Page ini, di tỉnh Bến Tre, Mentri Ngak nong saong Patagok palei pala pambuak haong UB bhap bini tỉnh Bến Tre peih bruk khan thau Sarak di Thu tuong Rajaei mbaoh tangin Quy hoach he thong Tapen ikan saong Labik pataok gilai ikan  plaik njiak ribuk vaktu 2021-2030, pamong tal thun 2050. Tui nan, mbiah tal thun 2030, taong abih dalam negar hu 173 tapen ikan. Dom labik tapen ikan hu prein brei labaih 2 trieu 9 ribau 8 pruh rituh tấn kaya ikan yaok thun; brei ngak bruk khik iek hu bruk taong chap ikan, brei thau ikan nan taong chap meng halei mai, pacang dom bruk chap mek kaya ikan  njauk hukum. Tui nan, hu 160 labik pataok gilai ikan plaik njiak ribuk, pabak bruk pataok labaih 90.600 gilai ikan.

Di tuk pahadar 77 thun Harei TBLS (27/7/1947 – 27/7/2024), mesup ini (19/7), Bí thư Tỉnh ủy Hậu Giang Nghiêm Xuân Thành hu mai ravang, alin pandap ka amaik VNAH, dom TB di huyện Vị Thủy. Di dom baoh sang, Bí thư Tỉnh ủy Hậu Giang cong dom amaik VNAH, dom thương binh, urang buh prein ka CM khik iek prein yava, pato pakai anek kamuan, pachreih ba mikva dalam palei khik ramik, patagok ilamu cách mạng meng kan, rik daong dak padang taneh ia, puk paga, palei negar dak harei dak kaya mada, khang kajap. Tỉnh Hậu Giang hu labaih 36.000 menuac hu buh prein ka CM, abih di nyu lac hu 2.042 amaik VNAH, urak ini daok diuk 43 amaik (dom amaik jeng hu iek glang, sangka, raong duh tal luac rai)

Mban peih bruk “Jalan nai meriah bhong” pakat negar saong Mban jak ba halan hatian brei darah tỉnh An Giang birau peih bruk “Harei pataom halan hatian brei Darah meriak bhong An Giang saong pok meyaom urang brei darah naih gheih thun 2024” di ban Long Xuyên. Tapa nan, Mban tacei ba jalan  hu meyaom 3 kapol nyaom, 10 baoh sang, 31 urang naih gheih ngak hu rilo bruk siam dala  bruk jak ba halan hatian brei darah thun 2024. Di tỉnh An Giang, bruk jak ba gauk halan hatain brei darah meng thun 2004 mbiah tal thun 2023, dalam tỉnh jak ba hu jaik 25.000 đơn vị darah.

TP Hồ Chí Minh daok kuhri kuhria peih ngak dom bruk hu jalan radaih brei ka radaih juak dalam pasak ban raya saong rah tui jalan metro. Dalam nan, brei caik hatai hu sơ đồ dom jalan pambuak haong dom sang ga metro, labik pataok, dom labik đô thị rah tui jalan metro, dom labik du lịch, pasak pablei salih... pambuak haong peih bruk nao mai, padang mẫu ka yaok jalan, hu ginup vạch sơn biển báo; saong pambuak pagam salamat di dom canah 4 jalan atau di dom labik tapa jalan, pok tagok Sở GTVT piah duah thau hatai sahneng di dom sở, dom gah dahlau di harei 30/7.

Tui So Ngak nong saong patagok palei pala tỉnh Bà Rịa-Vũng Tàu, kuhria tal urak ini, dalam tỉnh hu 24 mã bhum pala piah pablei tabiak negar langiu, 3 mã papaok patei pablei tabiak negar langiu saong 68 mã bhum taneh pala baoh kayau dalam bhum, tagok 33 mã bhum pala dut saong thun 2023. Dom mã bhum taneh pala pablei baoh kayau tabiak negar langiu di dom darak pasar Hoa Kỳ, Eu, Australia, Nhật, Trung Quốc...Ngan dom janih baoh kayau: patei, kruac bung kalik hijao, durian, darang, thanh long. Langiu di nan, tỉnh daok padang ngak dom mã bhum taneh pala piah pablei dalam ia hu dom janih phun pala: padai, njam patam yaok janih, cacao, amriak kalu, darang baoh praong, mang cụt, durian, brei java …Bruk pamong tal praong abih di tỉnh lac padang ngak thaot binguk cambaic laic, bruk ngak gah kaya nong Bà Rịa – Vũng Tàu.

Tổng thống Mỹ dahlau daih, ong Donald Trump  taduan panuac di đảng Cộng hòa tabiak pakacah ngak Tổng thống di puac thun ini. Ini lac mbang ka 3 gam gam ong Trupm tabiak pakacah ngak Tổng thống Mỹ kuhria meng di thun 2016. Dalam harak ndom puac di Nyaom roya pakat negar di đảng Cộng hòa peih tabiak di bang Wisconsin bahrau ini, ong Donald Trump ndom lac: Bruk oh njauk gauk saong neh rabha dalam xã hội di kol drei brei hu pambuak veik samar drah. Urang Mỹ njauk jum pataom gauk kayua hu sa jeng ji, sa thar vak haong gauk. Kol drei ba gauk dang tagok atau ba gauk ngak oh hu hagait. Dahlak tabiak pakacah ngak Tổng thống ka taongabih taneh ia Mỹ oh lac ka sa meteh taneh ia Mỹ.

Dom urang roh duah di Đại học Cambridge (Anh) hu pandar AI piah patagok sa ilamo meda duah mboh aval ruak Alzheimer.  Tui kuhria mboh dahlau, yaok 3 giay hu sa urang di dunya njauk ruak Alzheimer, dom urang ruak nan hu kuhria mboh dahlau meda tagok 2 mbang dalam 50 thun anak tal. Tapa nan brei mboh bruk tagok glaong meng Gah Y te dunya hu pajadrah dom urang roh duah di Đại học Cambridge negar Anh roh duah ngak brei patagok sa tri tue nhan tao piah langyah dữ liệu tapa bruk thaok binguk cộng hưởng từ.

Sa ban sit di negar Prang hu pandar 2 drei inta nao rah tui takai tasik haong sa baoh kadung angaok ka-ing piah pataom mek nerak. Janih athur ini dane angan haong bruk oh menyum rilo ia, biak lagaih haong langik pandiak saong nao takai angaok cuah. Nan ye biak lagaih haong bruk pataom mek nerak di takai tasik. Tui dom urang jakar brei thau, bruk ngak ini piah paglaong hatai sahneng di yaok urang ka bruk oh prah nerak ban glai ban klo kayua urak ini oh hu dom thung nerak di takai tasik. Gam haong nan, menuac sia di ban sit jeng hu pachreih tuai damuai ba nerak nao sang atau buh tame dom thung nerak caik di jhung takai tasik piah ngak pandar veik./.