Tanut yaom pandar cai bilan 4 tagok hasit 0,18% dut saong bilan dahlau; tagok 2,64% dut saong tukvak ini thun dahlau. Dom chuyên gia yaok pataom ndom lac, yaom pandap panda khik ramik sang daok tagok tui yaom pandap blei tame piah ngak; dịch vụ mato magru hu tagok gilac di dom tinh, ban hadei di sa tukvak trun atau oh mek jien bac; yaom mbang manyum langiu  sang saong dịch vụ du lịch tagok tui caong pandar lac dom makna praong ngak ka CPI bilan 4 tagok. Kuhria rah tapa 4 bilan lạm phát tagok 0,97% - brei mboh bruk trun, tagok yaom pandar kayua yaom pandap mbang menyum saong yaom xăng, manyek tagok khang.

UB bhap bini ban raya HCM hu peih bruk brei thau sarak di Thủ tướng rajaei ka bruk taduan lac huyện Bình Chánh mek hu chuẩn palei pala bahrau thun 2020.  Jeng di mbang peih bruk ini, UB bhap bini ban raya HCM jeng brei thau bruk taong yaom, dak dhi dang pandap OCOP dalam ban raya ka 27 janih pandap. Dom janih pandap jeng mek hu chất lượng meng 3 patuk tal 4 patuk tagok.

Piah khik hu siam mekre salamat bruk nao mai angaok jalan mbak saong patrun bruk gar jalan angaok đèo Bảo Lộc dalam tuk lễ 30/4 saong 1/5, UBND tỉnh Lâm Đồng brei patakik dom sruh radaih ô tô tải trak labaih 20 tấn, pajeng khoáng sản, pandap panda padang ngak, haluk, patau… nduac di jalan đèo Bảo Lộc. Jeng dalam tuk padieh lễ 30/4 saong 1/5, ban Vũng Tàu meda pakauk radaih ô tô nduac angaok 2 jalan BiVa saong Hải Đăng tagok ceik Praong saong ceik Sit dalam 4 harei, kuhria  meng maong 12 melam 30/4 tal abih harei 3/5.

750 urang ngak di ban raya HCM hu mbaok tame bruk peih mbaok Bilan urang ngak mbang ka 14 thun 2022, rah tabiak tuk mesup harei 29/4 kayua Liên đoàn Lao động ban raya peih tabiak. Kadha bahrau dalam bilan urang ngak thun ini lac, dom pakat Công đoàn ban raya meda brei padang dom labik "Phúc lợi đoàn viên" pambuak haong raidiuk yaok harei di urang ngak. Hu 10 Công đoàn pakat mangaok cơ sở tut angan peih ngak danak dak ini, labik tabiak mbaok di jabat LĐLĐ quận, huyện atau dom labik sang trọ.

Cục khik ramik darak pasa – Jabat thường trực Mban tacei jalan 389 tỉnh Ninh Thuận bahrau peih bruk am cuh klaak labaih 35.600 paok pakao lậu, pakao ja njauk cap mek dalam tukvak jaik di ini. Bruk am cuh klaak hu peih ngak ala bruk hu mbaok tui iek di Kapul am cuh klaak, dom jabat pathau khan saong dom sở, dom gah pambuak tal. Dalam labaih 35.600 paok pakao lau saong pakao ja dom janih njauk cap mek, hu jaik 27.000 paok pakao Jet, labaih 1.000 paok pakao 3 laik 5 saong rilo janih pakao karei.

Labaih 23 triệu uranaih njauk klaak tapa bruk klauk jru tui định kỳ dalam thun 2020 saong ini lac praong di abih kuhria dalam labaih sa pluh thun tapa. Tukvak jit praong COVID-19 tamuh tabiak, 57 mbang klauk jru praong di 43 taneh ia njauk padeih veik, pambak tal 203 triệu menuac, rilo meng lac uraniah. Tui dom harak pathau khan bahrau abih, dalam 2 bilan akaok thun ini, di mangaok dunya hu tal 17.300 urang njauk ruak sởi, duk haong 9.600 urang dalam tukvak ini thun bloh.

Mbang ginum biai Kinh tế Dunya St.Petersburg mbang ka 25 meda hu peih tabiak di harei 15 tal harei 18/6 thun ini. Tal urak ini hu 69 taneh ia hu mbaok tame. Thun ini, dalam tuk gah kinh tế daok njauk kan kandah kayua jit praong Covid-19 jang yau srau kadau di U-crai-na, mbang ginum biai hu caong lac daong jhul pasiam veik kinh tế dunya dalam tukvak anak tal.

Dom ban praong dalam negar Trung Quốc daok peih bruk dut iek rilo piah pacang cakak bruk mbuan tamuh jit di rilo labik praong saong piah oh ngak kan kandah tal nền kinh tế. Kuhria tal harei 28/4, jaik 1 tỉ 250 triệu menuac di Trung Quốc hu klauk ginup dom mbang klauk vaccine caga COVID-19, samu 88,62% menuac sia dalam taneh ia. Dalam nan, hu 215 triệu menuac umo meng 60 thun tagok, samu 81,44% menuac sia dalam taneh ia. Jaik 160 triệu menuac hu klauk mbang patagok./. 

Urang lang: Thu Thao & M.P – 30/4/2022