Jaik yam tame thun bac birau 2023 -2024 ye bo rilo bhum palei daok kurang tapuk bac da-a ka anek saih  saong gru pato,Thu tuong Phạm Minh Chính hu payua harak iew dom Mentri pambuak tal saong UB bhap bini dom tỉnh, ban brei hu ginup tapuk bac da-a samar sumu thun bac 2023 -2024. Thủ tướng iew Mentri Pato megru brei tacei pato ba jalan ngak ka dom labik ngak tabiak, kapol nyaom, urang hu cih vak tapuk bac da-a brei pasang iek, bruk tavak tapuk, jalan ngak tabiak saong đấu thầu peih praong, cambaic laih ka bruk in, patabiak tapuk, khik kajap asar siam, trun jien buh tame ngak.

Di mbang taom  mbaok 51 anek saih kumei bangsa takik naih gheih hu taduan jien bac meng kadung jien Vừ A Dính harei kabroi di Hà Nội, Phaok akaok negar Võ Thị Ánh Xuân pok meyaom danak dak “Peih jalan tal harei hadei” kayua Kadung jien bac Vừ A Dính pambuak bruk haong Kadung jien daong VinaCapital peih tabiak, hu daong cakrok menuac ngak ka bhum bhap bini bangsa takik di yaok labik dalam taneh ia, pasiam pakhang bruk jum pataom bangsa, samu gauk ngan saong dom anek saih kumei urang bangsa, lac urang gaok rilo paga pacang, rilo cuang kandah kayua dom adat cambat klak di palei oh daok lagaih, daong ka dom adei yam tapa hatai sahneng oh njauk, hu jalan yam tagok saong brei mboh ka bruk naih gheih di drei.

Mban Khik iek jalan pasei đô thi Ban raya HCM brei thau, mblang ga radaih pasak Bến Thành  jalan Metro ka 1 Bến Thành - Suối Tiên brei pagam, ngak salah taong abih kien truc gah dalam saong gah langiu ban raya. Dalam nan,  kien truc siam gheih abih brei mboh langik hadah gam haong  thaok binguk caraih, dom pandap nan hu palih ruah saong blei tame tapak meng Nhật Bản, meda lagaih haong langik pandiak hajan hu jeng yau pacang sron sir, pacang pandiak siam abih. Urak ini, kien truc di mblang radaih  pasak Bến Thành  hu ngak salah 99% blaoh.

Yaom pablei panat di tỉnh Tiền Giang daok tagok glaong min baoh panat oh ginup pablei kayua dom bein panat dalam tỉnh abih bilan paik saong urang nong daok caga iek glang ka bilan paik baoh bahrau di puac thun. Panat Thái paik di bein yaom 47.000 đồng/kg janih 1, lac tagok jaik 20.000 đồng duk haong bilan dahlau. Tỉnh Tiền Giang urak ini hu jaik 15.000 ha panat Thái. Janih phun ini lagaih haong taneh riya labik ini, brei baoh ilo saong pablei hu mbuan lagaih, gam pablei dalam taneh ia gam hu darak pasar negar langiu biak takre, abih di nyu lac darak pasar Trung Quốc.

Meng harei 12/8 mbiah tal ini, di bhum taneh ban Long Xuyên, tỉnh An Giang tuk halei jeng hu bruk njom nerak khong khi dang di tabung glong ngak jhak tal prein yawa. Abih di nyu lac, meng biar harei 15 tal page 16/8, hu mboh chi so o nhiem khong khi tagok tal 500. Bruk njom nerak tachrauk  khong khi  jeng hu mboh di rilo bhum palei karei. Jiak di ini, Mentri Tai nguyen saong Moi truong hu brei panuac iew dom bhum palei brei pakhang bruk dut iek nerak tachrauk dalam khong khi, tui nan brei ngak hacih khi tathuak tabiak sumu quy chuan ky thuat alam moi truong.

Gah Di cư Dunya (IOM) brei thau lac bruk srau kadau di ban ine di Haiti dalam adit blaoh ngak brei labaih 3.000 menuac nduac klaak sang danaok, dalam nan hu biak rilo menuac nduac nao daok di dom labik taik tahak. Tok kuhria dalam dom bilan tapa, hu jaik 200.000 urang di taneh ia pulao kaoh sit sot ini nduac nao daok di labik karei. Bruk srau kadau, mesruh gauk di dom băng đảng tagok khang di Haiti – abih di nyu lac hadei di bruk ám sát Tổng thống Jovenel Moise di bilan 7/2021, ba tal val huan quyền lực – saong rajaei yau oh ngak hagait hu ba tal bruk pacang cakak dom srau kadau, taong mesruh gauk dak harei dak kan kandah jang.

Takik di abih lac 55 urang metai saong 126 urang njauk rambuac dalam dom mbang taong mesruh di ban ine Tripoli di Libya ngak brei taneh ia ini gaok sraw kadau  kuhria meng hadei di tuk karja kayua Muammar Gaddafi pan akok jaleih trun di thun 2011. Taneh ia ini neh rabha ralai baik praong patui veik hadei di tuk dom gah phao karong gah Timun saong gah Pei meng thun 2014. Dom mbang taong paoh gauk khang njauk padeih  tuk dom gah ngak hu thoa thuan padeih patuh phao di thun 2020. Yau nan min, mbiah tal ini, dom gah pak ini oh ka duah tabiak hu jalan chính trị suai lavik piah langyah bruk mesruh gauk.

Harei pataom ia tasau mesam di urang Tây Tạng, Trung Quốc hu peih tabiak meng harei kabroi saong dui atah dalam 1 adit. Ini lac dom rija meng kan praong abih di Tây Tạng, dui pachreih hu yaok rabau menuac sia dalam palei saong tuai damuai di dunya mai hu mbaok. Labaih 1.000 thun dahlau, bruk ini hu peih ngak piah brei mboh hatai thau dhar phor ong Phật saong ndung bak asal agama. Urak ini, harei pataom lac tuk dui pachreih tuai damuai mai tal “bhum taneh ginreih”. Taphia dom adat cambat agama, tuai damuai daok hu tame me-in chat tamia, iek nhạc kịch, daoh tamia bhap bini…Saong tapa nan, oh klaak tapa hu 1 panyin ia tasau mesam bingi biak karei di Tây Tạng./.