Dalam nan, yaok urang brei taduan sa paok pandap di Akok negar. Meyah hu urang lac dua gah tagok ginup taduan mbang tui 2 pandap alin ye taduan sa paok min brei glong abih, meyah njauk mbang tui sumu gauk sa paoak pandap ye brei alin sa paok. Mentri LĐTBXH kakei, pandap alin di Akok negar  ngan haong urang dalam sarak karja hu brei meng jien. Bruk alin pandap ka urang hu buh prein tame ngak bruk ka taneh ia brei pambuak ngak siam bruk nao rivang saong pachreih ba di dom jabat, kapol nyaom, dom gah di bhum palei tal yaok urang nan.

Dalam mbang tangi sua saong javap jalei di mbang nyaom ka 14, HĐND tỉnh Bà Rịa- Vũng Tàu mbang VII, vaktu 2021-2026, rilo urang lambaok mboh lac, bruk salih số di gah du lịch tỉnh ka oh samu gauk, daok parai rai di dom gah pambuak tal. Ong Phạm Viết Thanh, Bí thư tỉnh uỷ, Chủ tịch HĐND tỉnh Bà Rịa- Vũng Tàu  caong lac urang pan akaok dom sở ngành njauk duah thau, bac megru ilamu tinh ban karei, thei ngak hagait siam ye bac megru, khin siam ye brei nao bac.

Tui yaok pataom di dom bhum palei, mbiah tal harei 31/5/2023, bruk peih brei phun jien Danak dak pakat negar patagok KT-XH di bhum urang bangsa takik saong bhum ceik hu jao brei  ka dom bhum palei tukvak 2021-2023 birau mek hu jaik 7.900 tỷ đồng, sumu 18,54%. Ini lac bruk ngak hu takik, oh pabak sumu bruk ba tabiak, abih di nyu nan lac di dom bhum urang bangsa takik daok rilo kan kandah gah jalan mbak cơ sở hạ tầng.

Thun bac 2023 - 2024, TP.HCM kuhria mboh lac tagok jang labaih 35.000 anek saih duk haong thun bac dahlau. Kayua yau nan ye, ban raya brei pilih ruah pabak tame 4.700 gru pato dom pakat. TP.HCM jeng kuhria ba tame pandar 672 bilik bac bahrau  hu ngak haong yaom jien labaih 1.503 tỷ đồng. Urak ini, dom quận, huyện di TP.HCM daok hu rilo sang bac hu labaih 45 anek saih dalam sa tal bac, ngak kan kandah tal bruk khik ramik saong bruk pato pakai, ka oh pabak hu bruk ba tabiak di danak dak pato pakai phổ thông 2018.

 Page ini 14/7, UB bhap bini huyen Bắc Bình, tỉnh Bình Thuận tacei ba UBND dom xã, ban sit jak ba urang jakar di labik gam haong  bhap bini hu sang, hu danak dak karei njauk par tabung sang brei ramik pasiam veik hadei di hajan praong, hangin gaving  piah samar tani tanat raidiuk bhap bini. Dahlau di nan, biar harei 13/7, di dom xã  dalam huyện Bắc Bình hu hajan khang, kakla klak ralo labik. Hajan khang, kakla klak ngak metai sa urang saong 33 baoh sang di bhap bini saong khut sa var raong , kuhria jien khat lahik labaih 1 tỷ đồng.

 Hadei di bruk ndom biai nao mai dui atah 6 mon di mbang nyaom dalam harei 13/7, Quốc hội Thái Lan hu buh phiếu pilih ruah Thủ tướng bahrau. Ong Pita Limjaroenrat, urang dang akaok đảng Tiến bước lac urang duy nhất hu ba tabiak piah pilih ruah, min oh mek hu ginup 376 phiếu piah hu pok ngak, ong tok mek hu 324 phiếu pachreih tui. Min urang pan akaok Đảng Tiến bước khan lac oh klaak bruk caong jeng Thủ tướng ka 30 di Thái Lan.

Rajaei  Đức mbang akok meti brei tapa brukpraong  peih ngak suai lavik ngan saong Trung Quoc. Dalam bruk nan, Ngoại trưởng Đức Annalena Baerbock lac Đức oh brei kalak Trung Quoc tabiak, min  tui nan caong khin brei hu rilo darak pasar pablei salih saong chuỗi pabak pandap piah pakhang bruk pasiam veik di drei. Jalan sahaneng di bruk nan ngan haong Trung Quoc di rajaei Đức lac trun takik khat lahik dalam bruk ngak mbang kinh tế, takik pambak tame Trung Quoc, min oh brei tayah talei pambuak bruk haong gah pablei salih praong abih ini di Đức.  

Rilo taneh ia di bhum Nam Âu daok hu pandiak biak khang, dalam tuk dom gah chuyên môn tabiak panuac lac langik pandiak meda tagok jang, tal tanut glaong di abih di bhum ini dalam adt tal. Tui sa roh duah ka kan kandah di langik pandiak bilan hè hu dom jabat chuyên môn peih ngak dalam adit ini, jaik 61.000 urang metai dalam dom mbang sóng nhiệt oh siam di châu Âu di bilan hè thun blaoh. Tapa nan caik ka dom rajaei saong dom po pandar urang ngak, brei ngak rilo jalan khik caga urang ngak langiu langik dalam mbang pandiak khang yau pui am cuh ini./.