Tacei pato pasang iek urang ruak Covid-19  di sang birau abih di Mentri Y tế ba tabiak 3 janih jru bo F0 taong ruak di sang juai menyum tui hatai drei tuk oh ka hu bác sĩ tacei brei pandar, nan lac: jru pacang virus, jru kháng sinh saong jru kháng viêm. Tui tacei pato ini, Mentri Y tế tacei tabiak cambaih jru taong ruak di sang hu dom janih jru yau ini: Jru trun ladam pandiak: paracetamol asar 500mg ka urang umo praong, brei ginup menyum meng 3  tal 5 harei. Jru Paracetamol ka uranaih (tui umo thun saong tui teik trak): paok tapung atau cốm lai ia menyum atau asar jru 80mg, 100mg, 150mg atau 250mg, 325mg, 500mg, brei ginup menyum meng 3 tal 5 harei.

UBND huyện Long Thành bahrau jao brei gilac labaih 300ha taneh ka  Tổng Cty Cảng hàng không Việt Nam (ACV), tui nan, dom mblang taneh hu jao piah padang ngak mbalng kapal haoh dunya Long Thành mbang ka 1 lac labaih 1.600ha dalam abih tih 1.810ha.  Dahlau di nan, Tổng Cty Cảng hàng không Việt Nam (ACV) hu harak ieu UBND tỉnh Đồng Nai jao brei 525ha dalam labik padang ngak mblang kapal haoh saong 502,1ha dalam labik taneh piah caga dalam bilan 3-2022 piah peih bruk duah palai bom mìn saong jao brei ka gah liên doanh nhà thầu padang ngak, njauk tukvak tui tacei pato di Thủ tướng rajaei.

Jabat Cảnh sát pasang iek Mentri Công an pambuak saong Viện kiểm sát bhap bini pakat glong abih saong dom jabat chức năng tỉnh Bình Thuận hu pasang iek tapak danak lih tame tasik, ramik veik labik daok di bhap bini saong pasiam veik đô thị phường Đức Long, TP.Phan Thiết (dự án Hamubay). Danak dak Hamubay kayua Công ty Trường Phúc Hải ngak po padang ngak, hu taneh praong labaih 1.228.452 m², dalam nan jaik 270.000 m² taneh mbaok ia tapen tasik, daok veik lac taneh di dom baoh sang bhap bini, urang, kapol nyaom karei daok pandar. Tui Jabat Cảnh sát pasang iek Mentri Công an, ini lac sa dalam 9 danak dak bo đơn vị hu taduan harak, pasang iek langyah bruk ngak suan dom bruk ba tabiak di hukum khik iek, pandar drap ar Karja ngak khat lahik, palai pajua di Bình Thuận.

Sang bac tiểu học Phan Đình Phùng, quận 3 (TPHCM) bahrau peih pakak “Bếp ăn mẫu bán trú” daok dalam danak dak “var mbang di sang bac” duh ka labaih 1.600 pok mbang di dom adei anek saih. Ini lac labik tanek huak  ka 2 di danak dak daok di TPHCM, hadei di labik tahnek huak di sang bac tiểu học Trưng Trắc, quận 11, TPHCM. Danak dak “var mbang di sang bac” hu padang ngak haong yaom jien abih tih labaih 3 tỷ đồng, dalam nan, Tổng Lãnh sự quán Nhật Bản di TPHCM daong praong haong yaom jien 1 tỷ 690 triệu đồng meng danak dak daong brei oh bayar veik di rajaei Nhật Bản. Lac gah ba tabiak danak dak var mbang di sang bac, Cty Ajinomoto Việt Nam iek gah bruk ba jalan, pato pakai menuac ngak hu pambuak tal bruk ging gaok tanek huak tui njauk chuẩn labik tanek huak sa gah, khik kajap siam mekre salamat pandap mbang huak.

UB bhap bini quận Hoàn Kiếm (Hà Nội)  birau brei thau bruk brei peih ngak veik  dom labik nao tabak dalam quận meng harei paguh 18/3/2022 di labik nao tabak vin danao ia Hoàn Kiếm saong jaik nan; jalan nao tabak, labik pablei salih, dịch vụ Hàng Đào tal Hàng Giấy; mblang nao tabak peih praong tal Labik khik ramik pakat I - Khu phố yao klak Hà Nội; mblang nao tabak gah Meraong  khu phố yao klak Hà Nội pambuak haong gah Barak mblang nao tabak labik danao ia Hoàn Kiếm saong jaik nan. Tui nan, tukvak peih brei nao tabak  di labik danao ia Hoàn Kiếm saong labik jaik nan meng 19tuk harei Suk tal 24 tuk harei Adit yaok adit. Dom labik nao kabak daok veik  ye tukvak  brei nao kabak meng 19 tuk tal 24 tuk dalam 3 harei puac adit.

Gah Y tế Thế giới (WHO) yaok pataom dom urang njaom Covid-19 di angaok dunya harei kabroi yam tapa 460 triệu urang saong dom menuac metai yam tapa 6 triệu 050 urang, gam haong nan, hu panuac brei thau lac dom urang njaom bahrau di dunya daok tagok khang, abih di nyu lac di bhum châu Á. WHO hu panuac ieu dom taneh ia samar peih praong danak dak klauk jru pabak saong caik hatai sahneng kuhria dom jalan taoh klaak dom bruk pacang caga jit.

Yaom lac panuac kakei dahlau bruk riyak sóng thần hu taoh klaak dalam mbang megei baoh taneh khang 7,4 độ rich-te di Fukushima saong Miyagi negar Nhật Bản, min bala ka manuac saong khut khat drap ar tui kuhria mboh daok tagok veik. Kuhria tal 11 tuk page ini ( tui mon pak nan) hu 4 urang metai, yaok rituh urang njauk rambuac. Mbang megei taneh pambak tal bhum taneh Kanto gam Tokyo ngak ka yaok trieu baoh sang lahik điện.

Akaok Mintri Jalan mbak Anh Gran Sáp (Grant Shapps) brei thau, meng harei paguh 18/3, negar Anh oh daok ieu tuai tuk mai tal negar Anh njauk vak tame harak brei thau ka rup drei piah duah saong định vị cá nhân. Meng bruk ini, negar Anh brei klaak nao jalan ngak puac abih dalam pacang caga jit Covid-19 bhian hu pandar di taneh ia ini. Tui langyah di akaok mintri jalan mbak negar Anh, bruk klauk vắc-xin samar drah saong siam lagaih hu daong ka negar Anh ba tabiak bruk nan saong tapa nan jeng hu makna lac, tal tuk negar Anh hu tự do dalam tukvak lễ phục sinh jaik mai tal./.

Urang lang: Ai Nghiem & M.P – 17/3/2022