Ngak tui tacei pato di Thu tuong Phạm Minh Chính, Mentri LĐ, TB saong XH birau hu harak brei thau ka bruk padeih Tet Nguyen dan, Harei Negar saong hare Jayak 30 bilan 4 dan haong Harei Dunya urang ngak 1/5 dalam thun 2025. Dalam tuk padeih Tet saka ia bulan thun nasak Ula Naih 2025: Urang jakar, vien chuc, urang ngak hu padeih 9 harei, meng harei 25-1 mbiah tal harei 2/2/2025, nan lac harei 26 bilan mat thun nasak Girai tal harei 5 bingun bilan Tha thun nasak Ula Naih. Kuhria abih tih lac 9 harei patui gauk.

Page ini (4-12), Mban chap hanh Ndang bo TP.HCM mbang ka XI tukvak 2020-2025 hu peih Nyaom biai mbang ka 34. Di mbang nyaom biai, Bi thu Ban uy TP.HCM Nguyễn Văn Nên brei thau, thun ini, Ban uy TP.HCM hu tabiak jalan ngak GDP 7,5 - 8%. Ndang bo rajaei Ban hu patagok prein ngak di drei, lang talaih rilo bruk kan kandah, jhul tagok kinh te – xa hoi. Patagok GDP 7,17%, phun jien mek tame dalam thun tapa 500.000 ty, tagok 12% dut saong thun 2023, rik daong 27% abih tih kadung jien karja.

Tatua Nhơn Trạch atah 2,6 km tapa kraong Đồng Nai, pambuak Ban Thủ Đức saong huyện Nhơn Trạch, tỉnh Đồng Nai kuhria tui jien labaih 1.600 tỉ đồng, di jalan Vành đai 3, kuhria mboh dahlau meda ngak salah di harei 30.4.2025. Ini lac tatua praong abih di jalan Vành đai 3 TPHCM, di danak dak 1A, jalan Tân Vạn - Nhơn Trạch. Tuk ngak blaoh ba tame pandar, dom radaih peih meng jalan drah samar TPHCM - Long Thành - Dầu Giây hu mbuan lagaih tuk nao mai tapa tatua Nhơn Trạch tal Đồng Nai, pambuak dua bhum taneh ni. Tui kuhria mboh dahlau thun 2026, taong abih jalan Vành đai 3 atah labaih 76 km meda ngak salah, pambuak  TPHCM saong Đồng Nai, Bình Dương saong Long An. 

Huyen Hàm Thuận Bắc, tinh Bình Thuận daok peih ngak bruk pato sap Cam dalam dom sang bac tieu hoc, piah khik ramik saong patagok ilamo bhap bini bangsa Cam. Dalam thun bac 2024-2025, hu 3 sang bac tieu hoc hu mbaok tame pato sap Cam, ka 527 anek saih. Dom tal bac saong dom anek saih bac sap Cam jeng hu rilo tagok tapa dom thun bac brei mboh bruk sangka iek praong di karja palei ka bruk hu yaom glaong di bruk khik ramik sap ndom panuac puac bangsa takik saong ilamo bangsa.

Urak ini, ia mbak njom tame dom labik pabah kraong di bhum taneran kraong Cuu Long  dak harei dak tagok. Jalan ia mbak 4 angaok sa ribau tame dalam meng 15 tal 20km. Tui Cục Thuy loi, ia mbak njom tame dalam bilan pandiak thun ini glong jang  dom thun dahlau, min oh catang. Langiu dom tinh An Giang, Đồng Tháp saong Ban Cần Thơ ye dom tỉnh daok veik ia mbak meda njom tame dalam  dom kraong praong, ngak kan kandah tal bruk daok dang saong ngak mbang di mikva. Meng bilan pandiak thun ini, brong pacang ia mbak caga ia taba Nguyễn Tấn Thành di tỉnh Tiền Giang saong Rạch Mọp di tỉnh Sóc Trăng ba tame pandar, brei pabak ia pandar ka labaih 800.000 bhap bini daong ka dom bhum palei caga bilan tua riya pandiak thun ini.

Hadah page ini, tong thong Han Quoc hu ba tabiak bruk brei tah klak bruk thiết quân luật kayua ta-eng drei ba tabiak hadei di dom tuk dahlau nan.  Min, bruk ini jeng ngak cuang kandah chinh tri dalam negar. Bruk thiết quân luật ba mai dom khat lahik kinh te Han Quoc. Urak ini jien đồng Won Hàn Quốc trun tal tanut biar abih lac 1.430 won/USD. Rilo kongti yulit negar langiu brei tayah klak dom tour yulit nao me-in di Han Quoc. Ini meda lac bruk camereip dalam bruk cuang kandah chinh tri - quan su saong ngak neh rabha praong dalam negar Han Quoc.

Tha pluh ban di dunya, dalam hu ban Vũ Hán di Trung Quốc mek hu yai thưởng “Ban Bac megru thun 2024” di Gah Pato megru, Ilamo saong Ilamo di LHQ. Dom Ban bac megru Dunya di UNESCO hu 356 ban di dunya hu labaih 390 trieu urang. Dom ban nan hu daong  saong jhul pakhang bruk ndem biai nao mai ka sarak, bac megru di klak rabha haong gauk dom bruk ngak hu siam di dom ban dalam nyaom, tui nan daong ka bhap bini di ban padang ilamo bac megru luac raidiuk jeng yau piah cakrok patagok bhap bini khang kajap.

Ruak oh thau tani tanat mai meng halei ngak metai 143 urang di Cong hoa Dan chu Congo dalam bilan 11 meng blaoh. Dom urang njom ruak hu mboh yau ruak kum, hu pandiak khang saong pandik akaok khang. Bruk ini biak njauk duh hatai tuk bo urang ruak dak harei dak rilo. Kapul Y te Dunya taduan hu bruk kakei dahlau ka ruak ini saong daok pambuak haong Mentri Y te DRC piah hu pasang iek dalam jang./.