Mintri Ilamo Thể thao saong Du lịch hu padang jalan peih Tal pasram, pabak ilamo chuyên môn, bruk ngak, pato veik bruk manyim khan bai bangsa Ê Đê thun 2023. Tui jalan ba tabiak, tal pasram meda hu peih tabiak dalam 4 harei di quý II atau akaok quý III/2023, di ban Tuy Hòa, tỉnh Phú Yên. Tal pasram meda hu mbaok tame di 10 nghệ nhân pato saong 80 urang bac, dalam nan hu dom asal kadha Sarak, jalan ngak di Đảng, sarak hukum di Kanja ka bruk khik ramik, patagok dom yaom glaong ilamo meng kan siam gheih di dom bangsa takik; dom siam gheih di sambo mau di khan bai di urang Ê Đê dalam rahra 54 bangsa Việt Nam saong mala dom kanjak di bruk mbeik drei tame di ilamo saong bruk cak rok patagok kinh tế - xã hội di taneh ia, bruk manyim khan bai meng kan di urang Ê Đê; makna praong di bruk khik ramik, patagok dom yaom glaong di bruk manyim khan bai meng kan di urang Ê Đê pambuak haong bruk cak rok patagok du lịch.

Mesup ini (26/6), Thành đoàn saong kapul Sinh viên TP. Cần Thơ peih  bruk tabiak mbaok sinh viên halan hatian bilan hè hijao saong danak dak “daong prein bilan pakacah” thun 2023. Danak dak “daong prein bilan pakacah” thun 2023 di Cần Thơ dui pachreih hu jaik 2.000 dam dara halan hatian hu mbaok tame. Dom dam dara nan hu parabha ka 25 Hội đồng pakacah di 9 quận/huyện, daong prein ka labaih 12.000 anek saih saong amaik ame gauk gar dalam dom harei 27, 28, 29/6 meng dom bruk ngak yau: padang kapul radaih pajeng ba oh mek jien, tacei jalan ka anek tame bilik pakacah, daong lisei huak, ia menyum brei saoh.

Meng harei 9/8- 12/8 tal urak ini, di Pasak darak pasa parang iek di tỉnh Bình Dương meda peih tabiak “Mbang darak pasa jamraik saong pandap panda kayau Dunya Bình Dương 2023 - Bifa Wood Việt Nam 2023”. Mbang parang iek tui kuhria meda pachreih hu labaih 100 doanh nghiệp dalam saong langiu taneh ia ngan haong 700 gian hàng, parang iek yaih khan pandap panda, jamraik pandap panda, công nghệ tiên tiến. Di pak ini, dom doanh nghiep meda pambuak haong cong nghe bahrau, gah pandap panda parilo janih. Dom doanh nghiep hu kein lagaih piah pambuak haong bruk pambuak gauk, ngak tabiak chuỗi pambuak gauk rah tui dalam gah saong cak rok patagok khang kajap chip di darak pasa dalam taneh ia.

Meng akaok thun tal ini, tỉnh Đồng Nai hu labaih 40 rabau mbang urang ngak hu ba brei bruk ngak, samu meteh bruk ba tabiak dalam thun. Min dom urang ngak blei BHXH trun khang duk haong puac thun 2022, takik jang jaik 39 rabau urang. Makna lac kayua dom doanh nghiệp kan kandah nan ye brei ka urang ngak padeih bruk, cang bruk. Piah daong ka urang ngak saong doanh nghiệp, pasak Dịch vụ bruk ngak Đồng Nai hu peih 8 sàn giao dịch bruk ngak, hu jaik 2 rabau  700 urang ngak hu mbaok tame, dalam nan hu 1 rabau 700  urang ngak hu pilih ruah.

Dah page ini (26/6), Mban tacei jalan pacang caga bala meng langik tasik saong daong duah urang njauk bala di tỉnh Bến Tre brei thau lac, di dalam xã Giao Long, huyện Châu Thành (Bến Tre) bahrau rahtabiak bruk glut jaleih khang, di pak ini daok duah jalan langyah ngak pasiam veik. Dalam 2 harei, 15 saong 25/5 bahrau blaoh, di ar takai kraong Giao Hòa, di Kapul rahra eng drei khik iek ka 01, di puk Hòa Hưng Thạnh, xã Giao Long (huyện Châu Thành, Bến Tre) hu rilo mbang rahtabiak glut jaleih khan. Labaih 35m jalan tapen kraong ini njauk jaleih trun abih laik trun kraong saong praong labaih 6 mét. Dalam nan, bruk glut jaleih mbang dalam tame gah jalan huyện ĐH.03 atah 25 mét saong glut jaleih abih laik trun kraong gah jalan atah 15 mét; gam tui di nan, dua gah labik glut jaleih gah langiu atah labaih 100m urak ini tui kuhria glut jaleih daok rahtabiak veik. 

Tui Hãng tin Reuters, Gah khik caga takai tasik Mỹ daok duah thau makna bruk patuh mala tasik di sruh kapal du lich njuk ia ngak brei 5 urang metai. Dahlau di nan sa harei, UB Salamat jalan mbak pajeng ba di Canada jeng brei thau lac urang daok peih bruk duah thau ka ka bala nan. Bruk roh duah, thám hiểm di sruh kapal gilai njuk ia nan mboh lac hu rilo labik huan gah adat hukum

Nyaom biai di Ủy ban Thường vụ Nyaom roya urang lambaok ka bhap bini dalam taneh ia (lac Quốc hội) mbang 14 Trung Quốc hu peih tabiak di Bắc Kinh meng harei 26 -28/6, meda pasang iek dự thảo Hukum pato magru tui chủ nghĩa anit ranam taneh ia, dalam nan pataom tame bruk khik ramik bruk jumpataom gauk dalam bangsa saong njauk gauk dalam taneh ia. Bruk padang ngak Hukum pato magru tui chủ nghĩa anit ranam, peih ngak dom adat di sarak, jhul pachreih saong khik caga bruk pato tui chu nghia anit ranam taneh ia dalam zaman bahrau meng pháp quyền hu makna praong glaong saong dalam dalam bruk pamadeih hatai anit ranam bangsa, jumpataom gauk ngak jeng prein khang dalam rahra, jhul pachreih bruk dak padang taneh ia kaya mada saong patagok di bangsa.

Thủ tướng Campuchia Hun Sen brei mboh hatai suh sah ka bruk patagok njaom mbak HIV/AIDS di taneh ia ini, tuk dom menuac njaom HIV/AIDS dalam thun 2022 tagok labaih 1.400 menuac. Thủ tướng Hun Sen brei thau, jit praong AIDS di Campuchia oh ka tamat, dalam thun 2022 dom urang njaom HIV bahrau tgaok jang thun 2021. Campuchia jeng oh ka abih ruak AIDS, nan ye yaok urang brei thau khik caga rup drei, oh lac likei atau kumei. Tui Liên hiệp quốc, rilo taneh ia dalam bhum, dalam nan hu Campuchia, Indonesia, Lào, Philippines saong Thái Lan jeng hu labaih 40% dom menuac njaom HIV lac dam dara urang ranaih umo./.