Pambuak gauk peih ngak dom danak dak di jalan Vành đai 4 TP.HCM

Sở Jalan mbak pajeng ba TP.HCM bahrau hu harak samar drah payua tal UBND TP.HCM ka bruk pambuak gauk peih ngak dom danak di jalan Vành đai 4 TP.HCM. Dalam nan hu likau UBND ban raya pasang iek brei tapa jalan pambuak gauk peih ngak dom danak dak di jalan Vành đai 4 TP.HCM. Gam tui di nan jeng peih mbang nyaom biai haong Mintri Jalan mbak pajeng ba, UBND các tỉnh Bà Rịa – Vũng Tàu, Đồng Nai, Bình Dương saong Long An njauk gauk dom asal kadha hu makna praong, kuhria pamaong tal piah pasang iek dom jalan buh jien tame ngak gam gam di abih tih gah jalan saong mbaoh tangin tame jalan ngak pambuak gauk peih ngak dom danak dak di jalan Vành đai 4 ban raya HCM.

Bruk taong cap kaya ikan di Kiên Giang daok dang anak rilo kan kandah kayua labik taong cap kaya ikan dak harei dak takik, yaom xăng menyek tagok saong urang nao tasik, abih di nyu lac urang gheih bruk ngak angaok kapal gilai jeng daok kurang biak rilo. Dalam tỉnh urak ini hu labaih 9.800 kapal ikan atah meng 6 mét tagok. Meyah yaok kapal brei hu 10 urang ngak ye Kiên Giang caong hu meng 100 rabau tal 200 rabau urang ngak, urang nao tasik. Bruk caong hu urang ngak angaok tasik biak praong min kayua taong cap oh hu laba, nan ye rilo urang ngak salih tapa dom bruk ngak karei, tui nan, dom po kapal biak kan kandah dalam bruk duah urang ngak.

Urang nong pala njam patam di tỉnh Trà Vinh biak uan tabuan, chreih chrai kayua dom janih njam patam ini tagok glaong, daong ka urang nong hu jien mek tame rilo. Urak ini, yaom dom janih njam patam tagok meng 10.000 – 30.000 đồng/kg dut saong bilan 8. Tui pasang iek di Chi Cục Pala drak saong khik caga phun pala, dalam 3 thun jaik di ini, rilo urang nong salih mblang taneh pala padai di mbuan glaong, tabau salih tapa pala njam patam yau ye njam mek hala, tamun, baoh ploi, baoh traong nde, ritak dom janih… ini lac dom janih njam buh jien tame takik, tukvak paih katut, pala hu rilo mbang dalam thun, brei jien mek tame yaok harei.

Jaik 1 adit ini mai, ia ndik tagok glaong ngak brei dauk jalan di dom tỉnh ban dalam bhum ĐBSCL. Ia tagok sa harei dua mbang di tuk saboh mesup haong biar harei sup. Tuk ia tagok nyu ngak brei dauk jalan, padai, njam patam bein phun mbang baoh saong nduac tame sang bhap bini. Trak abih lac di tỉnh Vĩnh Long, TP Cần Thơ saong tỉnh Hậu Giang. Sa labik jalan roya 1 nao tapa tỉnh Vĩnh Long jeng njauk ia dauk. Urak ini dom puk palei daok yaok pataom khat lahik di padai, njam patam saong sang danaok piah hu jalan daong ka bhap bini, gam haong nan, peih ngak dom jalan pacang caga piah patrun patakik khat lahik kayua ia tagok.

Meng sa baoh sang gaok kan kandah, kayua  kham marat ngak mbang, tal urak ini saai Đào Văn Pháp, lac urang dalam kapul urang nong di puk 4 xã Bình Hòa Hưng, huyện Đức Huệ (tỉnh Long An) halain hatain ngak harak  likau tabiak truh angan sang kan kathaot meng hu bruk pala phun rau má.  Thun 2020, saai Pháp  salih meng phun padai takik kein laba tapa pala phun Rau Má. Thun camriep, pala 0,8 ha rau má, hadei di tuk paih hu 4 mbang kaoh abih yaom jien buh tame, saai daok laba 250 triệu đồng. Oh lac tari tareng ngak mbang, yaok thun saai Pháp daok daong ba bruk ngak ka 30 urang ngak di pak ini.

Yaom blei pandar di Mỹ dalam bilan 9 tagok glaong jang duk haong kuhria mboh dahlau saong lạm phát daok tagok glaong dalam bilan ka 2 gam gam. Ini lac bilan ka 2 gam gam Mỹ mboh lac lạm phát tagok glaong, lac bruk daok di tanut glaong abih kuhria dalam 40 thun tapa. Yaom kaom tagok samar meda ngak brei Cục dự trữ liên bang brei tagok yaom jien laba cơ bản, lac bruk meda ngak brei kinh tế Mỹ trun atau laik tame suy thoái.

Tui kuhria mboh di dom urang ilamo, meda hu labaih 5 trieu 3 rituh trieu dalam 16 tỷ baoh phone par tangin di dunya meda njauk klaak nao atau oh daok pandar dalam thun ini. Mayah dak  tagok gauk, dom baoh phone par tangin oh daok pandar ini meda glaong labaih 50.000 km, glaong jang 100 mbang dut saong bilai vũ trụ dunya. Jaik abih dom baoh phone ini oh hu ba nao ngak gilac, ngak jhak tal prein yava  saong alam môi trường.  

Dom urang ilamu di Scotland hu ngak tabiak sa baoh muot bảo hiểm pandar trí tuệ nhân tạo (AI) piah daong ka lin padam pui duah saong daong ka urang gaok bala hu samar. Kapul roh duah brei thau, baoh muot gam khik salamat ka lin padam pui, gam daong ka urang maong mboh dalam sauk pui, maong mboh dalam sup palup, padang bản đồ môi trường vil val saong daong duah tabiak jalan daong urang gaok bala hu samar jang./.

Urang lang: Thu Thao & M. Phuong – 15/10