Mesup ini 15/2/2022, di Hà Nội, Thủ tướng Phạm Minh Chính dang akaok Nyaom biai online dalam taneh ia pataom iek veik 20 thun peih ngak Sarak 13-NQ/TW ka kinh tế kapul nyaom saong pataom iek veik 10 thun peih ngak Hukum Hợp tác xã thun 2012. Ini lac kadha praong piah jhul khang bruk peih ngak sarak di Đảng ka patagok kinh tế kapul nyaom, jhul patagok KTXH, meng nan ba tabiak dom jalan ngak piah cakrok kinh tế kapul nyaom, HTX dalam tukvak bahrau.

Tal urak ini, Vĩnh Long hu pilih ruah ginup 2.547 dam dara ginup ilamu saong prein yava, daok caga ka harei jao, raok lin. Piah ngak siam bruk pilih ruah lin, meng di tuk akaok thun, tỉnh Vĩnh Long hu padang kapul nghĩa vụ quân sự njauk manuac, njauk thành phần, saong jao bruk pilih ruah lin lagaih haong bruk di yaok palei, yaok gah, gam haong bhum palei, khik ka taong abih dom xã, phường, ban sit jeng hu rahra tagok jalan nao ngak lin. Hội đồng nghĩa vụ quân sự dom pakat peih ngak siam bruk pathau khan, brei thau ka hukum nghĩa vụ quân sự; paglaong hatai saneng, bruk ngak di bhap bini, abih di nyu nan lac rahra dalam umo hu ieu nao ngak lin.

Tui Mban khik ramik danak dak 7, (Mintri Jalan mbak Pajeng ba) brei thau, hu labaih 400 urang ngak saong kỹ sư mai ngak bruk veik hadei meng Tết di danak dak tatua Mỹ Thuận 2 haong hatai kham merat ngak salah blaoh njauk tui tukvak ba tabiak. Bruk padang ngak tatua Mỹ Thuận 2 saong jalan tagok duah gah akaok tatua hu peih ngak haong abih tih 5 pok thầu padang ngak, atah abih tih 6,61km nao tapa dua tỉnh Tiền Giang haong Vĩnh Long, peih ngak tui jalan đầu tư công, abih tih phun jien lac 5.003 tỷ đồng, tui kuhria hu  ngak salah di puac thun 2023.

  Viện Y học cổ truyền Quân đội (Mintri Quốc phòng) bahrau padang Sang iek ruak taong ruak urang ruak Covid-19 njul saong mbaih di ban raya TPHCM. Sang iek ruak hu salih bruk ngak meng Phân viện Y học cổ truyền Quân đội TPHCM (daok di quận 6), praong 300 manieng ndih ka urang ruak (meda tagok 500 manieng ndih ka urang ruak), hu peih tabiak ngak bruk meng harei 16/2.

Akaok UBND tỉnh Cà Mau bahrau pasang iek, mbaoh tangin brei tapa bruk taong yaom, dak angan 26 janih pandap Danak dak yaok xã 1 janih pandap (OCOP) mbang 2 thun 2021. Tui nan, 26 janih pandap OCOP hu UBND tỉnh pok angan mbang ini hu adat brei pandar biểu trưng di Danak dak OCOP saong dak patuk piah in ấn angaok kadung pandap, gam haong nan, hu daong cakrok patagok pandap danak dak OCOP tui adat urak ini. Dom janih pandap hu brei angan OCOP mbang ini, yau ye: Alak baoh giác 5 Quốc; Cam 3 Tình; Ia baoh nhàu nguyên chất SK NONI; Mắm ruốc xào 9 Thúy; Bánh phồng tôm, hadang thu.

Hadei di sa tukvak suai lavik cang maong, harei ini, vaccine caga Covid-19 pandar protein camriep abih hu ba tame pandar di Australia, nan lac vaccine Novavax. Novavax hu dom urang ilamo brei thau lac janih vaccine dreih yau dom janih vaccine meng kan hu pandar di dunya dalam rilo thun tapa, kayua yau nan ye Australia caong lac bruk ba vaccine ni tame pandar meda pabak brei rilo jang bruk pilih ruah ka bhap bini taneh ia ini. Abih di nyu nan lac dom urang ka oh jia tame dom janih vaccine pandar công nghệ bahrau yau ye AstraZeneca atau Pfizer saong Moderna ye vaccine caga Covid-19 di Novavax meda ngak ka dom urang ini mboh sahanang hatai jang.

Tui harak di rajaei Japon ba tabiak di harei ini (15/2) brei mboh lac,  kinh tế praong ka 3 di dunya ini tagok hu 5,4% dalam 3 bilan puac thun 2021, glaong jang rilo duk haong tanut tagok 2,7 % dalam quý 3, min biar jang tui kuhria dahlau di nan lac 5,8%. Thống đốc Gilang pariak negar Japon brei thau, kinh tế taneh ia ini hu siam veik dalam 3 bilan puac thun 2021, tuk dom urang njom Covid-19 trun daok takik, hu daong jhul patagok bruk blei pandar, min bruk cakrok meda trun dalam 3 bilan akaok thun ini. Duk haong dom nền kinh tế cakrok karei, bruk pasiam veik di Japon jeng daok gah likuk.

Ngoại trưởng Mỹ An-tô-ni Blinh-cừn (Antony Blinken) harei kabroi (14/2) brei thau, Mỹ daok hu panuac ieu pabak ka U-crai-na (Ukraine) sa paok jien masraiy bảo lãnh tagok tal 1 tỷ đô la Mỹ, piah daong ka gah kinh tế taneh ia ini dalam tuk daok gaok kan kandah meng bruk bol bala Nga daok tagok bruk ngak di  labik tapen negar. Tui Ngoại trưởng Blinh-cừn, panuac ieu di Mỹ meda paglaong prein ka U-crai-na dalam bruk khik tani tanat, cak rok patagok kinh tế saong sron mbon ka bhap bini anak bruk ngak brei srau kadau di Nga.

Urang lang: Thu Thảo & M.Phuong – 15/2/2022