Page 6/12, Thủ tướng Phạm Minh Chính dang akok nyaom biai Thường trực Rajaei ka bruk tacei ba jalan peih ngak sarak jien ndo, sarak jien padai, kinh tế vĩ mô. Thủ tướng ndem cambaic laic: bruk peih ngak sumu dom jalan  daok rik tame ngak brei tani tanat kinh tế vĩ mô, pasang khik bruk lạm phát, jhul pakhang bruk cak rok patagok, dom bruk brei sumu, jien mek tame ginup pandar saong mek tame rilo jang; ngak tabiak ginup blei tame saong pablei tabiak rilo; darak bruk ngak sumu urang ngak. Thủ tướng lac: anak bruk dak harei dak kan kandah, dak sraw kadau njuak brei jum pataom, hasa jalan, ba tabiak  sarak, jalan ngak lagaih, khang kajap, lagaih; caong khin kham merat ngak hu dom bruk ba tabiak  thun 2022 hu glong di abih.

BHXH Việt Nam brei thau, hadei di 2 adit ba tabiak “Danak dak alin sổ BHXH, thẻ BHYT ka bhap bini gaok kan kandah”, taong abih yaom jien jak ba hu dalam taneh ia lac labaih 45,5 tỷ đồng. Dom urang hu alin lac mikva bangsa takik di kapul oh hu kadung jien kanja đóng, daong đóng BHYT; urang ka oh hu thẻ BHYT di kapul bahrau tabiak truh kan kathaot, urang hu jien mek tame mbaih ka oh hu mbaok tame BHXH, BHYT saong urang gaok kan kandah.

Tui gah ngak nong tỉnh Bình Thuận, taneh raong pala kaya ikan dalam ia bilan 11 tui kuhria hu jaik 217 ha, tagok 6% dut saong tukvak ini thun dahlau; pataom veik 11 bilan thun ini kuhria mboh hu 2.500ha, tagok labaih 3%. Yaom hadang  glong nan ye urang raong daok ramik pasiam veik danao raong, pabak pajaih piah patagok parilo hadang di puac thun. Dalam tỉnh  hu 135 bè raong hadang, ralo meng lac ikan tasik saong dom janih hadang ginraong. Di labik  raong ikan dalam lồng bè phường Mũi Né, Ban Phan Thiết, hadei di tuk khat lahik ralo kayua tảo tamuh rak bingu ralo, daok hu tani tanat saong dom baoh sang daoki palao pajaih raong bahrau.

Hadei di rilo harei joa gidang, harei ini yaom pabui diuk di gah Maraong ba gauk tagok di rilo tinh, ban. Di Cần Thơ, yaom tagok 2.000 đồng, jeng 55.000 đồng/kg. Dom tinh, ban hu yaom ralaow pabui tagok 1.000 đồng lac: Đồng Nai, Bà Rịa-Vũng Tàu, Tiền Giang, Sóc Trăng, Bạc Liêu. Di Đông Nam bộ, yaom pabui diuk lac 53.000 đồng/kg. Yaom pabui diuk di gah maraong tagok veik kayua rilo doanh nghiệp saong gah pablei praong hu peih dom danak dak khuyến mãi, rik tame bruk patagok prein blei.

Page harei 6/12, UB bhap bini xã Hòa Ninh brei thau bruk glut jaleih di palei Bình Thuận 1, huyện Long Hồ, tỉnh Vĩnh Long meng biar harei kabroi jeng daok rah tabiak sraw kadau. Urak ini glut jaleih labaih 500m, mbang tame dalam 250-300m, bhum palei brei manuac mai panduan ba jaik 20 baoh sang, dalam nan hu 12 sang lahik abih sang danaok nao tal labik samalat. Bruk glut jaleih takai kraong bhian rah tabiak ralo di Bhum taneran kraong Cuu Long. Meng thun 1992, yaok thun labik ini lahik meng 300 -600 ha taneh. Sa dalam dom bruk ba tal lac kayua kuac mek cuah ralo ngak salih jalan nduac di ia kraong.

Ủy ban châu Âu (EC) bahrau brei thau paok jien buh tame jaik 1,3 tỷ USD ka dom danak dak quốc phòng, dalam nan hu bruk cak rok patagok tiêm kích rai bahrau; patagok dom công nghệ pacang caga hu makna praong  gah vũ trụ, không gian mạng, điện toán taginum quân sự, ilamo nhân tạo, janih bán dẫn saong y tế". Abih tih hu 61 danak dak daok hu kadung jien Quốc phòng châu Âu daong brei. Bruk ini hu ba tabiak dalam tuk kho vũ khí di rilo taneh ia EU trun daok takik kayua bruk daong quân sự ka Ukraine, jang yau prein ngak quân sự di rilo gah dalam liên minh hu brei mboh bruk patakik di nyu.

Rilo asar kadha hu rajaei birau di Malaysia brei tapa hadei di mbang nyaom praong camereip abih di harei 5/12, dalam nan hu bruk cakak trun 20% jien bilan  di dom akok Mentri.  Thủ tướng Anwar Ibrahim hu sanya peih ngak ginup  danak salih birau, dalam nan hu brei ngak dahlau bruk klak độc quyền ngan haong dom jalan pabak pandap. Rajaei brei langyah  catang piah peih ngak bruk độc quyền blei brah  di taneh ia piah khik kein laba ka urang ngak nong kathaot. Tui nan, daong ka urang ngak nong pala padai 2,3 trieu USD dalam bilan ini saong 11,4 trieu USD dalam thun 2023.

Gah Y tế dunya (WHO) hu panuac lac, urak ini hu labaih 500 dòng phụ di biến thể Omicron, mbuan njom mbak glaong daok tamuh tabiak. WHO kuhria mboh lac, hu takik di nyu  90% menuac sia di dunya hu prein pacang caga haong SARS-CoV-2. Min, tukvak samar drah di jit praong jeng ka oh hu tamat abih tuk bruk takik caik hatai sangka dalam pasang iek, dut iek, langyah gene saong klauk jru daok palagaih ka anek ruak bahrau tamuh tabiak, meda ba tal metai lahik biak rilo./.