Tal harei 15/5 anak tal, laik phone di động oh ka pabak khaw tin meda brei padeih hợp đồng saong njauk mek veik laik phone. Yau nan min,  urak ini daok hu labaih 1 trieu laik phone oh ka pabak khaw tin yaom lac njauk gah mạng cakak 2 gah. Tui Mentri Khaw tin saong truyen thong, bruk pabak khaw tin laik phone di động rik tame tani tanat trat tu xa hoi, sumu cakak, langyah bruk pandar sim điện thoại  oh njauk tui bruk ba tabiak piah pachot, pagat, yaih khan suan. Langiu di nan, tui dom gah mạng, khaw tin laik phone njauk meda daong ka urang pandar hu siam jang, trun khat lahik tuk khatin njauk urang pambak tame ngak jhak.

Pambuak tal bruk rilo rahra payua harak đơn pathau, khan ka bruk payua jien patak pataom di drei tame Gilang paraik TMCP Sài Gòn (SCB) njauk salih tapa paok jien blei bảo hiểm nhân thọ Manulife, Thượng tá Lê Mạnh Hà, Phó akaok jabat tham mưu – Công an TP.HCM brei thau lac, bruk ini daok hu Cục Cảnh sát kinh tế (C03) Mintri Công an duah thau. Kayua yau nan ye, Công an TP.HCM meda pambuak gauk ngak brei cambaih laih, ba bruk ini tagok langyah tui adat hukum. Hadei di tuk pasang iek blaoh, jabat langyah meda hu panuac javap jaloi, khan brei gah báo chí thau.

Tui Pasak Kuheria mboh dahlau bruk langik tasik pakat negar, bhap bini di grauk labik dalam negar daok rah tapa mbang pandiak biak khang akok meti di bilan hè. Ini lac mbang pandiak khang di ralo labik dalam 3 bhum   gah Barak, gah Kreh negar saong gah  Meraong. Tal harei 7/5 pandiak di Tây Nguyên saong Nam Bộ meda trun meneing. Di  Bắc Bộ saong Trung Bộ pandiak meda tagok glaong meng bilan 5 tal bilan 8 , tabung glong lac bilan 7. Dom mbang pandiak kuhria rah tapa meng 2-4 harei, hu mbang dui atah jang. Dom harei pandiak meda hu rilo jang dut saong thun 2022.

Di tỉnh Hậu Giang, taong abih khat lahik kayua bala meng langik tasik dalam thun 2022 lac labaih 22 tỉ meteh. Dalam nanhangin ribuk, ngak jaleih abih tih 15 baoh sang, par tabung 66 baoh sang, hu 18 labik glut jaleih takai kraong, atah abih tih labik glut jaleih lac jaik 470m, mbaok taneh lahik jaik 2.860m2. taphia di nan, kayua hajan gam haong ia ndik glaong ngak dauk, ngak khat lahik yaok rabau ha padai, phun mbang baoh. Nan ye, Phó akaok UBND tỉnh Hậu Giang Trương Cảnh Tuyên ieu kakei dom tinh, ban njauk samar drah pasang iek dom danak dak pacang caga bala meng langik tasik piah patrun manieng dom khat lahik ka rahra; pasang iek dom bến đò tapa kraong. Gam haong nan brei samar drah khan brei rahra thau ka hajan hangin piah ka rahra saong gah chức năng pacang caga hu siam lagaih, peih bruk pasang iek dom bến đò tapa kraong dalam bilan hajan, ia sua.

Dalam dom harei tapa, yaok pluh baoh sang bhap bini daok di tapen kraong  Vàm Cỏ Đông labik nao tapa xã Trường Đông, ban sit Hòa Thành, tỉnh Tây Ninh gam gam brei thau lac ia kraong salih tapa sambo màu jhuk, gam mbau bruk biak kan daok , huac lac ngak jhak tal prein yawa di bhap bini labik ini. Bruk njauk biai nan lac, mbau bruk ralo jang di tuk melam; sarit suai khin glaoh ta-ok. Ong Nguyễn Thái Bình, Phaok Akok Hội đồng bhap bin xã Trường Đông brei thau, hadei di tuk nao pasang iek tapak tui panuac khan di bhap bini, urang jakar  xã hu pok panuac tagok dom gah chuc nang tame bruk piah duah thau halau tathuak ia nerak ngak tachrauk  piah lang yah tui hukum karja.

Akaok Mintri Quốc phòng Israel brei thau lac Iran meda hu ginup urani ngak kaya mada piah ngak tabiak 5 janih phao ndao hạt nhân, gam haong nan jeng hu panuac kakei Iran lac bruk ngak kaya mada di pakat phao ndao meda ba tal bruk mesuh gauk di dalam bhum. Dalam dom bilan tapa, manuac sia dunya daok duh hatai ka bruk Iran ngak kaya mada urani  di jaik pakat phao ndao. Dom urang ilamo brei thau lac Iran hu ginup nhiên liệu piah ngak tabiak dom baoh bom nguyên tử mayah caong khin ngak. Urani ngak kaya mada piah pandar dalam dom sang mac điện hạt nhân bhian di tanut mala 20% tanut tamo, dalam tuk nan tanut ngak kaya mada lac 90% hu brei thau lac pakat phao ndao.

Urang jakar bang New York, Mỹ birau brei tapa kadung jien birau di bang, pakauk pandar khí đốt tự nhiện saong nhiên liệu hóa thạch dalam dom sang glong rilo tal birau padang ngak. Tui nan, dom pandap pandar yau ging, ging am cuh, giang ghang am hu pandar khí đốt tự nhiên oh brei pandar dalam dom sang glong ala 7 tal hu padang ngak birau meng thun 2026 saong dom sang glong rilo tal  jang di thun 2029. Bruk birau ba tabiak nan hu iek lac jayak di dom urang pachreih tui bruk pacang BĐKH di bang ini jeng yau dalam taneh ia Mỹ.

Kanja Myanmar hu tabiak adat brei peih palao labaih 2.000 urang guk piah salam uan Harei Phật đản. dom urang guk hu peih palao mbang ini lac dom urang njauk cap khik dalam mbang trun jalan cagar veik bruk bol bala negar ini pajaleih kanja dân chủ di bilan 2-2021. Dom urang ini njauk mek caik guk dalam 3 thun. Kanja quân sự Myanmar brei thau lac bruk peih palao hu ba tabiak kayua bruk sron mbon dalam rahra saong tui jalan pahla. Langiu di nan, dom urang guk meyah ngak suan veik njauk mek daok guk abih tukvak hu peih palao dahlau gam haong tanut taong phat bahrau.