Dah page ini (9/1), mbang nyaom biai oh kuhria dahlau mbang ka 2, Quốc hội mbang 15 patui veik ngak bruk haong dom kadha ginum biai di hội trường saong yer tangin brei tapa dom Sarak tui danak dak mbang ginum biai. Tui nan, Quốc hội ginum biai di hội trường ka dom kadha lac: ramik veik jalan brei masaiy jien gilac veik di thun 2022, pabak bruk kuhria pok jien buh tabiak gam gam di thun 2021 phun jien daong oh biyar gilac di negar langiu saong rami ramik phun jien ka oh pandar abih di thun 2021; Bruk ba phun jien pacang caga jit ruak COVID-19 thun 2021 di dom tinh, ban tapa kadung jien thun 2022. Quốc hội yer tangin brei tapa sarak ka bruk patui veik peih ngak dom sarak dalam pacang caga jit ruak saong brei ngak veik bruk tut angan brei pandar jru tavao, pandap panda ngak jru abih tukvak meng harei 01/01/2023 bo ka oh samu kaduan tukvak tui bruk ba tabiak di Hukum jru tavao.

Thủ tướng bahrau hu harak ka bruk patagok pacang caga jit dalam tuk Tết saong bilan lễ hội 2023. Tui nan, piah patagok bruk pacang caga jit dalam tuk Tết, dom bruk pablei salih nao mai ravang me-in akaok thun 2023, gam pacang caga jit hu siam mekre, salamat; gam jhul pasiam patagok veik KTXH,ngak siam di abih dom bruk pablei salih, dui pachreih tui damuai, Thủ tướng Rajaei, Akaok mBan tacei pato pakat negar ka pacang caga jit COVID-19 ieu dom Mintri, dom gah, dom tinh ban brei thau cambaih saong peih ngak catang dom sarak, dom danak dak pacang caga jit COVID-19 haong dom bruk ngak cambaih laih.

Melam 8/1, di xã Hồng Vân, huyện A Lưới, tỉnh Thừa Thiên Huế hu peih danak dak “Xuân Biên phòng bui hatai bhap bini puk palei”. Brei panuac di danak dak, Ủy viên Mintri Chính trị, Thường trực Ban Bí thư Võ Văn Thưởng ndom lac: “Yaom glaong di danak dak lac ba mai, lac brei mboh hatai anit ranam, thau dhar phol di urang jakar bol lin ngan haong rahra. Ini lac harei roya di mikva dom bangsa takik di labik tapen negar, rahra di kaoh pulao, ngak jeng bruk hu makna praong, ndung bak ilamo bangsa, ba bui sambai, chreih chrai ka mikva daok di bhum tapen negar tuk bilan xuân tal mai.”

Phó Thủ tướng Lê Minh Khái bahrau alin hadiah 400 pok pandap brei ka bhap bini saong urang ngak gaok kan kandah di dalam tỉnh Long An, yaok pok hu pandap haong jien 1 triệu đồng. Phó Thủ tướng jeng hu brei labaih 450 pok pandapTết ka dom sang kan kathaot, urang ngak gaok kan kandah di dalam tỉnh Cà Mau, yaok pok hu pandap haong jien 1 triệu đồng. Phó Thủ tướng payua panuac tadhau ayuh adei sa-ai urang ngak saong taong abih bhap bini dalam tinh hu khang kajap prein yava, haniem phul, mbang Tet bui sambai, haniem phul, ginup meda.

Mban khik ramik danak dak jalan pasei bahrau pathau khan tal Mintri jalan mbak pajeng ba ka bruk pasang iek, padang Harak pathau khan bruk meda ngak hu di danak dak jalan pasei TPHCM - Cần Thơ. Bruk roh duah hu ba tabiak hadei di tuk Mban khik ramik danak dak jalan pasei ngak bruk haong 6 tỉnh, ban hu danak dak nao tapa nan lac: Bình Dương, TPHCM, Long An, Tiền Giang, Vĩnh Long, Cần Thơ. Tui kuhria oh ka ginup abih, jalan pasei TPHCM - Cần Thơ peih tabiak meng ga An Bình (t.Bình Dương) tal ga Cần Thơ (t.Cần Thơ), nao tapa 6 tinh, ban, atah 174,42km, abih tih jien buh tame ngak lac labaih 9 tỷ USD, samu haong 213.948 tỷ đồng.

Brei panuac di Nyaom biai sarak an ninh saong quốc phòng yaok thun di ban Salen, Thủ tướng Thụy Điển Ulf Kristersson brei thau, taneh ia ini meda lac sa binah di Sáng kiến Hala pacang bhum langik Châu Âu (ESSI) saong hu mbaok tame pasang iek mangaok langik di bhum Ban-tíc (Baltics). Sáng kiến Hala pacang bhum langik Châu Âu kayua Đức sahneng tabiak, brei adat ka dom taneh ia hu mbaok tame blei haong gauk dom pandap pacang caga bhum langik saong tên lửa, pataom tame haong hệ thống pacang khik bhum langik urak ini di NATO, paglaong biak rilo prein khik caga liên minh truh dom đe dọa tên lửa saong dom bruk taong tame meng jalan angaok langik trun.

 Harei ini (9/1), di Dinh Tổng thống di Bogor Tây Java, Tổng thống Indonesia Joko Widodo hu mbang ginum biai haong Thủ tướng Malaysia Anwar Ibrahim piah khik catang talei pambuak bruk dua gah di dua taneh ia jaik taphia gauk dalam bhum Đông Nam Á. Dua urang par akaok meda ginum biai dom jalan ngak piah langyah dom kan kandah dalam bhum saong di dunya, dalam nan hu bruk di Myanmar.

Tui urang vak di TTXVN daok di Viêng Chăn, blah điện tử di Hội nhà báo Lào hu ba tagok kadha vak “Ilamu meng Việt Nam: Kinh tế tagok siam dalam tuk dunya laik trun”. Kadha vak brei mboh Việt Nam hu kinh tế tagok siam dalam tuk dunya daok dang anak suy thoái kinh tế, lạm phát, rilo menuac oh hu bruk ngak dalam 2 - 3 thun tapa. Langiu di nan, salih bharau pato megru di Việt Nam hu daong paglaong ilamu menuac ngak, rajaei Việt Nam pataom tame bruk buh jien patagok dom cơ sở hạ tầng, daong ka kinh tế Việt Nam dalam thun 2022 saong dom thun tal meda tagok siam./.