một. Nyaom pataom hu 60 labik parang pandap, pataom yaok rituh pandap mbang bingi di Bình Dương saong dom tỉnh ĐNB, Tây Nam bộ. Langiu di nan, nyaom pataom daok hu dom labik parang pandap OCOP saong pandap palei ngak meng kan di Bình Dương. Tapa ini hu yaih khan, pambak praong thaot  binguk  Bình Dương saong jeng lac mblang ma-in biak lagaih puac thun ka bhap  bini, urang ngak. 

Dom menuac njauk COVID-19 di Mỹ tagok rilo hadei di mbang padeih Lễ Phục sinh saong mboh lac daok tagok dalam mbang padeih puac thun. Piah pacang palaih sa mbang tamuh COVID-19 khang bahrau dalam bilan brak thun ini, Mỹ hu ba tabiak jalan ngak cambaih laih, dalam nan hu pabak pandap dut iek saong klauk vắc-xin brei saoh ka bhap bini, saong daok caga pandap panda, menuac ngak piah piah pacang tuk hu bruk samar drah. Rajaei Mỹ urak ini daok hu panuac ieu karja dom tiểu bang pachreih bhap bini nao klauk pabak vắc-xin bahrau ba tame, piah meda pacang veik haong dom biến thể di Omicron.

Mentri Y tế Anh ndom lac Rajaei oh hu jalan ngak siam lagaih halei piah pabak bruk ndok tagok jien bilan di dom y tá dalam tuk dom y tá taneh ia Anh, xứ Wales saong Bắc Ireland padeih ngak. Tui langyah, meyah tagok jien bilan 19% tui caong khin di Công đoàn gah y tá (RCN), Rajaei meda brei duah mesre jien bayar saong tagok jien je atau brei cakak trun dom dich vu. Bruk kan kandah jien pandar cai tagok glong daok kateik tagok  trak dak harei dak praong tagok Rajaei Anh tuk công đoàn rilo gah ba  tabiak bruk tagok jien bilan.  

Gilang pariak trung ương châu Âu (ECB) brei tagok yaom jien jhung mbang ka 4 gam gam, yaom tagok mbang ini biar jang dua mbang dahlau saong tui kuhria meda daok tagok. Taphia bruk brei tagok yaom jien jhung, Gilang pariak trung ương châu Âu jeng brei thau, bruk khik piah trái phiếu meda trun meneing meng bilan 3/2023. Hadei meng bruk nan di Gilang pariak trung ương châu Âu, dom tanut chứng khoán di châu Âu daok lahik điểm, dalam tuk jien ơ-rô tagok yaom duk haong bảng Anh saong jien Yên Japon./.