Tui Mentri LĐ-TB saong XH, pathau khan drah samar di 46 tỉnh, ban brei mboh hu jaik 6 trieu uranaih hu alin brei pandap, paok jien bac, ahar, keo, ia tasau, tapuk siphau, khan ao, radaih juak…ma-in sambai Tet Trung thu thun ini, kuhria tui jien labaih 370 tỷ đồng. Dom bhum palei hu pambuak dom makna meng kan di Trung thu saong makna Tet meng kan di uranaih haong dom bruk yaih khan dulich saong pandap ilamu, pandap mbang bingi karei. Peih ngak dom adat saong dom kadha main di ralo labik “Trung thu Viet Nam” brei ka adei saong tuai damuai ngan haong bruk main iek daoh tamia, kadha ma-in bhap bini saong pandap mbang meng kan.

Melam bloh, Thành Đoàn TP.HCM peih danak dak "Melam pataom ia bulan bak baoh" uan Tết Trung Thu brei ka jaik 1.000 adei đội viên, uranaih daok dalam ban haong rilo bruk ngak biak bui sambai. Dalam danak dak, Công đoàn saong Kapul dam dara Jabat Thành Đoàn TP. HCM hu 23 pok jien bac Nguyễn Đức Cảnh brei ka dom uranaih bac da-a naih joi dalam thun bac meng bloh, saong rilo pok pandap Trung thu brei ka dom adei hu mbaok tame Melam pataom ini

Di var taom gaok cử tri Ban Long Xuyên, tỉnh An Giang dahlau di mbang nyaom ka 6, QH mbang XV, Pho akok negar Võ Thị Ánh Xuân hu pang cư tri khan brei thau rilo hatai sahaneng pambuak dom gah yau khik ramik alam moi truong; pasiam Hukum Taneh riya njauk tui sumu bruk cak rok patagok di Xa hoi…Abih di nyu lac, cử tri khan brei thau rilo kadha daok tavak tave dalam bruk ngak tui danak dak pato pho thong birau, abih di nyu nan lac bruk salih birau tapuk bac da-a. Brei panuac di var taom gaok, Pho akok negar khan lac, bruk patao megru urak ini daok rilo bruk, rilo kadha, rilo gah. Kapol urang QH tỉnh An Giang meda patui iek veik bruk salih birau di Mentri Pao megru; bruk pasang iek, tui iek di dom jabat di QH, Rajaei ngan haong ngak brei salah siam jang bruk salih birau gah pato megru.

UBND tỉnh Bến Tre daok pok tagok Mintri Bộ Kế hoạch saong Đầu tư, Mintri jien padai danak dak padang ngak Jalan radaih tapen tasik pambuak dom tỉnh Bến Tre, Tiền Giang saong Trà Vinh. Danak dak hu yaom jien buh tame ngak abih tih 7.905 tỷ đồng, atah labaih 25km. Tui bruk ba tabiak, jalan nao tapa 3 baoh kraong praong, lac kraong Tiền, kraong Hàm Luông haong kraong Cổ Chiên, ngak jeng jalan kinh tế tapen tasik hu makna praong di bhum tapen tasik gah Timur bhum ĐBSCL. Gam haong nan, peih tabiak jalan pambuak gauk gah kinh tế di dom labik dalam bhum.

Hajan hangin dalm 2 harei tapa di tỉnh Kiên Ginag ngak ka rilo baoh sang bhap bini jaleih, par tabung. Abih di nyu lac, hajan dui atah rah tabiak di 7 labik glut jaleih ceik ba tal 1 labik tame ia klaok saong dua baoh sang bhap bini di huyen Kiên Lương khut, tayah, biak patuah lac manuac oh njauk hagait. Piah pasiam bruk khut tayah hadei di bala meng langik tasik, Chi cục Thủy lợi Kiên Giang hu brei ngak dahlau peih dom brong tathuak ia di tỉnh saong pambuak hoang C.ty THHH MTV pandap thủy lợi Gah Meraong peih dom pabah kraong Cái Lớn - Cái Bé; pabah kraong Xẻo Rô piah tathuak ia, pacang ia dauk di labik dhong dalam.

Dalam mbang nyaom tiểu ban camereip abih ka pambuak gauk gah pajeng ba jalan tasik Philippines - Liên minh châu Âu rah tabiak dalam adit blaoh di Bỉ, Philippines saong Liên minh châu Âu hu panuac sanya khang ka quyền tự do pajeng ba jalan tasik saong jalan kapal haoh di Biển Đông, lagaih haong Công ước Liên hợp quốc ka Hukum tasik 1982 (UNCLOS), gam haong nan, hu panuac ieu dom taneh ia jhui pandar phao ndao ngak srau kadau dalam bhum. Dua gah jeng hu ndom tal yaom glaong di bruk iek praong quyền ngak po, quyền chủ quyền saong quyền tài phán di dom taneh ia, jeng yau dom quyền ka tasik lagaih haong adat hukum dunya, abih di nyu lac Công ước Liên hợp quốc ka Hukum tasik 1982 (UNCLOS)

Sa janih virus daok njom mbak di Australia nan lac metapneumo virus ngak brei viêm phổi di anek manuac, daok hu ieu lac hMPV. Tui Jabat chức năng, dalam adit blaoh, hu 1.168 uảng dương tính haong hMPV. Ini lac sa janih virut bhian ngak tabiak laka di jalan suak yava hanjul, min meda ba tal dom ruak biak trak jang yau ye viêm phổi. Urak ini ka oh hu vaccine atau jalan taong ruak tantu halei piah taong ruak kayua hMPV. Tui urang roh duah ilamo brei thau lac dom urang ruak trak meda hu taong ruak di sang iek ruak, mayah ruak hanjul meda taong ruak di pak sang.

Mintri Y tế Canada brei adat pandar janih vaccine COVID-19 mbang ka 2, peih jalan ka bruk klauk vaccine Pfizer bahrau meng adit tal di taneh ia ini. Tal urak ini, Mintri Y tế Canada hu brei adat pandar 2 janih vaccine bahrau di Moderna saong Pfizer. Dom urang jakar ngak praong gah y tế Canada ndom lac 2 janih ini hu prein pacang caga siam jang, pacang veik nhiễm trùng saong dom ruak trak damak