Phaok Thu tuong Lê Thành Long hu mbaoh tangin ka bruk ba tabiak ngak tui pato tacei di Mentri Chinh tri ka bruk pato megru hu di grauk labik, pandar bac megru, pato ka urang praong thun umo oh ka thau akhar huroh saong jhul khang bruk rabha anek saih bac megru pho thong tal thun 2030. Bruk kuhria lac salah blaoh bruk pato bac ka urang oh ka thau akhar hu hroh saong pamaong tal bruk pato bac ka urang praong thun umo oh ka thau akhar huroh, abih di nyu nan lac urang bangsa takik. Dalam nan kham merat ka dom urang thau akhar huroh di umo mala 60 thun hu labaih 99%. Hu 90% dom tinh mek hu tanut chuan pato bac ka urang oh ka thau akhar huroh tanut 2.

Kapol Dam dara tinh Dong Thap birau ta biak mbaok 155 kapol nyaom “Bhap bini bac pandar taka so” di dom pakat ndoan, jiak 700 kapol nyaom di dom puk palei hu labaih 3.500 urang ndoan, dam dara hu mbaok tame. Kapol nyaom “Bhap bini bac pandar taka so” hu ngak dom bruk yau: tacei pato tame pandar jitvu online karja di bhum palei; peih ngak “Darak 4.0”; “Kan tin, kuan pablei pandap oh pandar jien mbaok”; “Bhum palei njauk diukrai” gam haong “Palei pala birau”, pato rahra pagam app di gilang pariak, piah klak bayar jien dreih”.

Bruk pala panat Thai di mikva Raglai palei Giá, xa Phước Hà, huyen Thuận Nam, tinh Ninh Thuan daok brei tabiak dom baoh praong pasiu yamen, parilo jien mek tame ka urang ngak nong. Hadei 5 thun, phun panat Thai randap siam haong langik di bhum palei, brei tabiak rilo baoh bingi, hu rilo urang takre. Bruk ini peih tabiak kein lagaih salih phun pala, parilo jien mek tame di xa bhum glaong Phước Hà. Urak ini, yaok phun paik hu 2 baoh dalam sa mbang tabiak baoh, yaom pablei di bein 12.000 dong/kg. Yaok baoh sang hu jien mek tame labaih 1,5 trieu dong sa bilan.

Anak bruk jit kum manuk ada, UB bhap bini tinh Long An tacei pato dom jabat chuc nang tui iek, samar thau, ngak hacih oh brei njom mbak tabiak praong jit kum manuk ada. Dom gah chuc nang  tacei pato po raong manuk ada brei ngak tui njauk dom jalan raong glang sinh hoc hacih sa-at, dom jalan pacang caga ruak, riak tathak, oh mbang darah manuk ada matah…; brei klauk jru vaccine  caga ruak ka taphon manuk ada.

Angaok labik phuong Nhà Mát, ban Bac lieu, tinh Bac Lieu bahrau mboh di gah Pai ribaong 30/4 dalam puk Chòm Xoài (taphia braong pacang ia tagok) rah tabiak glut jaleih taneh atah labaih 10m. Hadei tuk bruk nan rah tabiak, karja palei hu pasiam labik nan piah khik kajap karo salamat ka rahra. Dahlau di nan, dalam bilan 6/2024, di ar kraong Ca Mau - Bac Lieu, jalan Lê Thị Hồng gấm, daok di Puk 6, Phuong 5 jeng rah tabiak glut jaleih taneih ar kraong, ngak kanjah jhak tal 40 baoh sang rahra. Glut jaleih jeng ngak kanjah jhak tal labaih 800m angaok jalan.

Di Nhat Ban, dom uranaih dam dara ngak suan hukum kayua pandar mang xa hoi dak harei dak tagok rilo. Dalam thun 2024, hu jaik 1.500 uranaih  umo ala 18 thun lac urang pambak tame bruk pandar mang xa hoi, dalam nan hu 136 anek saih bac tieu hoc. Njauk caik hatai lac dom uranaih lac urang njauk duis kayua ma-in game online ralo. Jabat Canh sat Negar Nhat Ban iew bhap bini rahra caga dom bruk nan, kayua mboh anak meta lac, rilo anek saih njauk urang karei pambak tame  “ palua daong gauk dalam kadha ma-in”, ba tal tame dom bruk ngak suan hukum.

Sarak jien je khang kajap di Tong thong My oh ngak tabiak bruk kan kandah ka gah pablei salih bo daok ngak rah tabiak bruk oh blei pandap kaya Mỹ dalam dunya. Di chau Au, rilo gah ngak mbang pablei salih jeng hu bruk ngak cagar. Salling Group, gah pablei lẻ praong abih di Dan Mach, pathau khan brei pagam dom pandap kaya chau Au meng patuk sambo bar juk piah ka tuai damuai mbuan si thau. Kongti Haltbakk di Na Uy, gah pabak menyek ka kapal gilai, hu ndom lac brei padeih bruk pabak menyek ka gah bol lin tasik Mỹ.

Meng bilan 1 mbiah tal ini di dua bang Texas saong New Mexico di Mỹ hu 256 urang njom ruak soi. Jaik abih dom urang ruak nan lac oh ka klauk jru  vaccine  soi atau dom urang oh ka thau hu klauk jru blaoh atau oh. Mbiah tal ini, takik di nyu 29 urang  ba tame jru ruak. Tui kuhria meng Pasak  pasang iek saong caga jit ruak Mỹ, dom urang njom ruak soi ralo lac uranaih sit saong jaik jeng dam dara. Ruak soi hu khan lac abih oh daok di Mỹ thun 2000 meng hu danak dak klauk jru pacang caga ruak siam. Yau nan min, bruk klauk jru caga ruak suai veik dalam dom thun jaik ini./.