Sang bac đại học Cửu Long bahrau khan lac meda alin paok jien bac ka sinh vien bahrau urang bangsa Khmer di dom tinh, ban bhum ĐBSCL hu rilo mikva bangsa Khmer daok. 45 paok jien bac hu jao alin ka tỉnh Vĩnh Long 15 paok; dom tinh An Giang, Bạc Liêu, Hậu Giang, Kiên Giang, Sóc Trăng, Trà Vinh yaok tinh 5 paok. Sang bac meda payua harak ka Mban Bangsa dom tinh, ban piah brei thau dom sarak daong brei di sang bac, piah ka dom tinh, ban peih bruk pilih ruah, mayaih khan.

Tatua Bạch Đằng 2 nao tapa kraong Đồng Nai hu pambuak pagam. Tatua Bạch Đằng 2 haong 2 jalan tagok tatua atah abih tih labaih 2,8km. Abih tih yaom jien buh tame ngak lac labaih 420 tỷ đồng meng kadung jien karja tỉnh Bình Dương saong tỉnh Đồng Nai. Liên danh nhà thầu daok pataom menuac, jamriak peih bruk padang ngak luac harei melam, kham merat brei radaih nduac tapa di tuk lễ 2/9 thun ini. Hadei di tuk ngak salah, tatua Bạch Đằng 2 pambuak tapak huyện Vĩnh Cửu (tỉnh Đồng Nai) saong TP. Tân Uyên (tỉnh Bình Dương). Ini lac tatua ka 3 pambuak pagam 2 tỉnh ini, hadei di tatua  Đồng Nai angaok jalan Roya 1A saong tatua Thủ Biên. 

Tukvak tapa, cu tri di dom phường pak TP. Vũng Tàu, tỉnh Bà Rịa – Vũng Tàu hu khan brei thau ka bruk rilo sruh radaih ô tô pataok, padeih di dom labik jalan sit ngak kan kandah tal bruk nao mai di rahra, mbuan ba tal kan kandah tuk hu bruk daong urang njauk bala, daong ka bruk pacang khuah padam khuah. Kayua yau nan ye, UBND TP. Vũng Tàu ieu kakei dom puk palei pasang iek, peih bruk mjak ba, ieu kakei po radaih payua radaih, oh pataok radaih di takai jalan, di jalan sit hu mbaok jalan praong mala 6 mét ngak kan kandah tal bruk nao mai. Mayah urang halei oh ngak  tui meda ngak harak taong phat.

Urang ngak nong tỉnh Long An daok trun pajaih padai bilan hè thu. Gah ngak nong hu panuac kakei urang ngak nong oh trun pajaih aval tuk mboh oh ka lagaih, abih di nyu lac ia taba piah pruh. Bilan hè thu thun ini mboh lac daok hu rilo kan kandah kayua langik tasik, di puac vụ hu hajan, ribuk meda ngak brei trun năng suất saong chất lượng padai. Nan ye mikva urang ngak nong brei caga dom jalan pala ngak piah ka bilan padai hè thu mek hu siam mekre. 

Jabat Cảnh sát hình sự Công an tỉnh Bạc Liêu bahrau pambuak bruk haong dom kapul pambuak tal taong tayah hu nyaom 9 urang peih bruk ma-in mbia saong ma-in mbia tui jalan cá cược caoh mbanh di mangaok mạng Internet iek tui bruk caoh mbanh jai vô địch Châu Âu (Euro 2024) saong Jai vô địch caoh mbanh Nam Mỹ (Copa America 2024). Pasang iek labik daok di dom urang nan pak ban Bạc Liêu, gah chuc nang hu cap khik rilo pandap panda hu pambuak tal. Tapa pasang iek, Jabat Cảnh sát hình sự, Công an tỉnh Bạc Liêu tuk camriep brei thau lac, paok jien di dom urang mek pandar piah cá cược tapa dom mbang caoh mbanh lac labaih 10 tỷ đồng.

Ngoại trưởng Mỹ Antony Blinken hu tabiak tuyên bố báo chí ieu Trung Quốc ngak njauk tui panuac kaoh di Tòa trọng tài thường trực ka tasik Biển Đông thun 2016. Ngoại trưởng brei thau, Mỹ daok huac lac dom bruk ndok quyền ngak po di Trung Quốc ngan saong dom labik dalam thẩm quyền hàng hải di Việt Nam, Philippin, Malaysia saong Brunei labik tự do jalan tasik saong jalan par di kapal haoh hu ngak tui hukum dunya. Ngoại trưởng Mỹ ndom lac, bruk ngak njauk tui hukum tasik dunya hu brei mboh dalam Công ước Liên hợp quốc ka Hukum tasik thun 1982, ba mai kein laba ka dunya saong praong di abih lac ka hòa bình, sron mbon saong ginup meda di yaok taneh ia. 

Bruk mesuh gauk di Myanmar dui atah saong oh padeih tagok glaong dalam tukvak tapa ngak ka rilo tập đoàn, doanh nghiệp Thái Lan njauk suak mek paok jien buh tame tagok tal 253 tỷ baht (labaih 7 tỷ USD) tabiak truh darak pasa sarau kadau ini. Bruk dom gah đầu tư Thái Lan suak mek phun jien biak khang tabiak truh darak pasa Myanmar daok ngak ka kinh tế Myanmar dak harei dak laik tame kan kandah. Jabat ini harei 5/7 kuhria mboh lac kinh tế Myanmar tok patagok di tanut 1,5% dalam thun ini.

Dữ liệu di EU ba tabiak brei mboh lac, menuac di cư tame dom taneh ia dalam Liên minh châu Âu ngak brei tagok menuac sia dalam EU di thun 2023, yaom lac bruk ndih tapui anek daok takik jang dom menuac matai. 27 taneh ia EU daok tagok menuac sia dalam thun ka 2 gam gam, meng 447 triệu tagok labaih 449 triệu menuac di thun blaoh. Dalam tuk nan, bruk ndih tapui anek di EU jeng daok trun kuhria meng thun 2012. Bruk ini gam haong bruk menuac sia daok taha nao, ngak ka urang mboh suh suh ka bruk kurang menuac ngak saong kadung jien phúc lợi taneh ia./.