Di tuk pahadar 47 thun Harei Peih paha gah maraong, yasa taneh ia (30/4/1975 - 30/4/2022), melam kabroi, Thành đoàn TP.HCM peih bruk truac din hadar dom anh hùng, liệt sỹ. Di pak nan, urang par akaok TP.HCM gam haong dom kapul dam dara hu cuh gilau anak rup patau amaik Việt Nam anh hùng, truac din tagok labaih 15.000 baoh kubo dom liệt sỹ piah brei mboh hatai ike praong. Rilo thun tapa, dam dara ban raya kham merat hu mbaok tame dom bruk thau dhar thau phor meng dom bruk ngak gheih, yau ye padang ngak, sangka iek glang, ngak gheih rup patau hadar, kubo liệt sĩ; sangka iek glang amaik Việt Nam Anh hùng, jao alin sang anit ranam, rivang, pachreih ba, sangka iek glang prein yava thương, bệnh binh, gauk gar di sang liệt sĩ, urang hu buh prein ka cách mạng.

Meng harei 29/4 tal harei 3/5, di palei Ilamu - Du lịch dom bangsa Việt Nam (daok di Đồng Mô, Sơn Tây, Hà Nội) hu peih ngak dom bruk ndung bak ilamu dom bangsa bhum Tây Bắc, Đông Bắc, piah salam uan harei peih paha gah meraong negar, yasa taneh ia 30/4 saong Harei Dunya urang ngak 1/5. Dalam dom bruk ngak tuk padeih lễ, njauk ndom tal di abih lac labik darak bhum glaong haong dom janih pandap mbang huak meng kan, ilamu bangsa, kadha me-in di bhap bini dom bangsa Dao, Mông, Thái, Tày, Nùng ...

Piah khik tani tanat trật tự, salamat jalan mbak dalam tuk peih dom bruk thể thao salam uan lễ 30-4 saong 1-5, Sở jalan mbak pajeng ba TPHCM meda  ramik veik bruk nao mai di rilo jalan bhum pasak di ban raya. Tui nan, brei takik veik atau pakauk dom sruh radaih nduac di dom jalan yau ye Lê Duẩn - Đồng Khởi - Lê Lợi - Nguyễn Huệ - Lê Thánh Tôn -Tôn Đức Thắng ... Ngan haong dom jalan njauk pakauk nduac, Sở hu ba tabiak jalan salih. Urang peih radaih tuk daok nudac di pasak Ban raya njauk ngak njauk tui panuac pato tacei di kapul tacei jalan di jalan mbak atau tui pato tacei di hệ thống báo hiệu.

Bruk pataom mek veik drap ar lahik, njauk meblah mek dalam dom vụ án tham nhũng, kinh tế daok hu dom jabat peih bruk tố tụng caik hatai sangka; tui nan, meng akaok thun tal ini hu khik mek, kê biên drap ar, pacang veik tài khoản, pacang cakak giao dịch drap ar hu yaom labaih 2.050 tỷ đồng saong rilo drap ar hu yaom karei karei; jabat thi hành án dân sự hu pataom mek veik jaik 4.000 tỷ đồng.

UBND tỉnh Lâm Đồng hu pathau khan tal Sở Ngak nong saong patagok palei pala, dom po gilai, kapul, doanh nghiệp, baoh sang, manuac urang pambuak tal, meng harei 26/5/2022 brei padieh bruk taduan harak gar likau adat pah gilai piah peih bruk ngak mbang gah du lịch sinh thái, padieh padai, main sambai di dalam tỉnh mbiah tal tuk jabat chức năng ngak salah ginup harak gar njauk adat hukum saong hu panuac pato tacei cambaih laih ka bruk pah gilai tui njauk adat di hukum. Dom thun jaik di ini, tỉnh Lâm Đồng hu jeng pasak di du lịch canh nông, du lịch ala gilai. Min dalam tuk ngak, hu mboh rilo po danak daj peih ngak oh njauk adat di kanja, gaok mai ngak suan adat hukum ka bruk khik ramik saong daong khik gilai.

Rajaei Hàn Quốc khan lac brei klaak bruk pacap cuk pataih pacang mbaok di langiu jalan meng harei 2/5. Ini lac jalan ngak patui veik di Hàn Quốc piah ka bhap bini hu mai veik haong raidiuk siam mekre bahrau hadei di tuk taneh ia ini brei klaak jaik abih dom bruk pa-atah di gauk piah pacang caga jit COVID-19 meng harei 18/4, langiu di bruk pacap cuk pataih pacang mbaok.

  Meng kuhria mboh lac hu meng 60-80% bhap bini njauk COVID-19, Liên minh châu Âu harei kabroi tabiak panuac brei padieh tukvak samar drah di jit praong COVID-19 saong salih tapa tukvak bahrau pasang iek hu jit ruak tui jalan khang kajap jang. Tui nan, vắc-xin jeng lac bruk praong dalam tukvak bahrau di bruk mesuh pacang caga COVID-19 gam haong bruk cak rok patagok dom janih pacang caga virus saong patagok dom rai vắc-xin caga COVID-19 bahrau.

Sa mbang khuah glai harei 29/4 kayua pandiak bhang dui atah ngak brei khuah ralai 166 baoh sang di mbang New Mexico (gah barak negar Mỹ) saong mbuan ngak brei khuah yaok ratuh baoh sang karei kayua ngin khang daok yuk pui tal dom palei di bhum ceik. Yaok rabau menuac di pak nan daok caga nao labik karei kayua huac ngin khang meda ngak brei khuah glai pambak tapa tal dom palei di Mora Valley. Dahlau di nan, 10.000 urang njauk panduan nao labik karei. Tui kuhria mboh, pui mbang abih 26.060 hécta taneh, ngak ka mbang khuah glai ini daok dalam 15 mbang khuah khang abih kuhria meng kan mai di mbang New Mexico./.

Urang lang: Thu Thảo & M.Phuong – 29/4/2022