Harei Pataom Ilamo, Thể thao, Du lịch di mikva bangsa Khmer Nam Bộ mbang ka VIII saong bruk pakacah ghe Ngo Sóc Trăng mbang V, Bhum taneran kraong Cửu Long hu tamat di bier harei 8/11. Harei pataom ilamo lac bruk ngak hu makna praong, piah pok mayaom ilamo di mikva bangsa Khmer Nam Bộ, paglaong talei jumpataom gauk di rahra, rik tame bruk yaih khan, pambak tabiak dom ilamo meng kan di mikva bangsa Khmer Nam Bộ tal ayut saabat dalam taneh ia saong dunya. Dalam harei pataom ilamo, hu rilo bruk ngak hu peih tabiak, hu harei Ok Om Bok – pacacah ghe Ngo Sóc Trăng di bhum taneran kraong Cửu Long, parang iek adat ieu yang ia bulan, parang iek Lôiprotip (gom dalam ia) saong ghe Cà Hâu...

Thanh tra tỉnh Bình Dương hu pilih ruah 17 urang jakar di Sở Tài chính, Sở Y tế piah duah thau ka jien mek tame, ka drap ar. Bruk pilih ruah ini hu ngak meng phần mềm komputer tuk hu mbaok pasang iek di lambaok dom gah ini. Thun ini, Bình Dương peih bruk duah thau jien mek tame di 3 đơn vị, dalam nan mbang ka 1 daok pasang iek urang jakar Sở Y tế, Sở Tài chính; mbang ka 2 lac urang jakar UBND ban sit Thuận An. Bruk pasang iek, duah thau tui jalan ngak lac meng urang dang akaok dahlau blaoh trun tal gah mala, taong abih dom urang kê khai drap ar jeng hu pasang iek.

Công ty TNHH An Giang Samho, di labik ngak kong Bình Hòa, huyện Châu Thành, tỉnh An Giang bahrau tabiak panuac brei thau lac meda patakik veik bruk ngak, rami ramik veik urang ngak, kayua đơn hàng daok kurang. Bruk patakik veik bruk ngak ini, ngak ka yaok ribau urang ngak lahik bruk di tuk puac thun. Urak ini UBND tỉnh An Giang hu pato tacei dom sở, dom gah pambuak tal, ngak bruk haong Công ty An Giang Samho piah duah jalan lang talaih dom kan kandah ka urang ngak saong duah jalan langyah ka nyu siam mekre di Công ty saong urang ngak. 

Meng harei ini tal harei 12/11 di dalam tỉnh Bạc Liêu hu mbang ia tagok khang, di tanut báo động 2. Ia tagok glaong di abih lac di mesup harei 10/11 di Bilai Thủy văn Gành Hào meda yam tapa tanut báo động 3 jaik 15cm. Anak bruk ini, Sở Ngak nong saong patagok palei pala Bạc Liêu tacei pato dom jabat pambuak tal, brei peih - kreik dom cống thủy lợi Nhà Mát, Cái Cùng saong Huyện Kệ piah pacang ia dauk ban Bạc Liêu saong dom labik jaik taphia. Tapa bruk peih – kreik nan, meda ngak brei dauk labik meng dom cống tabiak tasik, kayua yau nan ye, bhap bini njauk caik hatai sangka, patrun patakik dom khat lahik.

Bier harei kabroi (8/11), di xã Tiến Thành, ban Phan Thiết, tỉnh Bình Thuận hu sa bruk mblung ia ngak ka 2 anek saih umo 11 thun metai biak pandiak harao. Tui bhap bini di pak ini brei thau, hadei di tuk bac blaoh, sa kapul anek saih jak gauk nao ma-in di labik ar pacang takaik tasik gah likuk sang bhap bini daok di xã Tiến Thành.  Dalam tuk ma-in, sa adei sak takei laik trun tasik. Mboh yau nan, adei karei yar tangin tabiak dui ayut saabat min jeng blait takai laik trun tasik. Tuk mboh bruk nan, bhap bini hu plaong trun daong min 2 adei oh tapa truh.

Yaok triệu cử tri Mỹ harei 8/11 (tui mong di Mỹ) hu nao buh phiếu dalam bruk pilih ruah kreih nhiệm kỳ 2022. Dom cử tri buh phiếu tapak atau tapa bưu điện. Bruk pilih ruah thun ini hu makna biak praong tuk meda ba tal bruk samu gauk di 2 đảng dalam quốc hội, tapa nan ba tabiak jalan ngak, sarak di Mỹ dalam 2 thun tal.

Tiến sĩ Manoon, lac sa urang ilamo gah ruak phổi di Sang iek ruak Vichaiyut di Thái Lan brei thau, dom urang njauk ruak COVID-19 kayua njom ruak dom biến thể phụ di chủng Omicron tagok rilo di taneh ia ini. Sa roh duah bahrau ini di Cục Khoa học Y tế Thái Lan jeng brei thau lac taneh ia ini hu mboh dom urang ruak tagok biak rilo dalam bilan 10, rilo meng lac kayua njom ruak 5 biến thể phụ bahrau di chủng Omicron – dalam nan hu dom biến thể phụ BA, BQ saong XBB. Kayua yau nan ye bhap bini njauk klauk jru pacang caga ruak cúm yaok thun, dom urang hu klauk takik di nyu lac 3 mbang vaccine caga COVID-19 meda thit ruak samar jang tuk njauk ruak.

Ban ine La Habana di Cuba bak 503 thun di harei 16/11 tal. Rilo bruk ngak piah pahadar hu peih tabiak saong dui atah dalam luac bilan 11, piah pok angan ban inem krung ini. Meng menuac sia tok hu labaih 2 triệu urang, La Habana lac ban praong abih di Cuba. Ban 503 thun ini hu gah pato pakai, Khoa học saong ilamu di Liên hợp quốc (UNESCO) pok angan lac inem krung dunya di thun 1982./.

Urang lang: Thu Thảo & M. Phương