Harei ini (3/6), Mbang nyaom ka 20 di Mban pato tacei pakat negar ka bruk pacang caga jit Covid-19 ginum biai online haong dom tỉnh, ban. Tui kuhria di mbang ginum biai ini, urang hu ginum biai, taong yaom saong pamaong tal bruk pathau khan abih jit Coivd-19 di Việt Nam. Dahlau di nan, bahrau ini Thủ tướng Phạm Minh Chính hu pato tacei Mintri Y tế caga dahlau harak gar ba Covid-19 meng ruak njom mbak nyaom A tapa nyaom B saong pamaong tal bruk pathau khan abih jit di Việt Nam. Meng ilamo di anak mata, rah tapa dom mbang pacang caga jit ruak, dom urang QH di gah y tế brei thau lac: Việt Nam meda sahanang hatai piah pathau khan abih jit Covid-19, kayua hu ginup dom bruk.

Piah caga dom bruk ka nyu siam di abih piah taduan raok rilo tuai mai tal Kiên Giang dalam tuk hè ini, Sở Du lịch tỉnh Kiên Giang ieu dom puk palei patagok bruk pasang iek yaom kaom dịch vụ du lịch, hacih sa-at salamat pandap mbang huak, khik kajap bruk niêm yết yaom,  mbang menyum, labik ndih daok, pajeng ba, pablei salih..... Abih di nyu lac pasang iek bruk kurang harak kapal cao tốc di dom labik khu du lịch di dom xã pulao tame gah, tame baoh taneh. Dom kapal, radaih pajeng tuai brei khik kajap salamat, hu tut angan ngak mbang taduan raok tuai damuai.

Yaom lac bahrau akaok bilan pandiak min di dom mblang tasik, labik ma-in, labik padeih padai, resort di Bình Thuận, tuai damuai hu biak rilo. Hadei di tuk brei radaih peih nduac jalan cao tốc Dầu Giây-Phan Thiết, bruk nao mai meng Ban raya Hồ Chí Minh tal Phan Thiết  hu katut panak veik daok labaih 2 maong. Kayua yau nan ye, dom tuai mai tal Bình Thuận hu tagok biak rilo dut saong dahlau deih. Kapul Du lịch Bình Thuận tui kuhria lac dalam bilan du lịch Hè 2023, dom tuai meda tagok 50-60%. Dom doanh nghiệp ngak mbang gah du lịch hu bruk caga dahlau ka labik daok, abih janih.

Harei Phật đản thun 2567 tui Phật lịch saong bruk pahadar 60 thun harei Bồ tát Thích Quảng Đức kayua agama am cuh rup bahrau hu peih tabiak ngak di mblang bein Bồ tát Thích Quảng Đức, TP. Hồ Chí Minh. 60 thun dahlau, dalah apui am cuh rup eng di Bồ tát Thích Quảng Đức hu pahadah jalan sahneng ka menuac sia dunya, pamedeih tagok hatai anit ka menuac sia, ranam ka sron mbon, hòa bình, rik daong tame bruk peih paha gah meraong negar, yasa taneh ia. Trung ương Giáo hội Phật giáo Việt Nam ieu dom chư tôn giáo phẩm, đại đức, tăng ni, phật tử , kham merat yam tapa bruk mahu hawa di rup drei, rik prein daong dak padang taneh ia, duh ka menuac sia, siam ka dunya, mekre ka agama.

Công an huyện Thống Nhất, tỉnh Đồng Nai bahrau mek panuac pathau khan ngan haong 2 diuk pasang pan akaok jalan ma-in hụi tagok tal yaok piluh ty dong bahrau brei thau lac pacah hui ngak ka yaok ratuh urang mai pathau khan haong công an. Tui nan, po hui lac diuk pasang Trần Quốc Huy (umo 36 thun) daok di phường Bảo Vinh,  ban Long Khánh hu pataom taong abih tih paok jien hui lac labaih 80 tỷ đồng meng di thun 2018 tal bilan 5/2023. Dom urang kak jien hui lac labaih 500 urang. Kayua hu dom urang masaiy jien piah ngak mbang, nduac saiy nan ye diuk pasang Huy njauk mek drap ar, sang danaok, taneh riya nao padang mek jien biyar ka jien hui. Kayua oh duah hu jien lac njauk tavak saiy gam phun jien gam jien laba nan ye Huy khan lac pacah saiy. Urak ini Công an huyện Thống Nhất daok patui veik ngak bruk haong dom urang hu pambuak tal piah ngak cambaih laih bruk ini.

Meng bruk oh hu bruk ngak di dam dara daok di tanut glaong di abih, bruk di dam dara urang ranaih umo thun di Trung Quốc daok jeng bruk trak damak yaom lac bac glaong, naih gheih tal halei. Dalam bilan 4 meng blaoh, dom dam dara oh hu bruk ngak di Trung Quốc lac glaong di abih, tal labaih 21% urang umo meng 16 – 24 thun oh duah hu bruk ngak. Njauk biai nan lac, jaik 12 triệu sinh viên bac tamat di bilan 6 ini, daok dang anak bruk meriak gauk khang dalam duah bruk ngak. Dahlau di nan, di bilan 4, Bắc Kinh hu ba tabiak rilo sarak piah pachreih darak pasar bruk ngak, dalam nan hu bruk daong ka dom cty pah cử nhân oh hu bruk ngak.

Meng akaok thun tal urak ini, labaih 10.000 baoh sang di Campuchia njauk tayah kayua bala di langik tasik ngak ka 6 urang metai saong 99 urang karei njauk rambuac. Abih di nyu nan lac, dalam taneh ia hu rahtabiak 60 mbang cakla klaak,, ngak ka 31 urang metai, 29 urang njauk rambuac. Tui Ủy ban langyah bala pakat negar, Campuchia bahrau yam tame bilan hajan min dom mbang hangin khang gam haong tala daok ngak kan kandah tal raidiuk saong ngak jhak tal anek manuac di pak ini. Kayua yau nan ye Ủy ban ini hu panuac ieu kanja paglaong bruk pambuak gauk saong pato pakai rahra piah ngak trun manieng dom bala di langik tasik,  rik daong patrun khat lahik ka rahra.

Viện Ceik pui saong Địa chấn học (IVS) di Philippines khan lac mbuan hu dom mbang pruh di ceik pui Bulusan ngak ka rilo hơi ia par tagok di gah Đông Nam pulao Luzon. Jabat ini mboh hu 18 mbang megei baoh taneh dalam saong jaik labik ceik pui meng mesup 31/5. IVS hu panuac kakei bhap bini njauk daok atah labik mbuan hu bala dalam bán kính 4 km, saong khan lac mbuan hu sa mbang pruh di ceik pui, jaleih haluk, patau jaik dom labik pruh tabiak khí di mangaok ceik gah Đông - Đông Nam.