Kapol ngak bruk kayua Thứ trưởng, Pho akok UB bangsa Lê Sơn Hải ba akok birau nao rivang, tadhau ayuh Tet Nguyen ndan nasak Tapai thun 2023 urang hu angan je dalam bhap bini urang bangsa takik di tỉnh Sóc Trăng. Thứ trưởng Lê Sơn Hải ndom lac, tukvak tapa, dom urang hu angan je tuk halei jeng ngak siam bruk pambuak đảng, karja, bhum palei haong bhap bini; pagap dreih yau tangin pambuak atah  piah pathau khan, pambak praong bruk jak ba bhap bini bangsa takik peih ngak siam jalan tacei ba, sarak di Ndang, hukum di karja; lac pasak dak padang  bruk jum pataom bangsa. Tapa nan, Thứ trưởng Lê Sơn Hải hu alin brei 100 paok pandap ka urang hu angan je dalam tỉnh Sóc Trăng saong payua panuac tadhau ayuh tal dom urang hu angan je dalam bhap bini bangsa takik jeng yau dalam bhap bini tỉnh Sóc Trăng uan raok sa bilan xuan siam mekre, haniem phol saong rilo jak jeng.

Kapul ngak bruk di Tỉnh uỷ, UBND tỉnh Kiên Giang hu nao rivang, tadhau ayuh Tet saong alin pandap Tet ka dom tapon nyaom bol par phao kraong, sang sarak kanja, urang hu buh prein ka taneh ia, urang praong thun daok di xã kaoh pulao atah abih di tỉnh- xã Thổ Châu (di ban Phú Quốc) uan salam Tet Nguyen Ndan thun sak tapai 2023. Urak ini Thổ Châu mek hu 8/19 kadha padang ngak palei pala bahrau, rahra daok di kaoh pulao rilo meng ngak mbang gah duh ka bruk ngak ikan, ngak mực, ikan thu, raong glang, taong cap kaya tasik di vil val kaoh pulao. Ong Lâm Minh Thành, akaok UBND tỉnh Kiên Giang brei thau lac, tỉnh meda patui veik pato tacei, sangka piah cak rok patagok hạ tầng, abih di nyu nan lac pabak dien, ia, hacih saat alam moi truong ka xa kaoh pulao.

Di xã Bình Châu, huyện Xuyên Mộc, tỉnh Bà Rịa – Vũng Tàu, Bộ Tư lệnh Bhum 2 Hải quân pambuak haong bhum palei brei thau bruk peih ngak bruk “Hải quân taduan raong anek di urang nao tasik”. Di var nan, dom đơn vị di Bộ Tư lệnh Hải quân Bhum 2 saong đơn vị pambuak taduan raong 5 urang lac anek kamuan di urang noa tasik hu raidiuk biak kan kandah di dua huyen Xuyên Mộc, Đất Đỏ, tỉnh Bà Rịa- Vũng Tàu. Var peih bruk saong bruk taduan raong nan ngak brei ka Hải quân patui veik bruk pambuak dom tỉnh, ban peih ngak sumu gauk, siam lagaih dalam tukvak anak tal, peih praong bruk “Hải quân taduan raong anek di urang nao tasik” di 28 tỉnh, ban tapen tasik dalam negar.

 Tỉnh Bình Thuận bahrau hu veik 1 urang hu pok brei angan “Nghệ nhân Bhap bini” saong 5 urang hu pok brei angan “Nghệ nhân Ưu tú”. Taong abih 6 nghệ nhân hu pok angan mbang ini jeng hu pambuak tal bruk đờn ca tài tử saong hu rik rilo prein yava tame bruk khik ramik, patagok yaom glaong inem krung ilamo oh maong mboh di bangsa daok di pak ini. Yau nan, tal urak ini, tỉnh Bình Thuận hu 2 Nghệ nhân Bhap bini saong 20 Nghệ nhân Ưu tú di rilo gah, yau ye: adat cambat, tanarakun, ilamo parang ma-in dân gian saong ilamo dân gian.

 Di Nyaom biai Pataom iek veik bruk y te thun 2022, ba tabiak jalan ngak, bruk ngak thun 2023 di Sở Y tế Cần Thơ, urang ngak praong di rilo sang iek ruak brei thau dom bruk kan kandah yau kurang jru, hóa chất, pandap y tế daok kurang di dom labik iek ruak. Dalam nan hu dom pandap y tế khut min oh pasiam hu kayua tavak tame dom asar kadha hukum đấu thầu. Ong Hoàng Quốc Cường, Yam ndoc Y tế Ban Cần Thơ brei thau, dalam bilan 12/2022, Sở hu ginum biai saong payua ka dom đơn vị đấu thầu angan jru. Mbiah tal bilan 4 thun 2023, tuk dom sarak pambuak bruk pabak jru abih tukvak ngak tui meda brei peih ngak patui veik bruk đấu thầu pataom jru, peih praong labik tapa cong nghe khaw tin ngan haong dom janih jru, pandap y te dalam thun 2023 oh padeih di 129 janih jru yau dahlau diah. 

Harei 9/1, A-rập Xê-út brei thau ka bruk brei adat nao ngak Haji dalam thun ini bo oh hu bruk pacang meneing menuac nao, atau pacang meneing umo thun di tuai damuai, hadei di 3 thun trun khang urang nao ngak Haji kayua jit praong COVID-19. Nao makah ini lac sa dalam dom bruk pataom rilo urang Islam  praong abih di dunya, ngan haong urang hu mbaok nao makah di thun 2019 lac labaih 2,5 triệu urang. Min, hadei di tuk tamuh jit COVID-19, A-rập Xê-út tok brei 1.000 urang nao ngak Haji dalam thun 2020, hadei di nan, brei 60.000 urang hu klauk ginup jru pacang caga ruak hu mai ngak Haji di thun 2021.

 Hy Lạp hu tabiak bruk brei dut iek ruak COVID-19 dahlau di tuk tagok kapal haok ngan haong taong abih dom tuai damuai mai meng Trung Quoc. Tui rajaei Hy Lạp, taong abih dom urang mai Hy Lạp meng negar Trung Quoc brei dut iek mboh am tinh haong COVID-19 dalam 48 mong dahlau di tuk tagok kapal haok. Langiu di nan, dom tuai damuai nan njauk cuk pataih pacang mbaok meta tuk daok dalam kapal haok. Bruk Hy Lạp brei pasang iek dom urang mai meng Trung Quoc hu ba tabiak hadei di tuk EU tabiak panuac brei ngak bruk nan.

 Jabat kuhria mboh dahlau bruk langik tasik saong địa vật lý Indonesia brei thau lac sa mbang magei baoh taneh khang 7,9 độ richter di dah page harei ini (10/1) ngak magei tỉnh Maluku, gah Timun Indonesia saong tui kuhria meda mbuan hu sóng thần. Bruk sóng thần hu batabiak ka tỉnh ini saong dom bhum jaik taphia, ka oh hu pathau khan tuk camriep ka dom khat lahik kayua bala magei baoh taneh./.