Tui Sở Pato megru Tây Ninh, hadei di 3 harei brei ka anek saih gialc veik tame bac tapak di sang bac, jeng daok hu jaik 9.000 anek sinh, uranaih mầm non oh ka tame sang bac; dalam nan, uranaih tame bac tapak di sang bac mam non birau hu 86% kayua rilo amaik ame oh ka sahanang hatai. Hu thau, tal harei 16/2, di Tây Ninh hu labaih 9.450 uranaih umo 5 thun tame sang bac, sumu 68, 26%, urak ini jeng daok 4.395 uranaih oh ka tame bac tapak di sang bac. Kayua lac dom amaik ame daok cang tal tuk sang bac peih bruk daok veik mbang ndih jala pandiak atau huac njom ruak Covid-19. Bruk njauk ndem tal nan lac dalam 3 harei tapa, Tây Ninh oh hu F0 di sang bac meng hu ngak siam bruk dut iek dahlau di sang. Tui yaok pataom hu 29 anek saih lac F0 min hu thau aval yau nan ye oh tame sang bac, oh ngak njom mbak ruak dalam tuk bac.

Hadei di harei ia bilan bak baoh, rilo sruh gilai praong (labaih 15m) di urang taong ikan di Bình Thuận hu tabiak tasik gilac veik. Di tukvak ini, yaom lac yaom xang manyek saong dom janih karei nyu tagok, min dom po gilai saong dom urang nao tasik jeng daok chrieh chrai tabiak tasik, ngan haong hatai jia lac mbang tabiak tasik akaok thun meda ba mai rilo ikan, hadang. Tui ilamo di dom urang taong ikan lavik thun, di dom harei ini, langik di mangaok tasik biak lagaih ka bruk taong cap kaya tasik. Dalam thun 2021, yaom lac gaok kan kandah di jit ruak COVID-19 min kaya ikan di Bình Thuận jeng taong cap hu 225.211 tấn, tagok 1,8% dut saong thun 2020.

Sang iek ruak Đại học Buôn Ma Thuột di phường Tân An, ban sit Buôn Ma Thuột, tỉnh Đăk Lăk birau peih pakak saong  ba tame ngak bruk. Ini lac sang iek ruak di Sang bac Đại học Buôn Ma Thuột saong lac sang iek ruak langiu karja akok meti di bhum Tây Nguyên hu buh jien tame ngak saong cak rok aptagok  tui jalan Viện - Sang bac, pambuak bruk roh duah saong patao pakai, dut iek saong taong ruak.  Sang iek ruak Đại học Buôn Ma Thuột hu yaom jien buh tame ngak abih tih lac labaih 600 tỷ đồng, hu 200 laneing ndih iek ruak.

Ong Nguyễn Văn Lâm, Phó Giám đốc Sở Lao động Thương binh saong Xã hội Ban raya Hồ Chí Minh brei thau, kuhria tal urak ini, Ban raya Hồ Chí Minh daok 924.098 urang njauk kan kandah kayua jit ruak COVID-19 di 3 quận, huyện lac Củ Chi, Bình Tân, Bình Chánh hu ginup dom asal kadha min ka oh taduan hu jien daong mbang ka 3. Bruk bhap bini ka oh taduan hu jien daong, lac kayua dom labik ini biak praong, bhap bini rilo, bhap bini salih labik daok biak rilo nan ye bruk biyar jien gaok rilo kan kandah. Sở hu pasang iek, pataom abih tih dom urang saong hu harak payua tal Sở jien padai piah likau UBND Ban raya Hồ Chí Minh pabak jien padai ka dom quận, huyện ni piah ngak salah bruk biyar jien daong ka bhap bini dalam tukvak anak tal.

Piah thau dhar phor saong pok meyaom dom bruk ngak di dom y, bác sĩ, Sang iek ruak Quân y 175 (TP Hồ Chí Minh), labik meda peih ngak lakhah ka 20 gu urang jakar, urang ngak bruk di Sang iek ruak di melam 20/2 anak tal. Dom gu yau nan hu mbaok tame pacang caga jit Covid-19 saong kayua tavak jit ruak njauk kadun tukvak lakhah. Di ndam lakhah peih ngak tui kapol nyaom nan daok hu danak dak daoh tamia ngan saong kadha “ Mạch sống”. Danak dak nghe thuat hu peih ngak  caong khin tapa nan brei thau dhar phol tal dom urang ngak bruk labik akaok pacang caga jit  saong abih di nyu lac ndem tagok dom bruk anit ranam daok kadauk dalam hatung hatai di manuac sia Viet Nam.

Harei kabroi, sa ribuk tuh tame Pasak châu Âu ngan haong ngin khang tagok tal 181 km sa tuk, ngak kan kandah tal bruk nao mai di rilo labik. Tui pathau khan oh ka ginup abih, hu takik di nyu lac 6 ureang metai di dom labik hu ribuk tuh tame. Di Ba Lan, hangin khang ngak khut tayah biak trak labaih 500 baoh sang, jaleih yaok rituh phun hijao saong ngak ka 325.000 baoh sang dalam taneh ia lahik điện hadei di sa melam. Cảnh sát brei thau lac 2 urang metai saong 2 urang karei njauk rambuac hadei di tuk ribuk ngak jalieh sa sruh radaih cần cẩu praong di sa labik padang sang danaok saong 1 urang peih radaih metai kayua phun jalieh katiek tagok radaih.

Akok Mentri Jien padai Nga Anton Siluanov birau ini hu panuac lac, dom jalan taong phạt di phướng Tây pamaong tame kinh tế  Nga meda ngak brei darak pasar sraw kadau, min taneh ia ini meda pacang hu dom meng hlau ameh piah caga saong jien ndo negar langiu biak ralo, rajaei khik brei taong abih jien payua tame gilang pariak saong taong abih jien buh tame saong mek tabiak, kuhria gam jien negar langiu hu siam lagaih. Panuac nan hu ba tabiak dalam tuk urang ngak praong di Mỹ saong châu Âu daok ngak brei salah paok taong phạt Nga.

Trung Quốc bahrau hu panuac ieu Ấn Độ maong iek samu gauk ngan haong dom doanh nghiệp daok buh jien tame di taneh ia ini, hadei di tuk Niu Đê-li (New Delhi) pakauk 54 ứng dụng di Trung Quốc kayua huac lac ngak srau kadau saong pasang iek rilo jabat di Huawei.  Panuac di Bắc Kinh hu ba tabiak hadei di tuk Ấn Độ rilo mbang hu dom bruk ngak pamaong tame dom doanh nghiệp saong pandap panda Trung Quốc di taneh ia ini./.   

Urang lang: Thu Thao & A.Nghiem -19/2/2022