Anak bruk rah tabiak sraw kadau di hajan ribuk di dom tỉnh bhum ceik gah Barak saong bhum kreh negar, Thủ tướng hu harak iew dom tỉnh yau ye: Sơn La, Lào Cai, Yên Bái, Phú Thọ, Ninh Bình, Hoà Bình, Thanh Hoá, Nghệ An, Hà Tĩnh, Quảng Bình, Quảng Trị, Thừa Thiên Huế saong dom mentri dom gah pambuak tal, pataom tame pacang caga saong pasiam veik bruk khut tayak hadei di hajan ribuk ia sua. Dalam nan, samar ba dom menuac dalam dom sang di albik mbuan gaok bala. Sumu daong brei pandap mbang, ia menyum dom pandap karei ka dom baoh sang  mbuan iek lapa, kham daong oh caik urang halei kurang pandap mbang, iek lipa. Ba tabiak ngak dom jalan khik brei salamat dom labik hạ tầng daok dalam tuk padang ngak, ar pacang, binek ia, abih di nyu nan lac dom danak dak mbuan talah, rah tabiak bala. Tuk halei jeng brei caga manuac urang ngak bruk daong, duah urang tuk bala rah tabiak…

Daok di ban Cần Thơ, tui Jabat kuhria mboh dahlau bruk langik tasik ban, dalam dom harei anak tal, ia tagok glaong abih di Bilai Cần Thơ di kraong Hậu tui kuhria glaong jang tanut kakei 3 meng 10 - 15 cm. Tukvak rahtabiak ia tagok yaok harei di tuk dah page meng maong 5 tal maong 6 saong meng maong 4 bier harei tal maong 8 bier harei. Ini lac mbang ia tagok glaong jang tanut kakei III, kayua yau nan ye mikva njauk caik hatai piah pacang caga dalam tukvak ia tagok glaong gam haong hajan khang meda ngak ia dauk di rilo labik.

Meng harei 7/8 tal harei 26/9, Sở Y tế TPHCM hu peih bruk dut iek prein yawa oh mek jien brei ka labaih 17.000 urang umo taha. Tui TS.BS Nguyễn Văn Vĩnh Châu, Pho Yam ndoc Sở Y tế TP.HCM, bruk ngak iek ini piah daong gah y te peih ngak iek mac jamraih birau, hu quy trình sumu yau gauk ka bruk dut iek prein yawa ka urang umo taha, ngak brei yaok urang taha halei jeng hu dut iek prein yawa sa thun sa mbang.

Hội đồng Đội Trung ương pambuak haong Kapul Uảng kumei Việt Nam pakat negar peih Harei pataom ilamo uranaih dom bangsa di bhum gah maraong negar, ngan haong asal kadha “uranaih Việt Nam hadah mbaok mata saong patagok dom yaom glaong ilamo bangsa” di tỉnh Bình Phước. Di harei pataom ini hu mbaok di labaih 200 ranaih mai meng 7 tinh, ban dalam bhum gah maraong negar, lac: Sóc Trăng, Tây Ninh, Đồng Nai, Bình Dương, Bà Rịa - Vũng Tàu, Bình Thuận saong Bình Phước. Bruk ngak ini piah pok mayaom dom ranaih bangsa hu bruk ngak naih joi, daong palagaih ka dom adei patui veik kham marat dalam bruk bac taa, pasram, khik ramik ilamo meng kan di bangsa.

Ong Nguyễn Quốc Thái, Akok UBND xã Vĩnh Lộc A, huyện Hồng Dân, tỉnh Bạc Liêu khan lac: Công an xã birau jao brei jien jaik 11 trieu đồng gam dom harak gal hu makna praong ka muk Tạ Kim Nhi, daok di xã Ninh Hòa, huyện Hồng Dân. Jien nan kayua adei Nguyễn Gia Vỹ, anek saih bac tal 7A, Sang Bac THCS Đoàn Thị Điểm, puk Bến Bào, xã Vĩnh Lộc A duan hu, ba mai ka Kông an  xã Vĩnh Lộc A duah manuac ngak lahik piah bayar veik. Di var jao brei jien, muk Nhi biak bui sambai hu taduan veik jien di drei, tui nan payua panuac dhar phol tal adei Nguyễn Gia Vỹ gam Công an xã Vĩnh Lộc A.  

Quốc hội Triều Tiên ginum biai dalam dua harei (26-27/9) hu brei tapa rilo sarak hu makna praong. Dalam nan hu njauk gauk brei tapa danak dak ginum biai hu makna piah padang ngak sarak di Triều Tiên ka kapul hạt nhân jeng hukum cambaih di kanja. Akaok Quốc vụ Triều Tiên Kim Jong-un ndem lac, sarak padang ngak kapul hạt nhân di Triều Tiên hu brei thau lac suai lavik lac hukum di taneh ia, oh thei hu iek lap.

Meng 2 tỷ lít alak vang daok kandong dalam gilang, rilo labik ngak tabiak alak vang di Australia caong khin bruk langyah thuế quan haong Trung Quốc  meda jhul patagok bruk pablei salaih. Gam haong nan, Australia daok duah veik dom darak pasar karei piah pablei duah laba yau ye Ấn Độ piah oh daok pagam pambak ralo tame darak Trung Quốc. Urak ini, alak vang di taneh ia Australia meda tuh bak 859 danao caluai ia  praong chuan Olympic. Bruk nan tamuh tabiak meng tuk Trung Quốc  lac taneh ia blei alak vang di Australia ralo abih di dunya, kak je taong phat blei tame di thun 2020.

Dom urang roh duah ilamo di Stockholm, Thụy Điển mbang camriep pasiam veik hu axit ribonucleic (RNA) meng sa janih athur lahik nao blaoh, anek rimaong Tasmania. Nyaom dom urang roh duah hu langyah dom phân tử RNA meng mau rimaong Tasmania umo 130 thun hu khik ramik di nhiệt độ phòng di Sang miuyim sajarah Tự nhiên Thụy Điển, meng nan meda ngak tabiak gilac veik RNA di kalik saong talang. Rimaong Tasmania hu brei thau lac lahik abih but meng di thun 1936, drei rimaong puac abih metai dalam tuk kareik di Tasmania, Australia. Tui dom urang roh duah ilamo, prein pasiam veik RNA meng dom janih lahik abih but blaoh, lac sa takai yam sit pamaong tal bruk pasiam veik dom janih lahik abih but blaoh di anak tal.