Sa dalam dom labik hadah di danak dak S.O.S Food lac bruk pambuak khang kajap haong dom kapol nyaom praong ngak tabiak pandap ralo. Dom doanh nghiep nan hu pachreih ba ngak tabiak dom janih pandap mbang samar saong dom janih pandap meda khik piah hu suai lavik saong mbuan pajeng ba dalam tuk kan kandah, bala meng langik tasik, saong brei khik hu  pandap hacih, salamat.

Huyện Lai Vung, tỉnh Đồng Tháp bahrau hu Thủ tướng pok angan lac mek hu chuẩn palei pala bahrau. Dalam tuk peih ngak danak dak padang ngak palei pala bahrau, huyen ieu pataom hu pok jien labaih 18.500 tỷ đồng. Tal urak ini, mbaok mata palei pala Lai Vung hu rilo salih bahrau, cakrok biak khang, jien mek tame kuhria tui akaok menuac hu jaik 64 triệu đồng sa urang sa thun. Huyện Lai Vung hu rilo menuac thau tal lac pasak di quýt hồng haong labaih 1.000ha. Huyện hu palei ngak ghe Bà Đài, palei ngak meng kan ngak nem Lai Vung hu pok brei angan Inem krung oh mboh di mata pakat negar.

Tukvak tapa, dom pakat Kapol Urang kumei tỉnh Hậu Giang hu daong raong 386 uranaih metui kayua COVID-19, uranaih metui amaik, metui amaik kayua dom makna karei. Meng puac thun 2021 mbiah tal ini, Danak dak “ Amaik raong” di tỉnh Hậu Giang hu daong brei jien mbaok, alin brei 575 paoak jien bac, labaih 1.900 paok pandap hu kaya mbang, pandap bac ta-a…ka dom adei metui, kuhria tui yaom jien abih tih lac labaih 3,3 tỷ đồng.  

Sở Lao động - Thương binh saong Xã hội TP. Cần Thơ pambuak bruk haong Thành đoàn saong Huyện ủy, UB bhap bini huyện Phong Điền bahrau peih ngak bruk salam uan Trung thu ngan saong kadha “Baoh gom truac hadah hatai caong” brei ka uranaih huyện Phong Điền. Ini lac bruk ngak hu makna siam, peih mbaok ka dom bruk ngak  iek glang uranaih ban Can Tho, abih di nyu lac uranaih sang kan kandah, uranaih di dom huyện langiu thành hu raok Tết Trung thu dalam bui samai, chreih chrai.

UB bhap bini Ban Vũng Tàu, tỉnh Bà Rịa - Vũng Tàu khan lac brei padeih taong abih dom bruk ngak Adat Nghinh Ông Thắng Tam, tui kuhria hu peih ngak meng harei 14/9 tal harei 20/9. Ngan haong Mban khik iek Danaok kalan Po Thắng Tam, oh peih ngak dom bruk daoh tamia bui sambai dalam tuk ini bo tok brei cuh gilau saong ngak adat da-a yang. Dom doanh nghiep dulich di tỉnh, brei roh duah  saong ramik pasiam jalan peih ngak dom bruk pambuak tal dulich ka lagaih; oh peih ngak dom bruk ilamo van nghe, ma-in sambai hu ralo bhap bini tame.

Piah patrun patakik khat lahik saong patagok prein pacang bala meng langik tasik, khí hậu oh siam, Philippines daok kham merat ba công nghệ trí tuệ nhân tạo (AI) tame bruk tui iek, kuhria mboh dahlau bruk langik tasik. Tui akaok mintri Ilamu saong Kong nghe Philippines, meng bruk pandar AI, meda pabak tal bhap bini dom  khau tin thời tiết 15 minit sa mbang, oh daok lac 3 tuk 1 khau tin yau dahlau. Tukvak kuhria mboh dahlau bruk hajan jeng hu dui atah jang, meng 5 harei tagok tal 14 harei. Langiu di nan, bruk kuhria mboh dahlau thời tiết pandar công nghệ AI daok meda hu pandar dalam bruk ngak nong, salamat pajeng ba jalan tasik, patagok hạ tầng saong yu lit. 

Jabat Daong brei saong bruk ngak ka urang tị nạn Palestine di Cận Đông di Liên Hợp Quốc brei thau, kuhria tal abih harei 11/9, hu jaik 530.000 uranaih di Dải Gaza hu klauk jru vaccine pacang ruak bại liệt. Ini lac sa ruak njom mbak kayua virut bại liệt, ralo meng ba ruak ka uranaih umo 5 thun. Ruak meda ba tal pran khang atau metai dom urang ruak trak. Tuk oh ka hu jalan taong ruak, klauk jru pacang ruak bại liệt nan lac jalan pacang caga ruak hu siam saong patak pataom di abih.

Rajaei Đức brei kreik pabah mbang sa pasak Islam daok di bang Brandenburg hadei di tuk cảnh sát pasang iek pasak ini saong baoh sang di dom urang medil lac hu dom bruk ngak cagar veik bhap bini. Mintri Nội vụ Đức, ndom lac pasak ini hu pambuak tal  Kapul adei sa-ai Muslim. Hadei di bruk ini, rajaei Đức brei thau dom jalan an ninh bahrau piah pacang chủ nghĩa cực đoan saong dom wang huan dalam hukum tị nạn, saong brei ngak catang dom adat gah phao ndao./.