Dah  page ini 3/4, Thủ tướng Phạm Minh Chính dang akaok mbang nyaom online dalam taneh ia, rajaei saong dom tinh, ban saong mbang nyaom Rajaei bilan 3 thun 2023. Di mbang nyaom Thủ tướng ieu kakei dom Mintri, dom jabat, tinh ban samar drah brei tapa jalan ngak buh jien tame, brei buh jien tame saong caga dom bruk njauk ngak piah peih bruk parabha saong peih ngak dom danak dak buh jien tame di danak dak, tani tanat njauk tukvak ba tabiak, chất lượng tui panuac ieu kakei. Patui bruk pacang caga jit ruak COVID-19 saong dom janih jit ruak karei. Pataom tame langyah siam lagaih, peih ngak catang, taoh talaih dom kan kandah, tavak tavaiy dalam bruk pablei salih, to yaom jru tavao, pandap panda y tế. Ngak siam bruk caga ka mbang pakacah tamat THPT saong pilih ruah đại học, cao đẳng thun 2023.

Harei 3/4, di TP. Cần Thơ, Hội đồng Bangsa di QH peih mbang nyaom ka 6. Tapa nan, dom urang dalam mbang nyaom hu ginum biai ngak brei cambaih laih bruk ngak hu dalam bruk patagok KTXH bhum bhap bini bangsa takik saong bhum ceik dalam thun 2022 saong 3 bilan akaok thun ini, UV Bộ Chính trị, Phaok akaok QH Trần Thanh Mẫn ndom lac, bruk pasang iek asal kadha mbang ini biak praong, pambuak tal bhap bini bangsa takik bhum ceik, sang kathaot, sang kan kandah dalam taneh ia. Kayua yau nan ye, ieu dom urang dalam mbang nyaom pataom tame ginum biai ngak brei cambaih dom bruk ngak hu di kapul pasang iek, bruk padang ngak, pasiam pathau khan di Rajaei, Mintri, dom gah, dom puk palei.

Harei pataom ilamo sân khấu dù kê Khmer Nam bộ mbang ka 2 thun 2023 daok hu peih tabiak di tỉnh Trà Vinh. Hu labaih 500 diễn viên di 13 kapul ilamo di ĐBSCL hu mbaok tame. Yaok kapul meda parang ime-in meng dom vở tuồng dù kê ndung mbak ilamo meng kan, sajarah atau bahrau piah pok mayaom, paglaong ilamo meng kan biak hadah hadai di bangsa, hatai anit ranam taneh ia, palei negar, hatai anit ranam anek manuac. Dom anh hùng oh huac matai lahik dalam mesuh metak saong khik caga taneh ia palei negar. Pato pakai sajarah ilamo bangsa, pamadeih tagok bruk hadah mbaok meta di bangsa dalam rahra bhap bini. Harei pataom hu peih tabiak tal harei 7/4 anak tal.

Yaom rieng suan bilan di Kiên Giang daok tagok glaong biak glaong. Yaom cua gạch meng 800.000 - 900.000 đồng/kg, rieng ralow (cua tứ, cua y) meng 500.000 đồng/kg tagok. Tui panuac khan di rilo urang nong raong rieng di xã Phong Đông, huyện Vĩnh Thuận, yaom urang blei salih mai blei rieng tagok tapa yaok harei kayua darak pasar dalam taneh ia daok blei khang. Hu harei, 1kg cua gạch pablei di labik raong tagok tal 1 triệu đồng. Tui Sở NN-PTNT tỉnh Kiên Giang, thun ini taneh raong rieng tasik di tỉnh hu jaik 50.000ha, tagok jang 2.300ha duk haong thun 2022. Yaom pablei rieng tagok tui yaok thun.

 Pambuak tal bruk phun hijao tabuac gha di sang bac THCS Trần Văn Ơn, Quận 1, TP.HCM di dah page ini, abih tih hu 7 urang njauk rambuac, urak ini daok hu taong ruak di dom sang iek ruak. Dalam nan hu 5 urang njauk rambuac trak, hadei di tuk sơ cứu, sang iek ruak hu payua tagok sang iek ruak praong. Langiu di nan, phun hijao jaleih kateik njauk takik di nyu 9 sruh radaih mac ngak ka dom sruh radaih ini khut trak. Anai gru Lê Thị Thanh Giang, Hiệu trưởng Sang bac THCS Trần Văn Ơn brei thau, phun hijao jaleih lac phun mil prang, bahrau hu pasang iek di puac bilan 2-2023.

 Akaok Mintri Kế hoạch patagok taneh ia Indonesia brei thau, taneh ia ini daok pataom tame cakrok khang 4 bruk praong dalam gah sron mbon jalan tasik taneh ia. Bruk camereip pambuak tal kol duas xuyên quốc gia jeng bhian rah tabiak di bhum tasik Indonesia. Quyền ngak po saong bruk nao mai angaok tasik di Indonesia yau bruk meriak gauk di biên giới mangaok tasik jeng oh ka hu langyah. Bruk patui di nan pambuak tal meriak gauk kaya pandap meng langik tasik saong bruk ka lãnh thổ. Bruk ka 4 lac dom jalan pablei salih nao mai di tasik, dom jalan nao mai di mangaok tasik saong kein laba di Ấn Độ Dương.

 Meng panuac khan piah tani tanat darak pasa manjek, dalam mbang nyaom online pakat Mintri hu peih tabiak di harei 2/4, Kapul dom taneh ia pablei tabiak manjek saong dom taneh ia pambuak bruk  OPEC pagam hu tabiak panuac lac brei cakak trun 1 triệu 160 rabau thung manyek yaok harei. Bruk ngak samar drah ngak ka yaom manjek tagok jang labaih 5 đôla Mỹ yaok thung dalam mbang pablei salih harei ini. Hadei di pathau khan di OPEC pagam, jien đô la Mỹ jeng tagok yaom kayua dom huac kanda ka lạm phát mai gilac veik ngan haong bruk yaom manjek tagok, dui tui rilo pandap panda tagok yaom.

Takik di abih 19 urang metai dalam mbang jaleih taneh harei 2/4 di gah Timur CHDC Congo. Urang jakar palei khan lac duah mboh 19 urang metai saong mboh lac dom menuac metai daok hu rilo jang. Tui panuac khan di urang jakar ini, hu 25 urang amaik haong dom anek bhik di drei daok papah khan ao di sa baoh craoh mala takai ceik ye haluk nyu glut jaleih trun, dar lahik dom menuac nan. Karja daok peih bruk duah dom urang njauk bala dalam harei ini./.