Long An khang hatai ba tabiak bruk yaok thun ba 1.000 urang ngak nao negar langiu ngak bruk

Tal tukvak ini, urang ngak mai veik Long An ngak bruk jiak ginup abih. Yau nan min, tỉnh ini daok kurang yaok pluh ribau urang ngak naih joi. Ong Nguyễn Đại Tánh, Phaok Yam ndoc Sở Lao động - Thương binh saong Xã hội tỉnh brei thau: Piah pabak sumu urang ngak bruk hu ilamu glong di dom khu, cụm CN, Long An khang hatai ba tabiak bruk yaok thun ba 1.000 urang ngak nao negar langiu ngak bruk di Nhật Bản, Hàn Quốc…piah paglong ilamu ngak bruk, blaoh mai veik tỉnh ngak bruk. Daok bruk suai lavik, Long An pamaong tal bruk hu urang ngak di labik.

Kapan pajeng đoàn tàu ka 12 song 13 di jalan Metro ka 1 (Bến Thành - Suối Tiên) hu pataok tame pabah lamnge Khánh Hội, TPHCM mesup 11/3 hadei di rilo harei tabiak mai meng Japon. Jeng dalam harei nan, 2 đoàn tàu hu BA trun pabah lamnge, yaok đoàn hu 3 toa tàu, atah 61 met meteh. Bruk peih iek di dom đoàn tàu hu peih ngak tui yaok tuk vak, camereip abih brei nduac dalam labik di depot, hadei di nan angaok jalan prong, dahlau di tuk ba tame pajeng tuia damuai di puac quý 4-2023.

Urak ini, yaom hadang sú di rilo tỉnh dalam bhum taneran kraong Cuu Long trun hasit, dalam tuk hadang thẻ daok khik hu siam yaom di nyu. Meng kaok bilan 3, yaom hadang sú trun meng 10.000 tal 20.000 đồng sa kilo tui janih. Tui rilo urang raong hadang di Sóc Trăng, Bạc Liêu, urang blei lac trun yaom kayua hadang pablei tabiak negar langiu oh hu lagaih, min ngan saong yaom yau urak ini urang raong jeng daok hu laba. Yau nan min, yaom xăng menyek, nguyen lieu pandap mbang blei tame jaik ini tagok glong, urang raong hadang haduh hatai oh ka sumu mek jien laba ye kuhria tal khat lahik phun jien.

Pagam tal bruk to yaom lubang cuah njauk yaom labaih 2.800 tỷ đồng, Sở Tài nguyên song Môi trường tỉnh An Giang brei thau, doanh nghiệp njauk thầu taduan klaak cọc labaih 1 tỷ đồng. Dahlau di nan, harei 26/3/2021, Pasak dịch vụ to yaom drap ar tỉnh An Giang hu peih to yaom quyền mek pandar cuah krong ngak pandap padang ngak di lubang cuah xã Bình Phước Xuân, huyện Chợ Mới praong labaih 60ha. Công ty TNHH Thương mại song Dịch vụ T-S.HOME di quận 7, ban raya Hồ Chí Minh njauk yaom haong yaom jien tui kuhria oh ka ginup abih lac 2.811 tỷ đồng, tagok 390 mbang dut song yaom ba tabiak tuk camereip. Min, hadei di tuk njauk thầu, Công ty T-S.HOME oh buh ginup jien njauk thầu yau hukum nan ye, Sở Tài nguyên song Môi trường An Giang hu panuac ieu klak bruk to yaom mek quyền mek cuah krong angaok krong Tiền di Công ty T-S.HOME.

Ong Trần Thanh Thanh, umo 60 thun, ấp Hưng Nhơn, xã Hòa Nghĩa, H.Chợ Lách, Bến Tre pabam hu phun panat pasiu bhong meriak, briak hu sambo katam kanjik, baoh praong trak labaih 20 kilo. Pajaih panat birau ini di ong Thanh samar pachreih hu bruk sangka biak praong di dom urang ngak bein di miền Tây. Urak ini, pajaih panat ini hu Sở Ngak nong saong patagok palei pala tỉnh Bến Tre brei harak lac phun brei rilo baoh praong, siam hu prein khang tamuh jang rilo phun karei. Pajaih panat hatai bhong meriak katam hu pablei tabiak darak pasa ngan saong yaom labaih 100.000 đồng sa phun, min kayua hu takik nan ye daok kurang phun piah pablei.

Lạm phát di Mỹ tagok tal 7,9% dalam sa thun tapa, tanut glong di abih dalam 40 thun tapa, dalam tuk yaom kaom tui kuhria dok tagok dalam tuk vak anak tal. Ngan song jiak abih rahra Mỹ, lạm phát glong jang dut song yaom jien bilan hu tagok dalam thun tapa ngak ka urang gaok rilo kan kandah dalam rai duik. Kayua yau nan ye, lạm phát daok jeng bruk đe dọa chính trị dang akaok ngan song rajaei Tổng thống Mỹ song đảng Dân chủ dalam tuk mbang palih ruah di nhiệm kỳ quốc hội Mỹ dok jiak tal.

Thủ tướng Pakistan birau ba tabiak danak dak daong yaom 30% lương thực, kaya pandap mbang yaok bilan ka 20 trieu baoh sang raidiuk mbiah saong dom bhap bini jien mek tame takik. Thủ tướng Pakistan brei thau, danak dak nan piah patruh iek patrun kathaot di Pakistan. 98% jien daong brei ka dom urang kumei hu raidiuk kan kandah. Gam haong nan, hu panuac iew bhap bini brei kak jien je piah rajaei hu ginup jien ka bruk phúc lợi xa hoi.

Dalam roh duah bahrau hu ba tabiak angaok harak PLOS Genetics, dom urang ilamu hu pilih ruah tabiak labaih 3.000 protein dalam drah song tanut trak di Covid-19 hu mboh tapa bruk tame sang iek ruak atau metai , piah tong yaom talei pambuak gauk di dom biến thể gene parabha tanut protein dalam drah song pren yava di urang ruak Covid-19. Tapa nan, urang duah tabiak dom protein dalam drah di urang ruak hu pagam tal bruk mbuan si tame sang iek ruak song metai kayua Covid-19. Roh duah hu binah halei brei thau lac njauk di dom roh duah dahlau di nan ka dom talei pambuak di nyaom A song bruk mbuan si ruak trak tuk njuak Covid-19. Yaom lac yau nan, jeng dok hu dom kadha langiu nyaom drah ba tal trak damak di Covid-19, yau umo thun, ruak dahlau dalam rup./.

Urang lang: Hani Pha – Bhumi – 12/03