Taong abih tanut pablei lẻ pandap panda saong jien mek tame meng bruk blei pandar dalam bilan 2/2022 di TP Hồ Chí Minh hu 89.093 tỷ đồng, tagok 0,4% dut saong bilan dahlau saong tagok 0,9% dut saong tukvak ini thun blaoh. Min, kuhria dalam 2 bilan akaok thun 2022, taong abih tanut pablei le pandap panda saong jien mek tame meng bruk blei pandar hu  177.803 tỷ đồng, trun 6,6% dut saong tukvak ini thun blaoh. Langyah ka makna ba tal bruk abih tih tanut pablei le pandap panda saong bruk blei pandar dalam ban trun, dom labik ngak pandap, pablei salih di TP Hồ Chí Minh ndom lac, yaom xăng, manyek tagok gam gam ngak pambak tal prein blei di darak pasa. Abih di nyu nan lac, bahrau ini, yaom xăng, manyek tagok tal tanut glaong di abih hadei di 6 mbang tagok yaom ngak pambak tapak tal bruk blei pandar yaok harei di bhap bini.

Tui Cục yaok pataom Đồng Nai, dalam  2 bilan akaok thun 2022, bruk pablei tabiak negar langiu di dom doanh nghiệp  dalam tỉnh hu labaih  4,4 tỷ USD, tagok jiak 32% dut song tuk vak ni thun dahlau. Dalam tuk nan, blei tame jiak  2,9 tỷ USD, tagok labaih  9% dut song tuk vak ni thun 2021. Yau nan,, Đồng Nai hu  pablei tabiak negar langiu rilo jang blei tame labaih  1,5 tỷ USD, lac glong di abih dalam 3 thun tapa. Nyaom pandap pablei tabiak negar langiu prong di abih lac jamriak thiết bị, pandap phụ tùng; pandap kayau; takhaok dep; pandap jhik; máy vi tính, pandap điện tử song linh kiện. Darak pasa pablei tabiak negar langiu lac Mỹ, châu Âu, Nhật Bản. Bruk pablei tabiak negar langiu di  Đồng Nai tagok khang lac kayua jit COVID-19 hu pasang iek song doanh nghiệp jhul khang bruk sản xuất, duah hu rilo labik blei pandap.

Bier harei kabroi 2/3, jabat lambaok negar Việt Nam daok di Nga hu peih nyaom biai haong urang lambaok dom doanh nghiệp Việt Nam daok di Nga piah ginum biai jalan pacang dom bruk cấm vận di phương Tây ba tabiak ka kinh tế saong jien padai di Nga kayua bruk quân sự đặc biệt di taneh ia ini di Ukraine. Dom pandap panda di Việt Nam pablei tapa Nga biak rilo saong daok tagok. Min, dom bruk rahtabiak dalam adit tapa nyu pambak rilo tal dunya saong bhum taneh, ngak srau kadau taong abih raidiuk di rilo bhap bini Việt Nam jang yau bruk pablei salih di doanh nghiệp Việt Nam daok di Nga. Urang lambaok taneh ia, ong Đặng Minh Khôi brei thau lac, tapa dom panuac rik tame, jabat lambaok negar meda hu dom panuac caong tuk camereip piah lang talaih dom kan kandah di urak ini, tapa nan ngak tani tanat bruk pambuak gauk di gah kinh tế - pablei salih di Việt Nam saong Nga.

Dalam 2 bilan akaok thun 2022, yaom lac oh ka tame bilan tong chap  dalam thun, min dom urang tong ikan di Tiền Giang nao tong chap hu jiak  20.000 tấn kaya ikan dom janih.Tiền Giang kham merat taong cap dalam thun hu  labaih  125.000 tấn kaya ikan dom janih piah pabak ka drak pasa dalam taneh ia song  chế biến pablei tabiak negar langiu. Gam haong nan, khik ka bruk nao tasik meng kan  di  tỉnh patagok khang kajap song ba bruk ngak ka urang ngak song an sinh xã hội.

Tukvak tapa, di Bà Rịa– Vũng Tàu rahtabiak bruk dom sruh gilai taong ikan daok taong cap di bhum tasik, yau ye: vak ikan, lưới rê, pataom mek saong dịch vụ pambuak tal bruk taong ikan pagam pambak tame bruk oh catang di Sarak 48 di Thủ tướng Rajaei ka bruk daong jien manyek piah mek laba ka drei. Rilo sruh gilai oh hu mbaok tame bruk taong ikan di labik  nhắn tin tui adat bo blei mac ka gilai saabat karei piah nhắn tin brei. Paok jien daong meda hu parabha tui tỷ lệ sanya di dua sruh gilai. Piah patrun saong yam tal palahik bruk bhap bini duah laba oh njauk meng Sarak 48, tỉnh Bà Rịa – Vũng Tàu hu pato tacei dom jabat chức năng pasang iek catang dom bruk ngak di gilai taong ikan di mangaok tasik, pacang cakak labik dom po gilai ngak suan piah pasang iek saong langyah biak catang. Daok po gilai halei bo khin ngak suan meda payua tapa công an langyah tui adat hukum.

Jiak 2 thun meng di tuk Ấn Độ yam tame bruk pacang veik prong abih di dunya, piah pacang cakak bruk njom mbak di jit COVID-19, rilo labik di taneh ia Nam Á ni daok mai veik raidiuk yau dahlau daih, tuk urang njom ruak trun, dom urang njom di tanut ala  10.000 urang sa harei, dalam 3 harei gam. Di bang Gujarat, dom drak pasa hu peih veik hadei di sa tuk vak atah kreih pabah mbang. Dom jalan praong bak menuac tuk urang gilac mai ngak bruk, dalam tuk dom  rạp chiếu phim hu tuai tagok khang. Di ban Gurugram jiak ban ine New Delhi, dom  nhà hàng song kuan main game jeng bak menuac urang .

Hãng thông tấn TASS harei kabroi ba panuac di Akaok kapul ginum biai Nga brei thau, bruk caong peih jalan ngak meda hu ginum biai di mbang ginum biai ka 2 ngan haong gah Ukraine. Taphia di nan, dom urang ngak praong Nga meda ndem biai nao mai ka dom bruk batabiak di Nga pambuak tal, tapa sa sarak padieh cuh chip. Urak ini, kapul ginum biai di Nga hu mbaok di labik kuhria lac meda peih mbang ginum biai ka 2 di bhum Bê-lô-vê-ska-da Pút-cha (Belovezhskaya Pushcha) di jalan tapen negar Belarus haong Ba Lan. Dalam tuk nan, rajaei Ukraine jeng brei thau lac kapul taneh ia ini daok angaok jalan nao saong tui kuhria hu mbaok di labik ginum biai dalam harei ini.

Harei ni, Akaok mintri jien padai Japon,ong Sư-zư-ki-syn-i-chi (Suzuki Syunichi) brei thau: Japon  brei kreih gac 4 gilang pariak di Nga dalam mbang peih bruk tong phạt Nga. Yau nan, hu 7 gilang pariak di Nga daok dalam nyaom njauk tong phạt di Japon. Dalam tuk nan, Japon  jeng dok pasang iek peih ngak dom jalan tong phạt ngan song Bê-la-rút (Belarus)-taneh ia hu mong lac  pachreih tui  Nga dalam bruk mesruh haong Ucraine./.

Urang lang: Thu Thảo & H.Pha – 2/3/2022