Dah page ini (11-11), Thủ tướng Phạm Minh Chính haong kapul pakat glaong di Việt Nam hu mbaok tame nyaom biai pakat glaong ASEAN mbang ka 40, 41 saong dom nyaom biai pakat glaong pambuak tal di ban ine Phnom Penh (Campuchia). Nyaom biai mbang ini lac tuk piah ka dom taneh ia maong gilac veik saong khang hatai kham marat ka harei hadei jumpataom gauk, tự cường, ngak tui adat hukum. Rilo pathau khan hu makna praong meda hu brei tapa, yau ye gam haong Pathau khan pahadar 55 thun padang ASEAN, Pathau khan ASEAN ngak bruk: ba gauk pacang caga kan kandah saong pathau khan bruk pambuak ASEAN hadei di thun 2025, lac dom jalan ngak di sarak piah jhul patagok pambuak bruk kinh tế, cak rok samu gauk, pambuak gauk luac jalan saong khik ramik bruk ngak pasak di ASEAN dalam bhum.

Ndom biai "Trí thức trẻ Việt Nam toàn cầu" mbang ka 5 kayua kapul dam dara pakat negar dang ngak hu peih tabiak tuk mesup ini (11/11) di Bến Tre, hu mbaok 180 trí thức trẻ mai meng 22 taneh ia... Di labik ndom biai ini, urang pataom tame ginum biai saong ba tabiak dom jalan ngak lac: bruk patagok, pambuak haong rami ramik veik kinh tế, jhul patagok samar saong khang kajap: ginum biai dom jalan ngak pasiam saong jhul patagok nền kinh tế tuần hoàn, kinh tế xanh, kinh tế số di Việt Nam; rami ramik veik gah ngak nong saong padang ngak palei pala bahrau, pasiam bruk salih bahrau hadah krah, padang mbang ngui salih bharau hadah krah pakat negar.

Tui Sở Y tế TP.HCM, tapa pasang iek mek panuac 357 urang amaik hu anek umo mala 5 thun, bahrau mboh 36 amaik njauk hatai brei ka anek klauk jru vaccine caga COVID-19. Makna ba tal bruk rilo amaik oh brei ka anek nao klauk jru lac kayua umo anek di drei daok biak sit, huac dom tác dụng phụ di vaccine, uranaih dahlau daih njauk COVID -19. Meng akaok thun tal harei 22/10, TP.HCM hu labaih 13.500 uranaih umo mala 5 thun njauk  COVID-19, meblah jaik 4,3%  abih tih dom urang ruak dalam ban, glaong jang tanut kuhria rah tapa di dunya. Kayua yau nan ye, Sở Y tế mboh lac, pacang caga ka ranaih umo ini plaih di bruk njauk ruak COVID-19 lac biak njauk ngak.

Tỉnh Trà Vinh daok pataom rilo jalan ngak piah ba du lịch jeng gah ngak mbang praong saong jeng gah ngak kinh tế praong. Dalam nan kham merat tal thun 2025 meda taduan raok labaih 1,7 triệu tuai haong yaom jien mek tame hu abih tih lac labaih 930 tỷ đồng. Piah ngak hu yau bruk ba tabiak, gam haong bruk pathau khan, tỉnh peih ngak samu gauk dom sarak dui pachreih urang buh jien tame ngak mbang, patagok du lịch… Gam haong nan, ieu da-a dom danak dak đầu tư du lịch praong, dom pasak pablei salih, me-in sambai chất lượng glaong.

Danak dak binek pacang ia mbak, khik caga ia taba di ribaong Nguyễn Tấn Thành, xã Bình Đức- Song Thuận, huyện Châu Thành (Tiền Giang) hu peih tabiak ngak. Binek pacang ia mbak ini hu buh jien tame ngak meng kadung jien kanja lac labaih 460 tỷ đồng, daok atah di kraong Tiền 420 mét, Danak dak ini meda hu ngak salah di thun 2024. Ini lac danak dak kraong ribaong pacang caga ia mbak, khik caga ia taba praong dang ka 2 di bhum ĐBSCL, daong ka bhap bini di pak ini saong dom tinh, ban jaik taphia lagaih haong bruk biến đổi khí hậu.

Tổng thống Joe Biden dalam mbang tapa ravang châu Á anak tal meda ginum biai haong TT Hàn Quốc Yoon Suk-yeol ka bruk đe dọa praong dalam jang kayua Triều Tiên ngak tabiak dalam gah an ninh mạng. Dalam sa bruk pambuak tal, urang brei panuac di Mintri Ngoại giao Mỹ tabiak panuac lac Washington pachreih tui saong daok ba tabiak ngak dom jalan daong ka rahra Triều Tiên, oh sahneng hagait tal bruk karei gauk gah chế độ chính trị, saong hu panuac ieu Bình Nhưỡng caik rahra tagok mangaok kein laba di chế độ.

Dom urang jakar di Thổ Nhĩ Kỳ hu cap khik takik di nyu lac 19 urang medil lac hu pambuak tal kol khủng bố  IS. Gah cảnh sát pacang khủng bố di ban ine Ankara hu peih dom mbang taong pamaong tame 15 urang negar langiu medil lac pambuak tal IS. Takik di nyu 12 urang njauk cap khik dalam bruk ini. Kapul an ninh jeng cap khik 4 urang hu pambuak tal IS di tỉnh gah maraong Batman. Di rilo labik karei jeng hu dom urang njauk cap khik kayua pambuak tal IS.

Urang jakar ngak praong di Australia bahrau ini hu panuac brei thau ka bruk mbuan tamuh jit COVID-19 kayua anek ruak XBB di biến thể Omicron. Dahlau di nan, menuac sia bang Queensland taduan hu panuac kakei lac njauk cuk pataih pacang mbaok di dom labik mbuan njaom mbak, dalam tuk menuac tame sang iek ruak kayua jit ruak COVID-19  tagok glaong dalam 7 harei tapa. Di rilo labik karei di Australia, dom menuac njaom COVID-19 daok tagok rilo.

Urang lang: Thu Thảo & M. Phương