Taong yaom, bruk javap calei anak Quoc hoi page ini 4/6, di Akok Mentri Tai nguyen saong Moi truong Đặng Quốc Khánh, rilo urang QH mboh lac Akok mentri calei tapak, njauk bruk, njauk kadha urang QH ba tabiak. Tui pang, tui iek bruk javap calei di Akok Mentri Tai nguyen saong Moi truong, cu tri TPHCM brei mboh bruk njauk hatai saong caong khin dom asar kadha. Cu tri Thanh Bình daok di Ban Thu Duc mboh lac, bruk njuk mek cuah suan hukum , atau pambak tame bruk kuac ribong piah mek kaya ala kraong ia ngak laba ka drei daok hu manuac sia biak caik hatai sangka. Karja palei saong jabat khik iek hu thau, bruk pasang iek, tui iek oh kan, min brei ngak catang saong ngak gam gam.

Meteh bilan hadei di tuk Thủ tướng Phạm Minh Chính ba tabiak bruk tut angan alin hadiah mô, tạng, dalam taneh ia hu gac labaih 10.000 urang tut angan brei mô tạng hadei di palang lahik. Urak ini, dom mô, tạng alin hadiah di taneh drei lac meng menuac alin hadiah daok diuk, meblah 94%. Bruk alin hadiah meng menuac matai glo akaok, matai hatai baoh biak takik, oh ka pabak hu bruk caong ghép tạng dak harei dak rilo jang.

“Danak dak pala jadal” di xã Mỹ Sơn, huyện Ninh Sơn, tỉnh Ninh Thuận tui Danak dak pakat negar ka bruk patrun kathaot vaktu 2021-2025. Meng bilan 9 thun 2023, Danak dak hu 25 baoh sang urang kan kathaot, jaik kathaot, boah sang birau tabiak truh kathaot. Abih tih taneh pala lac 5 ha haong yaom phun jien peih ngak danak dak lac 3tỷ 3 rituh trieu dong. Tapa 8 bilan peih ngak, tal urak ini, dom baoh sang hu paik baoh jadal, yaok baoh sang paik hu labaih 1 rabau 2 rituh kilo. Kong ty THHH kaya nong Thái Thuận hu mbaoh tangin sanya blei veik baoh jadal yaom 12 ribau dong sa kilo. Tapa nan, daong ka dom baoh sang urang pala jadal tui Danak dak hu jien mek tame, tani tanat raidiuk.

Danak dak daoh tamia “Việt Nam – Hatai caong yam atah” hu peih tabiak di melam 5/6 di Nhà hát Lớn Hà Nội. Danak dak hu Mintri Ilamu, Thể thao saong Du lịch tacei pato mBáo Văn hóa pambuak gauk peih ngak, di tuk pahadar 76 thun harei Wa Hồ tabiak panuac ieu pakacah gauk anit ranam taneh ia (11.6.1948 - 11.6.2024). Meng 3 kadha lac: Menuac nao duah binguk di taneh ia, Panuac ieu anit ranam taneh ia, Padang ngak praong saong dak padang Taneh ia, danak dak hu ngak ka urang maong iek mboh biak drut drui ka bruk anit ranam puk paga, palei negar, hatai caong buh prein ka taneh ia, bruk thau dhar phor saong anit ranam Wa Hồ.

Tamat harei pakacah camereip di Nyaom roya Padhih The thao anek saih Đông Nam Á mbang ka 13, Kapol The thao Việt Nam ngak ka urang biak caik hatai tal tuk mek hu biak rilo huy chuong Ameh di kadha pakacah nduac saong caluai ia, yam tagok dang dhi 1 dalam harak angan mek hu huy chuong. Meng 12 HCV, 4 HCB saong 3 HCĐ, kuhria abih tih Kapol The thao Việt Nam hu 19.

Karja ban ine Seoul (Hàn Quốc) khan lac brei daong praong ka dom Cty mbiah saong sit peih ngak dom bruk pachreih urang ngak ndih tapui anek saong patagok dom jalan iek glang uranaih. Dom bruk daong nan hu daong pabak menuac ngak, daong ka ayut sahabat di dom menuac padeih ndih tapui saong daong brei mesraiy jien jhung lap ... Ini lac sa binah di "Danak dak daong bruk ndih tapui anek di Seoul" piah kham merat langyah bruk ndih tapui anek biak takik di Hàn Quốc.

Danei angan haong ilamo radaih juah, abih di nyu nan lac di dom ban yau Amsterdam, taneh ia Hà Lan brei mboh bruk pasram pahat prein yava siam ka alam moi truong. Dalam 29 taneh ia bo kong ty IPSOS pasang iek, taneh ia ini dang akok ka dom mon pasram pahat rup pabap yaok adit di tanut 12,8 saong daok dalam 10 taneh ia hu prein yawa khang kadang abih di dunya. Labaih 75% urang likei saong 71% urang kumei di Hà Lan pabak hu dom tacei pato ka bruk pasram pahat rup pabhap kayua WHO ba tabiak.

Yaom lac rajaei Lào daok kham merat ngak rilo jalan ngak piah pacang patrun bruk lạm phát, min jeng daok di tanut glaong lac 25,8% dalam bilan 5, tagok hasit duk haong bilan 4 (24,9%). Dom janih pandap tagok yaom dalam bilan 5 jeng lac dom nhà hàng, khách sạn; pandap mbang, menyum, nhiên liệu; dịch vụ… Bruk dom janih pandap ini tagok yaom hu Pasak Yaok pataom pakat negar mboh lac kayua langik pandiak dui atah ngak kan kandah tal bruk ngak mbang, b atal yaom rilo janih pandap pandar tagok glaong. Langiu di nan, yaom nhiên liệu tagok gloang jeng lac sa dalam dom makna ngak brei yaom ngak pandap saong dịch vụ tagok glaong dalam bilan meng blaoh./.