Di Palei ilamu – Dulich dom bangsa Viet Nam(Hà Nội) birau rah tabiak Nyaom biai taom mbaok dom nghe nhan saong dom urang hu buh rilo prein yawa dalam bruk khik ramik, patagok ilamu dom bangsa  di bhum gah Barak. Hu mbaok tame, hu rilo nghe nhan naih gheih di dom bangsa  Tày, Nùng, Thái, Mông, Dao, Lô Lô, Khơ Mú, Phù Lá, La Chí, Mường, Hà Nhì, Giáy, Kháng… Bruk nan hu peih ngak yaok thun, piah pachreih ba dom bruk khik ramik, patoa veik ilamu siam gheih meng kan, rik tame  biak ralo ilamu dom bangsa takik klah lahik nao.

Nyaom roya Phật giáo pakat negar mbang ka 9, tukvak 2022-2027 ngan saong kadha “Adat cambat - Trách nhiệm – Jum pataom - Patagok” hu peih tabiak meng harei 28 - 29/11 dii Hà Nội, hu mbaok di labaih 1.000 urang. Nyaom roya hu bruk pok ngak Đức Pháp chủ haong Hội đồng Chứng minh; pok ngak Chủ tịch haong Hội đồng Trị sự vaktu 2022-2027; Peih ngak adat pok meyaom di Giáo hội saong Karja alin hadiah brei… Daok bruk jum pataom dalam kadha di Nyaom roya mbang ini. Hòa thượng Thích Gia Quang, Phaok Chủ tịch Hội đồng Trị sự brei thau: “Jum pataom oh njauk lac menuac dalam Phật giáo haong gauk, bo daok lac jum pataom Phật tử haong bhap bini saong karja, dom agama karei… Bruk ini hu makna biak praong saong njauk ngak”.

Viện Vệ sinh dịch tễ Trung ương (Mentri Y tế) birau ba tabiak bruk brei parabha 434.000 mbang jru vaccine, dalam nan hu 200.000 mbang jru vaccine sởi saong 234.000 mbang vaccine DPT lac jru caga ruak patuk ho gà, bạch hầu, uốn ván piah klauk caga ruak pambak praong ka uranaih dalam negar. Dom bilan ini mai, di dom bhum palei mboh krang jru vaccine  sởi saong DPT. Ini lac dua vaccine hu ngak tabiak dalam negar, yaom lac hu blaoh min oh pandar hu kayua tavak dom bruk ba tabiak di hukum pablei saong pabak.

Adit Lướt ván – kalang pakat dunya saong dom bruk ilamu du lịch Ninh Hải- Ninh Thuận thun 2022 hu peih tabiak meng 16/12 - 25/12, ngan saong rilo bruk yau: pakacah ghe mangaok Đầm Nại, pakacah taong valei kumei takai tasik, lướt ván – kalang dunya Sailing Bay Ninh Chữ, Harei pataom bingu mai kanyik katam Vĩnh Hy, Giải việt dã "Chinh phục jalan Bình Tiên - Vĩnh Hy"… UBND huyện Ninh Hải, tỉnh Ninh Thuận brei thau, bruk ngak ini meda daong patagok bruk pambuak gauk cakrok du lịch di dom tỉnh, ban, peih tabiak jalan ka dom doanh nghiệp lữ hành peih praong darak pasar, padang dom tour du lịch bahrau. Urak ini hu 50 vận động viên dalam taneh ia saong langiu dunya tut angan hu mbaok tame Festival.

Meng tuk pablei tui harak gar tapa Trung Quoc, bruk pablei baoh durian di Tiền Giang hu mbuan lagaih, yaom glong abih. Urak ini durian  Mon thoong jaik 100 ribau dong sa kilo, dom pajaih karei labaih 80 ribau dong sa kilo; yaok ha  bein durian  meda mek jien tame jaik 1 tỷ đồng sa thun. Kayua laba biak glong yau nan ye rilo urang nong buh jien tame pala patagok bein durian, gam pala langiu labik quy hoach brei pala. Tui yaok pataom oh ka ginup abih, taneh bein pala durian dalam tỉnh Tiền Giang mbiah tal ini hu labaih 17.000 ha, labaih di bruk ba tabiak tal  2025. Gah ngak nong tỉnh pachreih  po bein juai pala langiu labik quy haoch jeng yau tuk oh ka thau cambaic ilamu pala. Anak meta mboh lac tuk ia ndik saong ia tagok glong, dom bein pala durian langiu quy hoach njuak khat lahik trak.

Liên minh châu Âu (EU) tabiak panuac lac salih abih bruk blei khí đốt tự nhiên di Nga meng khí thiên nhiên hóa lỏng (LNG) saong khí đốt meng dom labik pabak njauk caik hatai jia. Hu dom gah hu panuac lac bruk EU blei rilo LNG ngak kan ka dom taneh ia daok patagok, kayua urang njauk meriak gauk gah yaom kaom haong dom taneh ia kaya meda jang. Tui UB châu Âu, meng bilan 1 tal bilan 8 thun ini, abih tih khí đốt blei meng Nga trun 39 tỉ m3. Dalam tuk nan, bruk pabak LNG meng Mỹ tagok jang jaik 80%.

Triều Tiên ndem meyai lac Hàn Quốc kham ngak catang bruk taong phạt taneh ia ini, brei thau dahlau lac dom jalan ngak yau nan meda ba tal Bình Nhưỡng pamoh mebai jhak haong gauk jang. Dahlau di nan, Mentri Ngoại giao Hàn Quốc  brei thau lac daok pasang iek dom hukum taong phạt  ta-eng Trieu Tien, meyah taneh ia ini cuh iek hạt nhân. Trieu Tien thun ini cuh iek gam gam tên lửa đạn đạo katut biak rilo mbang, dalam tuk Mỹ saong dom taneh ia rilo mbang peih bruk pasram kalin praong dalam bhum taneh. 

Danak dak padai brah pandap mbang dunya di Liên hiệp quốc (WFP) caong hu 1 tỉ 270 triệu USD dalam 6 bilan tal piah caga haong bruk pandiak bhang khang daok ngak kan kandah 3 taneh ia Kenya, Ethiopia saong Somalia di bhum takaiy châu Phi, jhul bruk lahik an ninh lương thực saong lavang lavaih di bhum ini tagok glaong haong 22 triệu menuac oh hu khik kajap padai brah pandap mbang. Langiu di bruk daong pabak pandap mbang, WFP jeng daok buh jien ngak dom jalan pasiam bruk diukrai lagaih di menuac urang pak nan haong pandiak bhang, tua riya./.