Sở Pato Megru ban raya HCM hu panuac ieu dom sang bac oh ka mek jien bac thun bac 2022-2023

Ngak bruk saong tỉnh Bạc Liêu ka “Bruk peih ngak sarak, hukum ka pacang caga uranaih  mblung ia” ong Tạ Văn Hạ - Phaok akaok UB Ilamu - Pato megru di QH eiw Bạc Liêu langyah dom bruk ba tal bala piah hu jalan pacang caga uranaih mblung ia hu siam lagaih abih; pakhang bruk pathau khan, caik hatai iek praong bruk pato caluai, ilamu daong urang tuk mblung ia; ngak siam jang bruk pasang iek, khik iek, bruk peih ngak sarak, hukum ka pacang caga blung ia uranaih; sangka bruk brei manuac, pandap panda piah pacang caga bala uranaih mblung ia.

Ndom ka dom janih jien akaok thun di dom labik pato pakai, Sở Pato Megru ban raya HCM hu panuac ieu dom sang bac oh ka mek jien bac thun bac 2022-2023, cang tacei pato di UB bhap bini ban raya HCM. Gam haong nan, jeng hu panuac ieu dom labik pato pakai dalam ban raya khik tamo taong abih dom asal kadha saong yaom jien duh ka bruk pato pakai di dom labik pato pakai di karja hu peih ngak dalam thun bac 2021-2022, daok brei pandar ka thun bac 2022-2023.

Tatua Xẻo Vẹt, tapa krong Vàm Ngan Dừa (kraong Cái Trầu) pambuak 2 tỉnh Bạc Liêu saong Hậu Giang birau hu ba tame pandar. Tatua atah jaik 950 m, brei pajeng trak 10 tấn, jalan tame tatua Xẻo Vẹt hu ngak abih tih labaih 77 tỷ đồng. Ini lac danak dak hu makna praong, ba mbuan lagaih ka bruk nao mai, pajeng ba pandap panda ngak mbang di dom bhum taphia gauk, rik tame jhul pakhang cak rok patagok kinh tế - xã hội di dua huyện Hồng Dân saong Long Mỹ jeng yau 2 tỉnh Bạc Liêu – Hậu Giang.

Di mbang nyaom ka 9 di HĐ bhap bini tỉnh Bình Thuận peih tabiak di harei kabroi (23/8) hu brei tapa sarak daong 2,8 tỷ đồng ka 4 đơn vị sự nghiệp công lập gaok kan kandah kayua jit covid-19. Nan lac miuyim tỉnh, Sang daoh tamia Biển Xanh, Pasak ilamu tỉnh haong mBan Khik ramik du lịch Bình Thuận. Dalam thun 2021, kayua jit COVID-19 nan ye dom đơn vị sự nghiệp công lập dalam tỉnh Bình Thuận trun khang jien mek tame , oh ginup biyar jien bilan saong jien ngak bruk.

Meng biar harei sup kabroi 23/8, Pasak brei thau megei baoh taneh sóng thần, Viện Vật lý địa cầu hu tabiak harak brei thau ka 7 mbang megei baoh taneh rah tabiak di huyện Kon Plông, tỉnh Kon Tum. Dom mbang megei baoh taneh rah tabiak dalam labaih 4 mong, mbang megei khang di abih lac 4.7 độ richte ngan haong labik dalam labaih 8.2km. Bala meng langik tasik pakat 1. Dom mbang megei baoh taneh gam gam, njauk tuk padang ia khik piah di binek Thủy điện Thượng Kon Tum ngak brei rilo urang ilamu iek nan lac sa dalam dom bruk ba tal dom mbang megei baoh taneh nan.

Campuchia brei thau ka bruk padang Viện roh duah dunya saong sarak di sang bac Đại học Hoàng gia Phnom Penh, dalam nan hu khoa Việt Nam học. Bruk padang khoa Việt Nam học lac piah padang jalan jhul patagok talei pambuak bruk di Campuchia haong Việt Nam. Thủ tướng Campuchia Hun Sen ndom lac, bruk padang khoa sap Việt di Đại học Hoàng gia Phnom Penh hu ba mai kein laba ka Campuchia.

Mỹ brei thau sa paoh jien daong an ninh birau yaom 3 tỷ đôla ka Ukraina. Ini lac paok jien daong praong abih di Mỹ brei ka Ukraina meng tuk Nga peih bruk mesruh metak đặc biệt di labik ini 6 bilan dahlau. Dalam sa bruk pambuak tal, Đại sứ quán Mỹ di Kyiv brei thau dahlau ka bruk Nga meda peih rilo mbang taong tame Ukraina dalam dom harei anak tal. Kayua yau nan ye, Đại sứ quán Mỹ kakei bhap bini Mỹ tabiak truh Ukraine meng dom jalan salamat.

Sa jit cúm oh ka bhian mboh hu angan ieu lac “cúm cà chua” daok hu mboh di Ấn Độ tuk dunya daok pacang caga jit COVID-19 saong virus ba tal ruak đậu mùa khỉ. Urang njauk ruak cúm cà chua camereip abih hu mboh di Ấn Độ harei 6.5 saong mbiah tal harei ini nyu njaom mbak ka 82 uranaih. Angan di jit cúm oh ka thau tal ini hu ieu lac cúm cà chua kayua dom inem sambo màu bhong meriah angaok kalik di dom urang ruak. Urang ruak njaom janih virus bahrau ini, mboh rup pandiak saong pandik talang. Dom chuyên gia y tế brei thau, cúm cà chua urak ini oh ka hu jru taong ruak./.

 Urang lang: M. Phuong & Bhumi – 24/08