Taom gaok cử tri  di huyen Châu Thành A, tỉnh Hậu Giang dalam page ini 25/4, Ủy viên Mentri Chính trị, Pho Akok Thường trực Quốc hội Trần Thanh Mẫn hu panuac ieu Hậu Giang njauk sangka pato pakai patagok urang ngak bruk piah duh ka bruk patagok  di palei pala; dak padang he thong chinh tri hacih, khang kajap pabak  bruk ngak dalam tukvak birau. Gam haong nan hu kakei Hậu Giang brei jhul samar bruk peih phun jien di karja; ngak brei sumu gauk hạ tầng praong kajap, abih di nyu lac jalan mbak; khik kajap jum pataom, hasa jalan, patagok bruk dan chu, jhul khang  bruk salih bahrau hành chính, salih birau bruk buh jien padai tame ngak mbang; jhul khang bruk pacang caga tham nhũng, tieu cuc.

Mesup ini (25/4), Thành ủy TP.HCM pataom mbaok pahadar 48 thun harei peih paha gah meraong negar, yasa taneh ia (30/4/1975 – 30/4/2023). Brei panuac di tuk pataom mbaok nan, ong Nguyễn Văn Nên, Bí thư Thành ủy TP.HCM brei thau,  48 thun tapa, Đảng bộ, karja TP.HCM hu patagok ilamu meng kan, ba gauk padang ngak TP hu dom jak jeng praong, rik daong praong dalam bruk dak padang saong khik caga taneh ia, palei negar. Bí thư Thành ủy TP.HCM jeng ndom lac, ban raya daok dang anak rilo kan kandah bahrau, kan thau dahlau saong oh ka mboh lagaih. Min TP.HCM khang hatai piah yam tapa cuang kandah, tavak tavaiy.

Bilan 6 anak tal, tỉnh Ninh Thuận meda peih ngak danak dak “Pambuak haong bhap bini truac hadah gom di tasik”.  Danak dak ini daok dalam dom bruk peih ngak harei pataom Nho saong alak Vang thun 2023 saong taduan mek Harak di Unesco brei angan Nghe nhan ngak lan  Cam tame anagn inem krung ilamu phi vật thể njauk brei khik ramik chip. Gam tui di nan, ong Lê Văn Bình, Akok Ủy ban Mặt trận Negar tỉnh Ninh Thuận, iew  MTTQ dom palei palih ruah 200 baoh sang urang nao tasik hu raidiuk kan kandah piah jao brei pandap daong. Yaok palei palih ruah veik 10 baoh sang kathaot hu anek bac da-a naih joi, kham yam tapa kan kandah dalam raidiuk piah taduan pandap daong. 

Di rilo labik daok hu bruk anek saih njuk pakao hala điện tử, pakao hala am pandiak. Rilo adei njauk ba nao cấp cứu kayua njauk jru mek nicotine haong dom dung dịch hu dalam pakao ini. Nan ye Mintri Y tế hu panuac ieu dom puk palei gam gam pathau khan brei thau ka bruk kanjah jhak di pakao kaok, pakao điện tử, pakao am pandiak saong samar hu dom adat piah pacang caga bruk pandar dom janih pakao ini di dom labik pato megru, patagok pasang iek saong langyah catang dom bruk pablei salih, pandar pakao điện tử, pakao ngak pandiak, shisha.

Tui Pasak Kuhria mboh dahlau bruk langik tasik Pakat negar, pandiak pa-uh di Nam Bộ  meda dui atah tal harei 27/4, meng harei 28/4 pandiak meng trun hasit. Tui nan dom tỉnh ini  hu tanut tia cực tím jhak meda glong, abih di nyu dalam tuk meng mong 10 tal mon 1 kreih pandiak. Piah caga dom bruk jak di tia cực tím saong caga bruk sốc nhiệt, bhap bini tuk ngak bruk langiu pandiak njauk brei hu pandap pacang yau: khan ao anguk cuk pacang rup, tamo, ndon, camin…tuk halei  jeng brei menyum ginup ia ka rup pabhap.

Tổng thư ký Liên Hợp Quốc Antonio Guterres hu panuac ieu padang chip sa kapul pakat dunya di Haiti piah pacang cakak bruk mesruh gauk daok tagok khang saong bruk srau kadau gah ngak pahla daok jhak abih di taneh ia ini dalam dom pluh thun tapa. Haiti urak ini hu jaik 200 kapul pambuak gauk hu phao ndao daok ngak bruk. Dom băng đảng tội phạm jeng hu pasang iek tal jaik 80% ban ine taneh ia ini. Dalam sa pathau khan payua Hội đồng Bảo an, Tổng thư ký LHQ ndom veik lac, bruk hu sa kapul pakat dunya lac hu makna biak praong piah daong karja Haiti pacang mesruh gauk, pasiam veik adat hukum saong palagaih ka bruk peih bầu cử di taneh ia. Bruk ini tui kuhria hu Hội đồng Bảo an  ginum biai di mbang nyaom harei paguh (26/4).

Chile brei am cuh labaih sa trieu drei manuk ada dalam tuk jit ruak kum manuk ada njom mbak di dom trang trại di taneh ia ini. Meng puac thun blaoh, Chile hu khan brei thau dom mbang ruak kum manuk ada H5N1 di dom janih cim glai, sư tử biển - sing tasik di 13 dalam 16 bhum taneh ia. Rilo mbang jaik ini hu duah mboh di dom trang trại ngak kong ngak brei gah raong glang  dalam negar gaok kan kandah trak, blaoh taneh ia ini njauk padeih pablei manuk ada tabiak negar langiu. Bilan dahlau, Chile jeng hu bruk njom ruak kum manuk ada camereip abih  di menuac.

Sa pajaih padai bahrau meda tamuh hu dalam pandiak bhang, ia dauk ia sua saong ia njaom mbak hu dom urang ilamu Philippin roh duah, daok hu pala rilo di taneh ia ini saong dom taneh ia dalam bhum. Bruk jak jeng di janih brah ini daok di labik, dom urang ilamu hu pambuak ilamu salih gien haong ilamu pagam pajaih di rilo janih padai karei piah ngak tabiak sa janih padai siam di abih. Meng hu năng suất glaong, janih brah ini hu maong lac meda daong ka gah ngak nong pacang hu bruk biến đổi khí hậu daok dak harei dak khang di mangaok dunya.