So Bangsa saong Agama tinh Kien Giang bahrau peih mbang nyaom biai ka bruk pato hukum saong pathau khan ka mikva bangsa takik thun 2025. Hu mbaok tame mbang nyaom biai hu jaik 300 akaok puk palei, halau janeing, urang ngak bruk agama, urang hu angan je saong rahra daok di bhum bangsa takik. Di mbang nyaom biai, So Bangsa saong Agama Kien Giang yaih khan 3 asal kadha: Hukum Drap ar ia; Hukum Taneh riya; Hukum Kapul hu mbaok tame pacang khik an ninh, siam mekre di labik; pathau khan, jak ba mikva bangsa takik hu mbaok tame pacang khik alam; ngak tui jalan di Ndang, sarak, hukum di Karja; chreih chrai hu mbaok tame khik an ninh, siam mekre salamat labik.

UB bhap bini tinh Quang Nam birau hu sarak padang Labik khik ramik alam Cù Lao Chàm, tui nan peih praong bruk khik glai alam sinh thái di dom kaoh pulao. Labik khik ramik  glai praong hu 23.530 hecta, dalAm nan parabha klau labik nan lac: Khik caga tani tanat, Pasiam veik glai alam saong jitvu ngak bruk di karja, gam labik glai jaik taphia di xã pulao Tân Hiệp, TP Hội An. Langiu di kein laba siam ka alam dunya, Cù Lao Chàm daok lac pasak pataom ilamo - sajarah, gam haong ilamo Sa Huỳnh, Champa, Đại Việt gam haong dom inem mek brei mboh bruk ngak mbang pablei salih haong dom taneh ia dalam bhum.

Pato pakai bruk ngak ka urang ngak bruk palei pala, abih di nyu nan lac urang mikva bangsa takik hu huyen Di Linh, tinh Lam Dong brei mboh lac sa dalam dom takai yam hu makna dalam bruk trun kathaot. Thun blaoh, huyen Di Linh hu peih 20 tal bac bruk ngak haong labaih 500 urang bac megru hu mbaok tame, rilo meng lac urang bac megru mikva bangsa takik. Dom bruk ngak hu caik dahlau pato pakai dalam nan hu sangka mbaok meta, ngak bangi ia menyum, tahanek mbang; pasiam jamraik ngak nong, pasiam radaih patuh; pak pandap; sangka phun pala, athur raong,…Thun 2025, huyen Di Linh ba tabiak jalan ngak pato pakai ka labaih 7.000 urang ngak bruk, kuhria abih tih urang hu bac pasram bruk ngak tagok labaih 80%.

150 anek saih bangsa takik di Sang bac THCS Bangsa gam bac gam daok huyen Chư Pah, tinh Gia Lai birau hu mbaok tame Danak dak dut iek prein yawa dalam rup. Di Danak dak,  dom adei anek saih hu kapol urang y, bac si dut iek rup glong, teik trak, taong yaom chi so BMI; Pasang iek huyet ap, dut iek megei di baoh hatai, dut iek pandiak dalam rup; Iek ruak dalam rup yau: Jalan suan yawa, jalan hatung pruac, tim mach, jalan rak than kinh; iek ruak meta; tagei-lin - mbaok; tangi - idung- tarakong; Dut iek kuhria abih tih saong tacei pato jru ruak. Danak dak piah pasang iek prein yawa ka anek saih, samar thau ka dom bruk piah jru ruak.   

Ban raya Ho Chi Minh peih bruk pilih ruah 50 danak dak praong, brei mboh jalan 50 thun patagok di ban raya, pamaong tal pahadar 50 thun Harei peih paha gah Meraong negar, yasa taneh ia (30/4/1975 - 30/4/2025). Tukvak pilih ruah meng harei 21/3 tal 31/3 piah iek praong dom bruk jak jeng naih gheih, rik daong tame bruk patagok di Ban raya Ho Chi Minh saong taong abih dalam taneh ia. Dom danak dak hu pilih ruah dui atah meng harei Sai Gon hu peih paha, tal tuk ban raya hu mek angan Chu tich Ho Chi Minh piah tah angan, tal dom mbang tagok samar di kinh te, bruk ngak kong saong bruk patagok karei di ban raya tal ini.

Nyaom darak pasar nghe thuat London Original Print Fair lac nyaom darak pasar  hu meng lavik rai abih di ban ine negar Anh birau hu peih ngak. Thun ini, nyaom darak pasar pahadar 40 padang ngak hu dom kadha meng kan klak tal jaman  birau, hu mbaok di labaih 40 labik in saong labik patabiak tapuk. Nyaom darak pasar  meng kan lavik  hu ba mai ka urang takre mong iek saong blei dom baoh tapuk nan yaom gap mbiah. Dalam 40 thun tapa,  dom baoh tapuk  hu di grauk labik di dunya hu yaih khan di ini.

Campuchia bahrau pilih ruah urang danei angan gah ndien anh An Do Gagan Malik ngak đại sứ thiện chí yulit, dalam kham merat piah dui pachreih tuai yulit An Do tal jirah rivang taneh ia Baha Bimong. Bruk ini hu Akaok mentri Yulit Campuchia Huot Hak ba tabiak hadei mbang taom gaok meng kreh adit ini di Phnom Penh haong dien vien Gagan Malik. Akaok mentri Yulit Campuchia brei mboh hatai cang maong dien vien Gagan Malik angaok labik đại sứ thiện chí yulit brei hu rilo bruk rik dong jang dalam bruk jhul tagok thaik thaot taneh ia Campuchia nao tal dunya, abih di nyu nan lac meng darak pasar An Do. (VOV)

Philippines lac taneh ia  daok gaok langik pandiak ralo dhi 3 di chau A, tuk pandiak tagok oh yau bhian, kuhria rah tapa pandiak 0,6 do C dut saong pandiak kuhria rah tapa dom thun dahlau diah. Bruk nan brei mboh bruk langik salih karei daok ngak pandiak tagok  glong di dunya, ngak jak tal prein yawa, bruk ngak kinh te saong he sinh thai. Dom urang roh duah kakei dahlau, langik pandiak meda dak harei dak trak jang, meyah daok cuh menyek hoa thach./.