Pambuak tal đáp án dom môn pakacah trắc nghiệm di mbang pakacah tamat THPT 2023, di mbang nyaom biai Rajaei yaok bilan di bilan 6 hu peih tabiak di bier harei 4/7, Thứ trưởng Mintri pato magru Phạm Ngọc Thưởng brei thau lac Mintri daok pasang iek dom đáp án chấm pakacah, dalam nan hu môn tiếng Anh piah khik kajap bruk samu gauk glaong abih ka kein laba di anek saih. Dalam tukvak anak tal, mayah hu ramik veik, Mintri meda samar drah pathau khan piah dom kapul pakacah peih ngak, mek hu bruk khik kajap kein laba di anek saih.

Kapul pachreih bac tỉnh Hậu Giang pambuak bruk haong Kadung jien châu Á, Pasak pato megru saong patagok di kapul pachreih bac Việt Nam peih bruk jao jien bac Kadung jien châu Á brei ka 50 anek saih kumei dalam tỉnh, yaok pok jien bac yaom 4 triệu 4 ratuh rabau đồng. Langiu di bruk jao jien bac, dalam danak dak mbang ini, mBan peih bruk daok hu peih dom bruk taom gaok, ndom biai nao mai, tacei jalan bruk ngak piah daong ka dom adei pabak dom ilamu ka bruk bac ta-a saong bruk ngak di harei hadei ka nyu lagaih.

UBND tỉnh Cà Mau bahrau brei tapa Danak dak du lịch sinh thái, padeih padei, ravang main di Bein negar U Minh Hạ tal thun 2030. Tui nan, danak dak hu 2 labik ngak bruk, hu mblang taneh praong labaih 1.300 ha ngan haong labaih 1.458 tỷ đồng. Bruk ngak di Danak dak lac pamaong tal cak rok patagok khang kajap, pambuak haong bruk khik ramik hệ sinh thái glai tràm saong parilo janih sinh học di bhum taneh U Minh Hạ; khik ramik mbaok mata glai, khik caga alam môi trường; khik siam mekre bruk peih ngak cak rok patagok du lịch haong khik caga dom yaom glaong di kaya langik tasik.

Meng akaok bilan 7 ini, ban Vũng Tàu peih ngak iek bruk mek jien pandar mbaok jalan di dom jalan. Ong Nguyễn Trọng Thuỵ, Phaok akaok UBND ban Vũng Tàu khan lac, ban hu 23 jalan hu UBND tỉnh Bà Rịa–Vũng Tàu brei adat mek jien pataok radaih angaok jalan tui danak dak “Paglaong kein laba mbaok jalan, takai jalan dalam ban Vũng Tàu”. Min bhap bini ndom lac, karja njauk kuhri kuhria veik bruk mek jien ka nyu lagaih piah oh ngak kan kandah tal bruk nao mai jeng yau ngak mbang pablei salih di bhap bini.

Bộ đội Biên Phòng tỉnh Long An bahrau taong tayah jalan pablei salih manuac meng Việt Nam tapa Campuchia. Dahlau di nan, puac bilan 6, trinh sát Đồn biên phòng Mỹ Quý Tây, huyện Đức Huệ, mboh sa sruh radaih ô tô pajeng 4 urang mboh lac tabiak negar suan hukum nan ye peih bruk pasang iek. Tapa ngak bruk, jabat chức năng mboh ini lac 3 urang daok ba sa urang tapa jalan tapen negar piah pablei ka sa công ty di Campuchia haong yaom 18 triệu đồng. peih praong bruk duah thau, gah chức năng cap khik hu 7 urang, ieu pataom 3 urang saong urak ini daok peih bruk pagui mek 1 urang. Urak ini bruk ini daok hu gah chức năng peih praong pasang iek, duah thau dom urang ngak suan daok veik.

Malaysia brei klaak bruk kaoh duas “tử hình” ngan saong dom duas khang yau pablei salih ma túy, pametai menuac, mesruh veik, cagar veik haong taneh ia saong duac cap mek menuac. Dom duas ini dahlau daih njauk “tử hình” ye urak ini dom thẩm phán kaoh duas karei iek tui bruk, yau ye mek caik guk meng 30 tal 40 thun. Dahlau di nan, meng thun 2018, Malaysia hu tabiak adat pakauk “hành quyết”, min kayua adat “tử hình” ka oh klaak nan ye dom tòa án jeng daok tabiak panuac kaoh duas “tử hình” dom urang duas, min oh hu bruk “hành quyết” halei hu peih ngak.

Dom mbang cuh phao patui gauk di bang Pennsylvania, Maryland saong Texas ngak ka 10 urang metai dahlau di harei negar 4/7 di Mỹ. Tổng thống Joe Biden hu lên án dom mbang cuh phao saongbruk taong paoh urak ini di negar Mỹ, gam haong nan, hu panuac ieu dom nghị sỹ Cộng hòa brei tapa dom jalan ngak pasiam veik hukum ka salamat phao ndao saong pakauk taong abih tih dom phao ndao cuh pametai menuac. Meng akaok thun tal urak ini, Mỹ hu labaih 340 mbang cuh phao gam gam. Mỹ urak ini lac taneh ia hu manuac matai kayua cuh phao kuhria tui akaok manuac rilo abih dalam dom taneh ia hu jien mek tame glaong di dunya.  

Hội đồng Bảo an Liên Hợp Quốc meda peih mbang nyaom kandauk di harei suk adit ini (7/7) piah ginum biai ka bruk mesruh gauk di labik Bờ Tây, hadei di tuk Israel tabiak panuac peih ngak bruk quân sự praong abih di labik ini, hadei di rilo thun. Mbang nyaom hu peih tabiak kayua Dom Tiểu vương quốc Ả Rập Thống nhất (UAE) ieu peih, kayua dom bruk daok rah tabiak njauk duh hatai di Palestine. Israel daok peih bruk quân sự pamaong tame ban Gienin meng dom mbang taong meng kapal haok trun, hu mbaok rilo lin saong jaik 150 radaih quân sự daok pacang vil val ban ini./.