Ribuk ka 4 trun jeng áp thấp nhiệt đới, kuhria tal urak ini ribuk ka 4 ngak brei 4 urang njauk rambuac, jaleih 3 baoh sang, papar  tabung 157 baoh sang, karam 3 sruh glai sit di dom tỉnh gah kreih negar saong Tây Nguyên. Dang akaok mbang nyaom online haong 8 tinh, ban gah kreih negar saong Tây Nguyên piah taong yaom bruk pasiam veik dom khut khat saong bac ilamo dalam bruk pacang caga haong ribuk ka 4, Thủ tướng Phạm Minh Chính ieu kakei, dom tinh, ban njauk samar drah ngak pasiam dom khut khat hadei di tuk ribuk, puh ramik ngak hacih saat alam saong khik tani tanat salamat jalan mbak. Daong ka bhap bini pasiam veik sang jaleih, papar tabung, pasiam dom danak dak ka rahra. Pasiam veik bruk ngak nong piah khik ginup padai brah pandap mbang, tani tanat raidiuk ka bhap bini dalam tukvak anak tal. 

UBND tỉnh Bến Tre pambuak haong Mintri ngak nong saong patagok palei pala, Mintri Y tế peih mít tinh pachreih tui Harei dunya pacang caga ruak gila thun 2022 ngan haong kadha “ruak gila sa prein yava – oh hu menuac metai”. Di Việt Nam meng thun 2010 tal ini, ruak gila ngak brei labaih 1.000 urang metai. Kuhria meng akaok thun 2022 tal ini, dalam taneh ia hu 43 urang metai kayua ruak gila di 17 tỉnh, ban. Gah chức năng hu panuac kakei lac tuk njauk sau, mangiu kaik, bhap bini brei nao tal labik y tế klauk jru, taong ruak, langyah samar dom sruh tamuh ruak.

TP.HCM peih bruk pakacah pilih ruah urang ngak Yam ndok Sang iek ruak Mata. Nini lac mbang camereip abih Sở Y tế TP.HCM peih bruk pakacah pilih ruah urang ngak Yam ndok sang iek ruak piah duah tabiak menuac hu hatung hatai siam mekre saong hu phẩm chất chính trị; gam hu ilamu glaong dalam bruk ngak, bruk khik ramik, pabak bruk di sang iek ruak. Taong abih urang jakar, công chức, viên chức daok ngak bruk di dom jabat dalam TP.HCM meyah hu ginup điều kiện, tiêu chuẩn saong hu angan dalam harak angan kuhria caga piah ngak dom bruk samu haong angan Yam ndok sang iek ruak meta jeng hu quyền tut angan tame pakacah.

Yaom lac oh ka tal bilan paik baoh min durian di tỉnh Tiền Giang daok tagok yaom khang, urak ini urang blei salih mai blei di bein yaom meng 60.000 đồng tal 75.000 đồng sa kg. Tiền Giang urak ini hu labaih 17 rabau ha durian, baoh paik hu meng 20 - 23 tấn sa ha; dalam nan hu jaik 100 ha durian hu brei mã số bhum pala. Tui Sở ngak nong saong patagok palei pala Tiền Giang, bruk pablei durian tui jalan chính ngạch tapa darak pasar Trung Quốc lac jalan piah ka urang ngak nong tagok hu kein laba rilo jang.

Mỹ daok caga pabak pok jien daong quân sự bahrau yaom 1,1 tỷ USD ka Ukraine, tui kuhria hu khan brei thau dalam dom harei anak tal. Pok jien daong bahrau, hu dom pháo phản lực gam haong siu phao, dom radar, dom linh kiện piah salih gam haong daong ilamu kỹ thuật saong pato pakai. Mbiah tal urak ini, Mỹ hu pabak labaih 15 tỉ USD daong quân sự ka Ukraina kuhria meng di tuk tamuh tabiak bruk mesruh haong Nga.

  Harei ini (28/9), Công an quận Tân Phú pambuak haong dom gah nghiệp vụ Công an TP.HCM mek panuac khan brei thau di Nguyễn Hoàng Thạch (umo 28 thun, daok di Đồng Nai) piah pasang iek ka bruk pachot meblah mek drap ar. Thạch lac urang par akaok di jalan pachot lac drei ini urang ngak gah gilang paraik daong masaiy jien piah pachot paglait biak rilo manuac. Tui Công an TP.HCM, yaok harei, Thạch pabak angan, laih phone, labik daok di yaok urang njauk paglat ka 82 urang ngak. Hadei di nan, dom urang ngak meda pachot pagait meda lac urang ngak gah gilang paraik, ieu phone mayaih khan danak dak brei masaiy jien ngan haong jien je lac 0% piah ba manuac karei tame pagait. Jabat pasang iek brei thau lac tal tukvak ini, taeng di TP.HCM, Thạch saong dom urang ngak gam hu pachot pagait, meblah mek paok jien di labaih 600 urang.

   Hy Lạp hu panuac chỉ trích dom taneh ia pambuak gauk dalam Liên minh châu Âu (EU) kayua oh ka halain hatain parabha dom kan kandah tuk taduan urang di cư tame khối. Dalam rilo thun ini mai, Hy Lạp daok gaok bruk di cư biak rilo ngak kan kandah tal dom taneh ia di gah maraong EU tuk urang di cư duah jalan nao tal akaoh pulao di taneh ia ini di Địa Trung Hải saong tasik Aegean. Akaok mintri di trú dom taneh ia EU hu brei padang harak eng drei ngak piah rami ramik urang di cư meng labik tal camereip tal dom taneh ia karei dalam EU, piah trun manieng dom kan kandah ka Hy Lạp. Min, tal urak ini, dom taneh ia EU karei bahrau taduan labaih 1.000 urang di cư.

Ribuk ngak brei lahik điện di grauk labik dalam taneh ia Cuba saong ngak tayah dom trang trại pala pakao hala praong tuk nyu tuh tame gah pai pulao akaoh ini dalam harei 27/9. Yaok pluh ribau menuac brei ba nao labik karei dahlau di tuk rabuk tuh tame ba tal ia dauk, sang danaok khut, tayah saong phun kayau jaoh, jaleih. Dom urang jakar jeng daok taong yaom khat lahik, tal urak ini jeng oh ka khan brei thau khat lahik gah menuac sia. Chủ tịch Cuba hu mai ravang labik gaok trak damak di abih kayua ribuk./.

Urang lang: M.P & Thu Thảo - 28/9/2022