Vành đai 3 TP.HCM atah abih tih 76,34 km

Di Nyaom biai ba tabiak jalan peih ngak danak dak padang ngak jalan Vành đai 3 song bruk kuhria caga danak dak jalan Vành đai 4 TP.HCM rah tabiak di puac adit bloh, Sở Jalan mbak pajeng ba TPHCM brei thau, tui kuhria Vành đai 3 TP.HCM hu peih ngak meng bilan 6/2023, samar jang meteh thun dut song bruk batabiak. Vành đai 3 TP.HCM atah abih tih 76,34 km. Labik akaok di danak dak lac labik taom gaok jalan nduac samar Bến Lức - Long Thành (di huyện Nhơn Trạch, tỉnh Đồng Nai), labik puac lac labik taom gaok jalan nduac samar Bến Lức - Long Thành ( tỉnh Long An). Abih tih phun jien buh tame ngak di danak dak lac 75.378 tỷ đồng. Danak dak hu Quốc hội brei tapa sarak buh jien tame ngak di harei 16/6.

Dalam 6 bilan akaok thun 2022, abih tih yaom jien pablei salih pandap panda nao mai haong Campuchia di dom DN Tây Ninh hu labaih 835 triệu USD, meblah 36,16% abih tih yaom jien pablei salih pandap panda tapa dom pabah mbang negar…Dom janih pandap pablei tapa negar langiu rilo meng lac xi măng, kat bei plom, tapung ikan, haleik dom janih, pandap mbang ka menuk, ka pabui, hoá chất, menyek mbang… daok pandap blei tame meng negar langiu rilo meng lac củ mì that, kayau phun pa-ok blait kaoh blaoh, cao su tamo, tabau…

Di Cần Thơ, bilan padai Hè Thu thun ni, urang nong trun pajaih labaih 73 ribau ha, mek hu 102% bruk batabiak, dalam nan, bruk pandar jamriak dalam tam drak meblah labaih 90% mblang taneh. Kayua tam drak samu gauk di mangaok dom mblang hamu, nan ye, jeng hu yuak samu gauk di rilo labik. Padai yuak hu jiak 5,7 tấn/sa ha, glong jang dut song tuk vak ini thun dahlau. Urang nong daok caong lac anak tal, yaom padai hu tagok, piah pabak ka yaom jien buh tabiak ngak tagok glaong yau urak ni.  

Melam bloh, jaik 100 urang lac Cảnh sát caga khuah, padam khuah saong daong duah urang gaok bala, gam haong dom kapul nyaom pak di labik, kham merat luac melam piah duah sa-ai Lý A Dia, ndih tapui thun 1997, daok di bản Long Dạo, xã Si Pa Phìn – lac urang njauk ia sua ba theik tame hầm thủy điện di xã Si Pa Phìn, huyện Nậm Pồ, tỉnh Điện Biên. 3 jamriak njuk ia praong peih luac melam, min kayua hầm thủy điện dalam labaih 270m nan ye tal mesup 4/7 kapul daong duah urang njauk bala bahrau tame hu jaik 60m kuhria meng pabah mbang hầm.

Tui ong Lê Hoàng Phong, phaok yam ndok Công ty TNHH khik ramik song pablei salih drak pasa prong kaya nong Hóc Môn- TP.HCM, dom harei ni, njam patam boh karaoh mai pasa hu labaih 1ribau 700 tấn/sa melam, tok trun 5% dut song akaok bilan 6. Bruk pabak dom pandap panda ni mai pasa prong trun oh rilo, min, yaom njam patam boh karaoh tagok glong, kayua yaom xang menyek tagok, gam song langik tasik oh lagaih , hajan rilo. Urak ni, njam mbang hala tagok meng 14%-25% dut song akaok bilan 6, yaom boh karaoh tagok meng 10-15%.

Jit Covid-19 daok tamuh veik di rilo taneh ia mangaok dunya, dom menuac njaom bahrau tagok rilo. Dua biến thể phụ di Omicron lac BA.4 saong BA.5 daok jeng biến thể ngak brei njaom mbak samar tal having akaok saong meblah tal 55% dom menuac njauk ruak Covid-19 di dunya.

Rilo labik di bang New South Wales, Australia, abih di nyu nan lac bhum Tây Bắc, hu gam ban Sydney dok dang anak bruk ia sua ia dauk trak tuk hajan dalam 7 harei tapa di dom labik tagok tal 400 mm , ngak ka dom baoh krong song rilo danao dauk dalam ia, dalam nan hu danao ia pandar prong abih di Australia lac Warragamba , njauk brei tathuak ia dalam harei kabroi. Urakni, bol bala hu ba 100 urang lin tal bang New South Wales song tui kuhria 100 lin tra daok hu ba mai tal dalam tuk vak anak tal , piah dong ka bang pacang cakak song ia sua.

Harei kabroi (3/7), rilo labik di 1 baoh kraong ia patau angaok ceik Marmolada dalam talei ceik Alps di Italia nyu glut jaleih, di tuk langik pandiak glaong di abih. Takik di nyu 6 urang metai. Urak ini oh ka thau cambaih hadom menuac njauk bala. Tui karja pak nan, mbang pandiak khang akaok bilan hè di Italia ngak brei nhiệt độ mangaok ceik Marmolada, lac baoh ceik glaong labaih 3.300 mét, tagok tal 10 độ C, glaong jang rilo duk haong dom thun dahlau, ngak brei tuyết jaleih./.

Urang lang: Hani Pha & M. Phương – 04/07