Melam 15/6, di ban Phan Rang - Tháp Chàm, tỉnh Ninh Thuận hu peih bruk taduan mek Harak di UNESCO vak angan “Ilamo ngak lan am di urang Cam tame Angan inem krung ilamo oh maong mboh njauk khik ramik samar drah” saong harei pataom Nho - Vang Ninh Thuận thun 2023. Bruk ngak ini, piah paglaong hatai sahaneng, bruk ngak di rahra, dom pakat, dom gah, bhum palei dalam bruk khik ramik saong patagok yaom glaong inem krung ilamo oh maong mboh “Ilamo ngak lan di urang Cam” jang yau pambak tabiak dalam taneh ia saong dunya ka ilamo ngak lan biak gheih di bangsa. Dahlau di nan, tuk bier harei, mai rivang iek saong taom gaok dom urang ngak, rahra Palei Hamu Craok, ban sit Phước Dân, Akaok negar Võ Văn Thưởng caong maong mikva patui veik khik ramik, patagok dom yaom glaong ilamo hu blaoh, abih di nyu nan lac bruk khik ramik, patagok dom yaom glaong di lan am Cam, tapa nan, daong brei mboh dom yaom glaong ilamo meng kan di bangsa.

Mbang pakacah tamat THPT thun ini hu labaih 1 triệu 24 rabau anek saih tut angan tame pakacah, urak ini, Mintri pato Megru hu ngak salah bruk pasang iek 15 môn pakacah, ngak salah dom panuac tangi sua piah caga ka Hội đồng tabiak kadha pakacah. Thứ trưởng Mintri Pato Megru Phạm Ngọc Thưởng, akaok mBan tacei pato pakat negar mbang pakacah tamat THPT thun 2023 hu panuac kakei dom tinh ban brei caga ginup abih janih piah peih pakacah, pamaong tal bruk lac taong abih brei ka anek saih uranam, oh caik ka anek saih pakacah halei klaak pakacah kayua gaok kan kandah.

Sóc Trăng hu labaih 1.900 anek saih bangsa  Khmer, meblah labaih 20% dom anek saih tal 12 dalam tỉnh. Dalam tỉnh hu 27 labik pakacah saong 430 bilik pakacah. Sở Pato magru hu pato tacei dom sang bac pambuak haong amaik ame anek saih pathau khan tukvak, labik di mbang pakacah; daok dom labik hu padang dom kapul piah daong ka dom anek saih nao pakacah tuk gaok bruk hagait gah jalan mbak nao mai; piah khik ka dom anek saih bangsa Khmer, jang yau anek saih tal 12 di dalam tinh hu tame pakacah.

Urak ini, dom doanh nghiệp di Bình Dương bahrau hu 40-50% bruk ngak, tui nan, jien bilan di urang ngak trun tui, nan ye raidiuk gaok rilo kan kandah.  Dalam 5 bilan akaok thun ini, Bình Dương hu labaih 80.000 urang ngak lahik bruk, padeih bruk, padeih oh hu jien bilan... Dalam nan, dom urang ngak lahik bruk rilo di abih lac gah menyim jhik, takhaok kalik, ngak kayau. Tui kuhria tal puac thun, dom urang ngak lahik bruk ngak daok hu veik 60.000 urang. Urak ini, Sở Lao động-Thương binh saong Xã hội Bình Dương daok samar ngak harak gar piah bayar jien bảo hiểm lahik bruk ngak ka urang ngak.

Di tỉnh Hậu Giang bahrau rahtabiak bruk glut taneh, jaleih takai kraong biak trak damak di ban Ngã Bảy, labik glut jaleih atah labaih 35m, dalam labaih 10m, mblang taneh lahik jaik 350m2.  Labik glut jaleih ngak jaleih 2 baoh sang praong trun kraong, tui kuhria khat lahik labaih 1 tỉ đồng. makna di mbang glut jaleih taneh hu brei thau lac kayua njauk kan kandah di jalan ia nduac. Meng akaok thun tal urak ini, tỉnh Hậu Giang rahtabiak 45 labik glut jaleih, mblang taneh lahik 6.125m2; tui kuhria khat lahik labaih 4 tỷ đồng.

Bruk peih tổng tuyển cử thun 2023 di Campuchia daok rah tabiak njauk tui tukvak ba tabiak. Dalam mbang bầu cử di bilan 7 tal, 17 chính đảng hu mbaok tame pakacah haong đảng Bhap bini Campuchia pan karja. UB Bầu cử negar Campuchia hu brei in labaih 13 triệu phiếu bầu piah caga ka bruk pilih ruah urang tame ka Quốc hội mbang VII. Bruk in labaih 13 triệu hala phiếu abih labaih 2 triệu USD, dalam tuk jien brei ka bruk bầu cử mbang ini, abih tih lac 50 triệu USD.

Dom urang jakar ngak praong di Mỹ, Nhật Bản saong Hàn Quốc hu peih bruk ginum biai di ban ine Tokyo, Nhật Bản piah ginum biai ka dom danak dak tên lửa saong hạt nhân di Triều Tiên jang yau dom mbang cuh jaik di ini di Triều Tiên. Dom gah brei thau lac, gam haong gauk, 3 gah pambuak gauk meda khang kadang saong peih ngak hu siam lagaih jang tuk halei karei. Langiu di bruk Triều Tiên, dom gah jeng hu ginum biai ka dom bruk yau ye brei thau makna praong di bruk khik tani tanat saraon mbon saong siam makre di tasik Biển Đông saong Eo tasik Đài Loan, Trung Quốc.

Thủ tướng Nhật Bản Fumio Kishida meda klaak bruk giải tán Hạ viện dalam mbang nyaom Quốc hội urak ini, tui kuhria dui atah tal adit anak. Brei panuac haong urang ngak báo, ong Kishida ndom tal bruk ngak di rajaei di ong lac “langyah dom cuang kandah daok dang veik tal urak ini” saong tui nan, “dahlak oh sahneng tal bruk giải tán Hạ viện di puac mbang nyaom Quốc hội urak ini”. Tui hukum, tukvak 4 thun  di Hạ viện mbang ini meda tamat di bilan 10/2025.